ପୁଞ୍ଚ/ଜାମ୍ମୁ: ଜମ୍ମୁ କାଶ୍ମୀରରେ ସମ୍ପ୍ରତି ପାକିସ୍ତାନ ଗୁଳିମାଡ଼ ଏକ “ଯୁଦ୍ଧ ପରି ପରିସ୍ଥିତି” ସୃଷ୍ଟି ହୋଇଥିଲା। ଫଳରେ ପୁଞ୍ଚ ଜିଲା ସମେତ ରାଜ୍ୟର ଅନେକ ସ୍ଥାନ ଆକ୍ରମଣରେ ପ୍ରଭାବିତ ହୋଇଥିଲା। ଦୁଇ ଦେଶ ମଧ୍ୟରେ ଏକ ସାମରିକ ବୁଝାମଣା ଯୋଗୁଁ ପାକ ଗୁଳିମାଡ଼ ବନ୍ଦ ରଖାଯାଇଛି। ଫଳରେ ପାକ୍ ଗୁଳିମାଡ଼ ଯୋଗୁଁ ଯେଉଁମାନେ ଘର ଛାଡିଛନ୍ତି ସେମାନେ ଏବେ ଫେରିପାରିବେ ବୋଲି ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା କହିଛନ୍ତି।
ଅବଦୁଲ୍ଲା ପାକିସ୍ତାନୀ ସେନାର ଚାଲିଥିବା ପ୍ରଚାରକୁ ମଧ୍ୟ ଖାରଜ କରି କହିଛନ୍ତି ଯେ ପଡ଼ୋଶୀ ଦେଶ ଏହାକୁ ଆଗକୁ ବଢାଇବ, କିନ୍ତୁ ବାସ୍ତବତା ବିଶ୍ୱକୁ ଜଣା। ସେମାନେ (ସୀମାନ୍ତବାସୀ) ଏବେ ନିଜ ଘରକୁ ଫେରିବାକୁ ଚେଷ୍ଟା କରିବା ଉଚିତ। ପୁଞ୍ଚ ସହରର ଅଶୀରୁ ୯୦ ପ୍ରତିଶତ ଖାଲି ପଡ଼ିଛି। ଗୁଳିମାଡ଼ ହେଉଥିବା ସମୟରେ ସେମାନେ ନିଜ ଘର ଛାଡିଥିଲେ। ବର୍ତ୍ତମାନ ଗୁଳିମାଡ଼ ବନ୍ଦ ହୋଇଯାଇଥିବାରୁ ସେମାନେ ନିଜ ଘରକୁ ଫେରିପାରିବେ ବୋଲି ଅବଦୁଲ୍ଲା ଏଠାରେ ସାମ୍ବାଦିକମାନଙ୍କୁ ସେ କହିଛନ୍ତି।
ସୋମବାର ମୁଖ୍ୟମନ୍ତ୍ରୀ ତାଙ୍କ କ୍ୟାବିନେଟ୍ ସହଯୋଗୀ ଜାଭେଦ ରାଣା, ପରାମର୍ଶଦାତା ନାସିର ଅସଲମ ୱାନି ଏବଂ ବିଧାୟକ ଐଜାଜ୍ ଜାନଙ୍କ ସହ ପୁଞ୍ଚ ଏବଂ ସୁରନକୋଟ ଅଞ୍ଚଳରେ ପାକିସ୍ତାନୀ ଗୁଳିମାଡ଼ ଦ୍ୱାରା ପ୍ରଭାବିତ ଲୋକଙ୍କ ପାଖକୁ ପହଞ୍ଚି ଏହି ଅଞ୍ଚଳରେ ବଙ୍କର ସ୍ଥାପନର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ।
ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଯାହାଙ୍କ ସହିତ ତାଙ୍କ ପୁଅ ଜମିର ଏବଂ ଜାହିର ମଧ୍ୟ ଥିଲେ, ନିୟନ୍ତ୍ରଣ ରେଖା (ଏଲଓସି) ପାଖରେ ସାମ୍ପ୍ରତିକ ଉତ୍ତେଜନାକୁ “ଯୁଦ୍ଧ ପରି” ପରିସ୍ଥିତି ଭାବରେ ବର୍ଣ୍ଣନା କରିଥିଲେ। ଯେଉଁଥିରେ ପୁଞ୍ଚ ଜିଲା ସର୍ବାଧିକ ଗୁଳିମାଡ଼ର ଶିକାର ହୋଇଥିଲା। ଗତ ତିନି-ଚାରି ଦିନ ଧରି ଜମ୍ମୁ ଏବଂ କାଶ୍ମୀରରେ ଏକ ପ୍ରକାର ଯୁଦ୍ଧ ପରି ପରିବେଶ ଥିଲା। ସୀମାପାର ଗୁଳିମାଡ଼ର ସମ୍ମୁଖୀନ ହୋଇଥିବା ସମସ୍ତ ଅଞ୍ଚଳ ମଧ୍ୟରୁ ପୁଞ୍ଚ ସବୁଠାରୁ ଅଧିକ ପ୍ରଭାବିତ ହୋଇଥିଲା ବୋଲି ସେ କହିଛନ୍ତି।
ନ୍ୟାସନାଲ୍ କନଫରେନ୍ସ (ଏନସି) ନେତା କହିଛନ୍ତି ଯେ ଏହା ପ୍ରଥମ ଥର ଯେ ସହର ମଧ୍ୟଭାଗରେ ଗୁଳିମାଡ଼ ହୋଇଛି ଏବଂ ପ୍ରବଳ ବୋମାମାଡ଼ ହୋଇଛି। ଆମେ ୧୩ ଜଣ ମୂଲ୍ୟବାନ ଜୀବନ ହରାଇଛୁ। ଆଜି ଏଠାକୁ ଆସିବାର ମୋର ଉଦ୍ଦେଶ୍ୟ ହେଉଛି ଅତି କମରେ ସେହି ଘରଗୁଡ଼ିକ ପର୍ଯ୍ୟନ୍ତ ପହଞ୍ଚିବା ଯେଉଁଠାରେ ଏହି ଦୁଃଖଦ ଘଟଣା ଘଟିଥିଲା ବୋଲି ସେ କହିଛନ୍ତି।
ଅବଦୁଲ୍ଲା ସ୍ଥାନୀୟ ନାଗରିକ ସମାଜର ସଦସ୍ୟମାନଙ୍କ ସହିତ ସାକ୍ଷାତ କରିଥିଲେ ଏବଂ ପ୍ରତିକୂଳ ପରିସ୍ଥିତିରେ ସାମ୍ପ୍ରଦାୟିକ ସଦ୍ଭାବ ବଜାୟ ରଖିବା ପାଇଁ ପୁଞ୍ଚର ଲୋକମାନଙ୍କୁ ପ୍ରଶଂସା କରିଥିଲେ।
କଠିନ ପରିସ୍ଥିତି ସତ୍ତ୍ୱେ, ସେମାନେ ହିନ୍ଦୁ, ମୁସଲମାନ ଏବଂ ଶିଖଙ୍କ ମଧ୍ୟରେ ଏକତାର ଐତିହ୍ୟକୁ ବଜାୟ ରଖିଥିଲେ ବୋଲି ସେ କହିଥିଲେ।
ଅବଦୁଲ୍ଲା ଭବିଷ୍ୟତରେ ମୃତାହତକୁ ରୋକିବା ପାଇଁ ପ୍ରସ୍ତୁତିର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। ଯଦି ଏପରି ପରିସ୍ଥିତି ପୁଣି ଥରେ ଉପୁଜେ, ତେବେ ଆମକୁ ନିଶ୍ଚିତ କରିବାକୁ ପଡିବ ଯେ ଏପରି ଜୀବନହାନି ନହୁଏ। ଆମେ ନାଗରିକ ସମାଜଠାରୁ ଅନେକ ଗଠନମୂଳକ ପରାମର୍ଶ ପାଇଛୁ ଏବଂ ଆମେ ସେଗୁଡ଼ିକର କାର୍ଯ୍ୟାନ୍ୱୟନ ପାଇଁ କାମ କରିବା ଆରମ୍ଭ କରିବୁ ବୋଲି ମୁଖ୍ୟମନ୍ତ୍ରୀ କହିଥିଲେ।
ପାକିସ୍ତାନର ଉଦ୍ଦେଶ୍ୟ ଉପରେ ଏକ ପ୍ରଶ୍ନର ଉତ୍ତର ଦେଇ ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା କହିଥିଲେ ମୋ ପାଖରେ ସେମାନଙ୍କର ଉଦ୍ଦେଶ୍ୟ ପଢ଼ିବା ପାଇଁ ଯାଦୁକରୀ ବାଡ଼ି ନାହିଁ। ମୁଁ କେବଳ ଭୂମିଗତ ବାସ୍ତବତା ଉପରେ ଆଧାର କରି ମତାମତ ଦେଇପାରିବି। ଅସ୍ତ୍ରବିରତି ଆରମ୍ଭ ହେବାର ୨୪ ଘଣ୍ଟା ହୋଇଗଲା ଏବଂ ଏପର୍ଯ୍ୟନ୍ତ ଏହା ଜାରି ରହିଛି।
ସେ ପାକିସ୍ତାନୀ ସେନାର ପ୍ରଚାରକୁ ଖାରଜ କରି କହିଥିଲେ ସେମାନେ ପ୍ରଚାର ଜାରି ରଖିବେ, କିନ୍ତୁ ବାସ୍ତବତା ଆପଣମାନଙ୍କୁ, ମୋତେ ଏବଂ ବିଶ୍ୱକୁ ଜଣା।
ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା କହିଛନ୍ତି ଯେ ସମସ୍ତ ପ୍ରଭାବିତ ଜିଲା – ପୁଞ୍ଚ, ରାଜୌରୀ, ଜମ୍ମୁ, ବାରାମୁଲ୍ଲା, କୁପୱାରା ଏବଂ ବାନ୍ଦିପୋରା – ର ପ୍ରଶାସନକୁ ସଂରଚନାଗତ କ୍ଷତିର ଆକଳନ କରିବାକୁ ଏବଂ କ୍ଷତିପୂରଣ ପାଇଁ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି।
ଆମର ପ୍ରାଥମିକତା ଏପର୍ଯ୍ୟନ୍ତ ଜୀବନ ବଞ୍ଚାଇବା, କିନ୍ତୁ ବର୍ତ୍ତମାନ ଯୁଦ୍ଧବିରତି କାର୍ଯ୍ୟକାରୀ ହେବା ପରେ ମୂଲ୍ୟାଙ୍କନ ଆରମ୍ଭ ହେବ ଏବଂ ରିଲିଫ୍ ପ୍ରଦାନ କରାଯିବ। ପ୍ରୋଫର୍ମା ଅନୁଯାୟୀ ଆମେ କ୍ଷତିପୂରଣ ଦେବୁ ବୋଲି ସେ କହିଛନ୍ତି।
ଗୁଳିବର୍ଷଣ ସମୟରେ ଅଧିକାରୀମାନେ ସେମାନଙ୍କର ପଦବୀ ଛାଡିଥିବା ରିପୋର୍ଟକୁ ମୁଖ୍ୟମନ୍ତ୍ରୀ ପ୍ରତ୍ୟାଖ୍ୟାନ କରିଛନ୍ତି। ଜଣେ ବି ଡିସି (ଡେପୁଟି କମିଶନର) ତାଙ୍କ ଷ୍ଟେସନ ଛାଡି ନାହାଁନ୍ତି। ଗଣମାଧ୍ୟମରେ କିଛି ଲୋକଙ୍କ ଦ୍ୱାରା ପ୍ରସାରିତ ଏହି ଗୁଜବ ଦୁର୍ଭାଗ୍ୟଜନକ ଏବଂ ଅସତ୍ୟ ବୋଲି ସେ ଦୃଢ଼ତାର ସହିତ କହିଛନ୍ତି।