ଭୁବନେଶ୍ୱର: ଓଡ଼ିଶା ସରକାର ପର୍ଯ୍ୟଟନକୁ ଆଗକୁ ବଢ଼ାଇବା ପାଇଁ ଭୁବନେଶ୍ୱରରୁ ଆନ୍ତର୍ଜାତୀୟ ଉଡ଼ାଣ ଆରମ୍ଭ କରିଥିଲେ। କିନ୍ତୁ ବିମାନର ସିଟ୍ ଫାଙ୍କା ପଡ଼ିବାରୁ ଏୟାରଲାଇନ୍ସକୁ ସରକାର ପ୍ରତି ମାସରେ ପ୍ରାୟ ୮ କୋଟିରୁ ଅଧିକ ଟଙ୍କା ଗଣୁଛନ୍ତି। ଗତ ଦୁଇ ବର୍ଷରେ ରାଜ୍ୟ ସରକାର ୧୭୦ କୋଟି ଟଙ୍କାରୁ ଅଧିକ ଖର୍ଚ୍ଚ କରିଛନ୍ତି।
୨୦୨୩ ମେ ୧୫ରୁ ଇଣ୍ଡିଗୋ ଏୟାରଲାଇନ୍ସ ଭୁବନେଶ୍ୱରରୁ ଦୁବାଇ ପାଇଁ ସିଧାସଳଖ ଉଡ଼ାଣ ଆରମ୍ଭ କରିଥିଲା। ପରେ ବ୍ୟାଙ୍କକ ଓ ସିଙ୍ଗାପୁର ରୁଟ ଯୋଡ଼ି ହୋଇଥିଲା। ଏହାର ଲକ୍ଷ୍ୟ ଥିଲା ବିଦେଶୀ ପର୍ଯ୍ୟଟକ ଓ ବିନିଯୋଗ ଆକର୍ଷଣ କରି ରାଜ୍ୟର ଅର୍ଥନୀତି ଓ ରୋଜଗାର ବଢ଼ାଇବା। କିନ୍ତୁ ତଥ୍ୟ ଅନୁସାରେ, ଯାତ୍ରୀ ସଂଖ୍ୟା କମ ରହୁଥିବାରୁ ଏହି ଯୋଜନା ଖର୍ଚ୍ଚବହୁଳ ହୋଇପଡ଼ିଛି।
ସୂଚନା ଅଧିକାର ଆଇନ (ଆରଟିଆଇ) ମାଧ୍ୟମରେ ମିଳିଥିବା ତଥ୍ୟରୁ ଜଣାପଡ଼ିଛି, ଖାଲି ସିଟ୍ ପାଇଁ ରାଜ୍ୟ ସରକାର ଇଣ୍ଡିଗୋକୁ ୧୭୦ କୋଟି ଟଙ୍କାରୁ ଅଧିକ ଦେଇଛନ୍ତି। ଏହି ଖର୍ଚ୍ଚ ‘ଭାୟାବିଲିଟି ଗ୍ୟାପ ଫଣ୍ଡିଂ’ (ଭିଜିଏଫ) ଯୋଜନା ଅଧୀନରେ ହେଉଛି। ଏହି ଯୋଜନା ଅନୁସାରେ, ଖାଲି ଆସନର କ୍ଷତି ପୂରଣ ପାଇଁ ସରକାର ଏୟାରଲାଇନ୍ସକୁ ଅର୍ଥ ଦେଉଛନ୍ତି। ପ୍ରତି ମାସରେ ପ୍ରାୟ ୮ କୋଟି ଟଙ୍କା ଏଥିପାଇଁ ଖର୍ଚ୍ଚ ହେଉଛି।
ତଥ୍ୟ ଅନୁସାରେ, ଦୁବାଇ ରୁଟରେ ୮.୬୧%, ବ୍ୟାଙ୍କକରେ ୧୯.୨୭% ଓ ସିଙ୍ଗାପୁର ରୁଟରେ ୩୫.୬୬% ଆସନ ଖାଲି ରହୁଛି। ଦୁବାଇ ଯିବା ପାଇଁ ସିଧାସଳଖ ଉଡ଼ାଣ ଯୋଗୁଁ ଦିଲ୍ଲୀ, ହାଇଦ୍ରାବାଦ କିମ୍ବା ମୁମ୍ବାଇ ଦେଇ ଯିବା ଅପେକ୍ଷା ୧୯ ଘଣ୍ଟା ସମୟ ବଞ୍ଚୁଛି। କିନ୍ତୁ ଟିକେଟ ମୂଲ୍ୟ ଅଧିକ ହେବା ଏକ ବଡ଼ ସମସ୍ୟା। ଦୁବାଇର ରାଉଣ୍ଡ ଟ୍ରିପ ପାଇଁ ୩୦,୦୦୦ ଟଙ୍କା ଖର୍ଚ୍ଚ ହେଉଛି, ଯେତେବେଳେ ବ୍ୟାଙ୍କକ ଓ ସିଙ୍ଗାପୁର ପାଇଁ ୨୦,୦୦୦ ଟଙ୍କା।
ଏହି ଉଡ଼ାଣ ଦକ୍ଷିଣ-ପୂର୍ବ ଏସିଆ, ଗଲ୍ଫ ଅଞ୍ଚଳ ଓ ୟୁରୋପ ପାଇଁ ଟ୍ରାନଜିଟ ହବ ସହ ସଂଯୋଗ ସ୍ଥାପନ କରିଛି। ତଥାପି, ପର୍ଯ୍ୟଟନ ବୃଦ୍ଧି ପାଇଁ ଯାତ୍ରୀ ସଂଖ୍ୟା ବଢ଼ିନାହିଁ। ଟୁର ଅପରେଟର ଗଗନ ଷଡ଼ଙ୍ଗୀ କହିଛନ୍ତି, “ଓଡ଼ିଶାକୁ ବିଦେଶରେ ପର୍ଯ୍ୟଟନ ଗନ୍ତବ୍ୟ ଭାବେ ପ୍ରଚାର କରାଯାଉନାହିଁ। ଏହାର ଉନ୍ନତି ପାଇଁ ଦୃଢ଼ ପ୍ରଚାର ଓ ଉତ୍ତରଦାୟିତ୍ୱ ଆବଶ୍ୟକ।”
ବିଶେଷଜ୍ଞଙ୍କ କହିବା ଅନୁଯାୟୀ, ରାଜ୍ୟରେ ଥିବା ପର୍ଯ୍ୟଟନ ଶିଳ୍ପକୁ ଆଗକୁ ନେବା ପାଇଁ ହେଲେ ବିଭିନ୍ନ ମଞ୍ଚରେ ଏହାର ପ୍ରଚାର ହେବା ଆବଶ୍ୟକ। ଏପରି ହେଲେ ଦେଶ ବିଦେଶର ପର୍ଯ୍ୟଟକଙ୍କୁ ଆକୃଷ୍ଟ କରି ହେବ। ଏପରି ହେଲେ କ୍ଷତି ଭରଣ ହୋଇପାରନ୍ତା।