ନୂଆଦିଲ୍ଲୀ: ପ୍ରଧାନମନ୍ତ୍ରୀ ମୋଦୀ ତାଙ୍କ ଆମେରିକା ଗସ୍ତ ସମୟରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ଏକ ମିଳିତ ସାମ୍ବାଦିକ ସମ୍ମିଳନୀ କରିଥିଲେ। ଏହି ସମୟରେ, ଜଣେ ସାମ୍ବାଦିକ ଗୌତମ ଆଦାନୀଙ୍କ ମାମଲା ସମ୍ପର୍କରେ ଏକ ପ୍ରଶ୍ନ ପଚାରିଥିଲେ। ପ୍ରଶ୍ନର ଉତ୍ତର ଦେବା ସମୟରେ ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ ଦୁଇ ଦେଶର ନେତା ବ୍ୟକ୍ତିଗତ ବିଷୟରେ କଥା ହୁଅନ୍ତି ନାହିଁ।
ଏବେ କଂଗ୍ରେସ ନେତା ରାହୁଲ ଗାନ୍ଧୀ ତାଙ୍କ ବୟାନକୁ ଟାର୍ଗେଟ କରିଛନ୍ତି। ସେ କହିଥିଲେ ଯେ ଆମେରିକାରେ ମଧ୍ୟ ମୋଦୀ ଜି ଆଦାନୀ ଜିଙ୍କ ଦୁର୍ନୀତିକୁ ଘୋଡାଇ ଦେଇଥିଲେ। ପ୍ରଧାନମନ୍ତ୍ରୀ ମୋଦୀଙ୍କୁ କଟାକ୍ଷ କରି ରାହୁଲ ଗାନ୍ଧୀ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଲେଖିଛନ୍ତି, “ଦେଶରେ ଆଦାନୀଙ୍କୁ ନେଇ ପ୍ରଶ୍ନ ପଚରାଗଲେ ମୋଦୀ ନିରବ ରୁହନ୍ତି |ବିଦେଶରେ ଯେତେବେଳେ ଏନେଇ ପଚରାଯାଏ, ତାହା ଏକ ବ୍ୟକ୍ତିଗତ ମାମଲା ହୋଇଯାଏ | ଆମେରିକାରେ ମଧ୍ୟ ମୋଦୀ ଜି ଆଦାନୀ ଜିଙ୍କ ଦୁର୍ନୀତିକୁ ଘୋଡାଇ ଦେଇଥିଲେ! ଯେତେବେଳେ ବନ୍ଧୁଙ୍କ ପକେଟ ପୂରଣ କରିବା ମୋଦୀ ଜିଙ୍କ ପାଇଁ ‘ରାଷ୍ଟ୍ର ନିର୍ମାଣ’ ହୋଇଥାଏ, ସେତେବେଳେ ଲାଞ୍ଚ ନେବା ଏବଂ ଦେଶର ସମ୍ପତ୍ତି ଲୁଟ କରିବା ‘ବ୍ୟକ୍ତିଗତ ମାମଲା’ ହୋଇଯାଏ।”
ବାସ୍ତବରେ ସାମ୍ବାଦିକ ସମ୍ମିଳନୀରେ ଜଣେ ସାମ୍ବାଦିକ ମୋଦୀଙ୍କୁ ପଚାରିଥିଲେ କି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ସାକ୍ଷାତରେ ବ୍ୟବସାୟୀ ଗୌତମ ଆଦାନୀଙ୍କ ବିରୋଧରେ ମାମଲା ଉପରେ ଆଲୋଚନା ହୋଇଥିଲା କି? ଏହି ପ୍ରଶ୍ନ ପଚରାଯିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଥିଲେ, “ଭାରତ ଏକ ଗଣତାନ୍ତ୍ରିକ ଦେଶ ଏବଂ ଆମର ସଂସ୍କୃତି ‘ବସୁଧୈବ କୁଟୁମ୍ବକମ୍’ର, ଆମେ ସମଗ୍ର ବିଶ୍ୱକୁ ଗୋଟିଏ ପରିବାର ବୋଲି ମାନିଥାଉ। ମୁଁ ପ୍ରତ୍ୟେକ ଭାରତୀୟଙ୍କୁ ମୋର ବୋଲି ମାନିଥାଏ। ଏପରି ବ୍ୟକ୍ତିଗତ ପ୍ରସଙ୍ଗରେ, ଦୁଇଟି ଦେଶର ମୁଖ୍ୟ ଭେଟନ୍ତି ନାହିଁ କିମ୍ବା କଥାବାର୍ତ୍ତା କରନ୍ତି ନାହିଁ।”
ବାସ୍ତବରେ ଜୋ ବାଇଡେନଙ୍କ କାର୍ଯ୍ୟକାଳ ସମୟରେ, ଆମେରିକାର ନ୍ୟାୟ ବିଭାଗ ଆଦାନୀଙ୍କ ଉପରେ ଦୁର୍ନୀତିର ଅଭିଯୋଗ ଆଣିଥିଲା। ଅଭିଯୋଗ ଥିଲା ଯେ ସୌରଶକ୍ତି ଚୁକ୍ତିନାମାରେ ଲାଭ ପାଇବା ପାଇଁ ଆଦାନୀ ଭାରତୀୟ ଅଧିକାରୀମାନଙ୍କୁ ୨୫୦ ନିୟୁତ ଡଲାର (ପ୍ରାୟ ୨୧୦୦ କୋଟି ଟଙ୍କା) ଲାଞ୍ଚ ଦେଇଥିଲେ।
