ନୂଆଦିଲ୍ଲୀ : କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଗୁରୁବାର ଲୋକସଭାରେ ପ୍ରବାସ ଏବଂ ବିଦେଶୀ ବିଲ୍ ୨୦୨୫ (ଇମ୍ରିଗେସନ ଏଣ୍ଡ ଫରେନର୍ସ ବିଲ୍) ଉପରେ ପ୍ରତିକ୍ରିୟା ଦେଇଛନ୍ତି। ସେ କହିଥିଲେ ଯେ ଦେଶର ସୁରକ୍ଷା ପାଇଁ, ଆମ ଦେଶକୁ କିଏ ଏବଂ କେତେ ସମୟ ପାଇଁ ଆସନ୍ତି ତାହା ଜାଣିବାର ଅଧିକାର ଅଛି। ଗୃହମନ୍ତ୍ରୀ ଅମିତ ଶାହ କହିଛନ୍ତି ଯେ ଏହି ଦେଶ କୌଣସି ଧର୍ମଶାଳା ନୁହେଁ ଯେଉଁଠାରେ ଯେକେହି ଯେତେବେଳେ ଚାହିଁବେ ଏବଂ ଯେକୌଣସି ଉଦ୍ଦେଶ୍ୟରେ ରହିପାରିବେ।
ଏହି ବିଲରେ ଥିବା ବ୍ୟବସ୍ଥା ଅନୁସାରେ ଭାରତକୁ ଆସିବାକୁ ହେଲ ବୈଧ ପାସପୋର୍ଟ ଓ ଭିସା ଅନିବାର୍ଯ୍ୟ । ଜାଲ୍ କାଗଜପତ୍ର ସହ ଭାରତକୁ ଆସିଲେ କଡ଼ା ଦଣ୍ଡବିଧାନର ବ୍ୟବସ୍ଥା । ଭିସା ଶେଷ ହେବା ପରେ ବି ଭାରତରେ ରହୁଥିବା ଲୋକମାନଙ୍କୁ ଚିହ୍ନଟ କରାଯିବ ।
ଏହି ସମସ୍ତ ବ୍ୟବସ୍ଥା ଉପରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଲୋକସଭାରେ କହିଥିଲେ, “ଦେଶର ଅନେକ ପ୍ରସଙ୍ଗ ଏହି ବିଲ୍ ସହିତ ଜଡିତ। ମୁଁ ଏହି ଗୃହକୁ ପ୍ରତିଶ୍ରୁତି ଦେଉଛି ଯେ ଏହା ମାଧ୍ୟମରେ ଭାରତ ଆସୁଥିବା ସମସ୍ତ ବିଦେଶୀ ନାଗରିକଙ୍କ ହିସାବ ରଖିବାର କାର୍ଯ୍ୟ କରାଯିବ ଏବଂ ଏହା ମାଧ୍ୟମରେ ଦେଶର ବିକାଶ ମଧ୍ୟ ସୁନିଶ୍ଚିତ ହେବ।”
କେନ୍ଦ୍ର ଗୃହମନ୍ତ୍ରୀ ଅମିତ ଶାହ କହିଛନ୍ତି, “ଦେଶର ସୁରକ୍ଷା ପାଇଁ, ଦେଶର ଅର୍ଥନୀତି, ଉତ୍ପାଦନ ଏବଂ ବାଣିଜ୍ୟକୁ ସୁଦୃଢ଼ କରିବା ପାଇଁ, ଦେଶର ଶିକ୍ଷା ବ୍ୟବସ୍ଥାକୁ ପୁଣି ଥରେ ବିଶ୍ୱରେ ଗ୍ରହଣୀୟ କରିବା ପାଇଁ, ଆମର ବିଶ୍ୱବିଦ୍ୟାଳୟଗୁଡ଼ିକୁ ବିଶ୍ୱସ୍ତରୀୟ କରିବା ପାଇଁ ଏବଂ ଏହି ଦେଶକୁ ୨୦୪୭ ମସିହାରେ ବିଶ୍ୱର ସର୍ବୋତ୍ତମ କରିବା ପାଇଁ ଏହା ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବିଲ୍।”
