ନୂଆଦିଲ୍ଲୀ: କେନ୍ଦ୍ର ଗୃହ ମନ୍ତ୍ରଣାଳୟ ବୌଦ୍ଧ ଧର୍ମଗୁରୁ ଦଲାଇଲାମାଙ୍କୁ ଜେଡ ବର୍ଗର ସୁରକ୍ଷା ପ୍ରଦାନ କରିଛି। ଦଲାଇ ଲାମାଙ୍କ ସୁରକ୍ଷା ସମ୍ପର୍କରେ ଗୁଇନ୍ଦା ବିଭାଗ ଗୃହ ମନ୍ତ୍ରଣାଳୟକୁ ଏକ ରିପୋର୍ଟ ପ୍ରଦାନ କରିଥିଲା, ଯାହା ପରେ ଏହି ନିଷ୍ପତ୍ତି ନିଆଯାଇଛି। ଏହା ଅଧୀନରେ, ଦଲାଇ ଲାମାଙ୍କୁ ଏବେ ମୋଟ ୩୩ ଜଣ ସୁରକ୍ଷାକର୍ମୀ ସୁରକ୍ଷା ଦେବେ | ଯେଉଁଥିରେ ୧୨ ଜଣ କମାଣ୍ଡୋ ଏବଂ ୬ ଜଣ ପିଏସଓ ସାମିଲ ଅଛନ୍ତି, ଯେଉଁମାନେ ତାଙ୍କୁ ୨୪ ଘଣ୍ଟା ସୁରକ୍ଷା ଯୋଗାଇବେ। ସୁରକ୍ଷାକର୍ମୀଙ୍କ ମଧ୍ୟରେ ୧୦ ଜଣ ସଶସ୍ତ୍ର ସୁରକ୍ଷା କର୍ମୀ ରହିବେ ଯେଉଁମାନେ ତାଙ୍କ ବାସଭବନରେ ଉପସ୍ଥିତ ରହିବେ। ଦଲାଇ ଲାମାଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ତାଲିମପ୍ରାପ୍ତ ଡ୍ରାଇଭର ଏବଂ ନିରୀକ୍ଷଣ କର୍ମଚାରୀ ସବୁବେଳେ ଡ୍ୟୁଟିରେ ରହିବେ। ଏହା ସହିତ, ତିନୋଟି ସିଫ୍ଟରେ ୧୨ ଜଣ କମାଣ୍ଡୋ ତାଙ୍କୁ ସୁରକ୍ଷା ଯୋଗାଇବେ। ଚୀନ୍ ବିରୁଦ୍ଧରେ ବିଫଳ ବିଦ୍ରୋହ ପରେ ଦଲାଇ ଲାମା ୧୯୫୯ ମସିହାରେ ଭାରତ ଆସିଥିଲେ। ଗତ କିଛି ବର୍ଷ ଧରି ଗୁଇନ୍ଦା ରିପୋର୍ଟଗୁଡ଼ିକ ଏହା ସୂଚାଉଛି ଯେ ଚୀନ୍ ସମର୍ଥିତ ବିଭିନ୍ନ ସଂସ୍ଥାଠାରୁ ଦଲାଇଲାମାଙ୍କ ଜୀବନ ପ୍ରତି ସମ୍ଭାବ୍ୟ ବିପଦ ରହିଛି | ଯାହା ଫଳରେ କେନ୍ଦ୍ର ସରକାର ତାଙ୍କ ସୁରକ୍ଷାକୁ ସର୍ବାଧିକ ପ୍ରାଥମିକତା ଦେଇଛନ୍ତି ।
୧୯୪୦ ମସିହାରେ, ତିବ୍ଦତର ରାଜଧାନୀ ଲାସାରେ ତାଙ୍କୁ ୧୪ତମ ଦଲାଇ ଲାମା ଭାବରେ ମାନ୍ୟତା ଦିଆଯାଇଥିଲା। ସେ ବର୍ଷ ବର୍ଷ ଧରି ତିବ୍ଦତୀୟମାନଙ୍କୁ ନ୍ୟାୟ ପ୍ରଦାନ କରିବା ବିଷୟରେ ଦାବି କରି ଆସୁଛନ୍ତି । ୧୯୮୯ ମସିହାରେ ତାଙ୍କୁ ନୋବେଲ ଶାନ୍ତି ପୁରସ୍କାର ଦିଆଯାଇଥିଲା। ତିବ୍ଦତୀୟ ଧର୍ମଗୁରୁ ଛଅଟି ମହାଦେଶ ଏବଂ ୬୭ରୁ ଅଧିକ ଦେଶ ଭ୍ରମଣ କରିଛନ୍ତି।
ତିବ୍ଦତୀୟ ବୌଦ୍ଧ ଧର୍ମର ଆଧ୍ୟାତ୍ମିକ ନେତା ଦଲାଇ ଲାମା ଜୁଲାଇରେ ୯୦ ବର୍ଷ ବୟସରେ ପଦାର୍ପଣ କରିବେ। ଦଲାଇ ଲାମାଙ୍କୁ ବିଭିନ୍ନ ସମୟରେ ବିଶ୍ୱ ନେତାମାନଙ୍କଠାରୁ ସମର୍ଥନ ମିଳିଛି। ୨୦୧୦ ମସିହାରେ, ଚୀନର ବିରୋଧ ସତ୍ତ୍ୱେ ଆମେରିକାର ରାଷ୍ଟ୍ରପତି ବାରାକ ଓବାମା ଦଲାଇ ଲାମାଙ୍କୁ ଭେଟିଥିଲେ।
