ଯାଜପୁର: ମଙ୍ଗଳବାର ଜଣେ ଛଅ ବର୍ଷର ଶିଶୁକୁ ଭୁଲ୍ ଇଞ୍ଜେକସନ୍ ଦିଆଯାଇଥିବା ଅଭିଯୋଗ ହୋଇଛି। ଯେଉଁଥି ପାଇଁ ଯାଜପୁର ଜିଲ୍ଲା ଦଶରଥପୁର ଥାନା ମନ୍ଦାରଖଣ୍ଡା ଗାଁର ସୁରେନ୍ଦ୍ର ମଲ୍ଲିକଙ୍କ ପୁଅ ଓମ୍ ମଲ୍ଲିକ ପ୍ରାଣ ହରାଇଥିବା ତାର ପରିବାର ଲୋକେ ଅଭିଯୋଗ କରିଛନ୍ତି।
ଓମ୍ ମଲିକ ଝାଡାବାନ୍ତିରେ ଆକ୍ରାନ୍ତ ହେବାରୁ ପରିବାର ଲୋକେ ତାକୁ ଏକ ଔଷଧ ଦୋକାନକୁ ନେଇଥିଲେ। ଦୋକାନ ମାଲିକ ମିଟୁ ପତି ବିନା ଡାକ୍ତରଙ୍କ ପ୍ରେସକ୍ରିପସନରେ ଦୁଇଟି ଇଞ୍ଜେକସନ ଦେଇଥିବା ଜଣାପଡିଛି। କିଛି ସମୟ ପରେ ଅସୁସ୍ଥ ଓମ୍ ଅଚେତ ହୋଇପଡ଼ିବା ପରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ଯେଉଁଠାରେ ଡାକ୍ତର ତାକୁ ମୃତ ଘୋଷଣା କରିଛନ୍ତି।
ସୁରେନ୍ଦ୍ର କହିଛନ୍ତି, ଆମ ପୁଅକୁ ଡାଇରିଆ ହୋଇଥିବାରୁ ଆମେ ତାକୁ ମେଡିସିନ୍ ଷ୍ଟୋରକୁ ନେଇଥିଲୁ। ତେବେ ମେଡିସିନ୍ ଷ୍ଟୋର ମାଲିକ ଭୁଲ୍ ଇଞ୍ଜେକସନ୍ ଦେବା ପରେ ତାଙ୍କ ସ୍ୱାସ୍ଥ୍ୟାବସ୍ଥା ବିଗିଡ଼ି ଯାଇଥିଲା। ଆମେ ତାକୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରିଥିଲୁ।
ଏ ନେଇ ପୁଅର ପରିବାର ପକ୍ଷରୁ ଥାନାରେ ଅଭିଯୋଗ ହେବା ପରେ ପୁଲିସ ଦୋକାନ ମାଲିକଙ୍କୁ ଖୋଜାଖୋଜି କରୁଛି। ପୁଲିସକୁ ଦେଇଥିବା ବୟାନରେ ପୁଅର ମା’ କୁନିଲତା ମଲ୍ଲିକ କହିଛନ୍ତି, ଆମ ପୁଅ ଝାଡାବାନ୍ତିରେ ଆକ୍ରାନ୍ତ ହୋଇଥିବାରୁ ଆମେ ତାକୁ ମେଡିସିନ୍ ଷ୍ଟୋରକୁ ନେଇଥିଲୁ। ଦୋକାନ ମାଲିକ ଦୁଇଟି ଇଞ୍ଜେକସନ୍ ଦେବା ପରେ ପୁଅର ମୃତ୍ୟୁ ହୋଇଛି।
ପୁଲିସ ଘଟଣାର ତଦନ୍ତ କରିବା ସହ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଜାରି ରଖିଛି। ଦୋକାନ ମାଲିକଙ୍କୁ ଖୋଜିବା ପାଇଁ ମଧ୍ୟ ଚେଷ୍ଟା କରାଯାଉଛି।
