ପ୍ରଧାନମନ୍ତ୍ରୀଙ୍କ ପାଇଁ ଅପଶବ୍ଦ ବ୍ୟବହାର ଘଟଣା; ବିଜେପି-କଂଗ୍ରେସକର୍ମୀ ଧସ୍ତାଧସ୍ତି, ଲାଠି,ଠେଙ୍ଗାରେ ହେଲା ଆକ୍ରମଣ
ପାଟନା : ବିହାରର ଦରଭଙ୍ଗାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଦିବଙ୍ଗତ ମାଆଙ୍କ ପାଇଁ ଅପମାନଜନକ ଶବ୍ଦ ବ୍ୟବହାରକୁ ନେଇ ବିବାଦ ବୃଦ୍ଧି ପାଉଥିବା ନଜରକୁ ଆସିଛି। ଏନେଇ ଅନେକ ସ୍ଥାନରେ ମାମଲା ମଧ୍ୟ ରୁଜୁ ହୋଇଛି। ଅନେକ ବିଶିଷ୍ଟ ବ୍ୟକ୍ତି, ନେତାମାନେ ଏହାକୁ ନିନ୍ଦା କରିଛନ୍ତି। ଅନ୍ୟପଟେ ଅଗଷ୍ଟ ୨୯ରେ ପାଟନାରେ ଏହାକୁ ନେଇ ପ୍ରବଳ ଉତ୍ତେଜନା ସୃଷ୍ଟି ହୋଇଛି। ବିଜେପି କର୍ମୀମାନେ ଏହାର ପ୍ରତିବାଦ କରି କଂଗ୍ରେସ କାର୍ଯ୍ୟାଳୟ ନିକଟରେ ପହଞ୍ଚିଥିଲେ। ଏହାପରେ କଂଗ୍ରେସ ଓ ବିଜେପି କର୍ମୀ ମୁହାଁମୁହିଁ ହେବା ସହ ଧସ୍ତାଧସ୍ତି ପରିସ୍ଥିତି ସୃଷ୍ଟି ହୋଇଥିଲା। ବିଜେପି ଓ କଂଗ୍ରେସକର୍ମୀଙ୍କ ମଧ୍ୟରେ ଲାଠି,ଠେଙ୍ଗାରେ ମାଡ୍ପିଟ୍ ଆରମ୍ଭ ହୋଇଥିଲା। ପରସ୍ପର ଉପରେ ପଥର ମାଡ ମଧ୍ୟ ହୋଇଛି। ଘଟଣାସ୍ଥଳରେ ଅନେକ ପୁଲିସ କର୍ମୀ ଉପସ୍ଥିତ ଥିବା ସହ ପରିସ୍ଥିତିକୁ ନିୟନ୍ତ୍ରଣ କରିବାକୁ ଚେଷ୍ଟା କରିଥିଲେ।
ବିହାର ସରକାରଙ୍କ ମନ୍ତ୍ରୀ ନୀତିନ ନବୀନ କହିଛନ୍ତି, କଂଗ୍ରେସ ନେତାଙ୍କୁ ଚେତାବନୀ ଦେଉଛି। ତୁମେ ମାଆଙ୍କୁ ଅପମାନିତ କରିଛ, ବିହାରର ପ୍ରତ୍ୟେକ ପୁଅ ଏହାର ଜବାବ ଦେବ। ପ୍ରତ୍ୟେକ ବିଜେପୀକର୍ମୀ ଏହାର ପ୍ରତିଶୋଧ ନେବ। ଆମେ ଏକ ଶାନ୍ତି ପୂର୍ଣ୍ଣ ପ୍ରତିବାଦ କରିବାକୁ ଆସିଥିଲୁ ମାତ୍ର କଂଗ୍ରେସ କାର୍ଯ୍ୟାଳୟ ପକ୍ଷରୁ ଇଟା,ପଥର ଫିଙ୍ଗା ଯିବା ସହ ଆମ ଉପରେ ଆକ୍ରମଣ ହୋଇଛି। ଆମେ ମାଆଙ୍କ ଅପମାନର ପ୍ରତିଶୋଧ ନେବୁ।
ଆଜି ବିଜେପି ପାଟନାର ରାସ୍ତାରେ ଏକ ପ୍ରତିବାଦ ଶୋଭାଯାତ୍ରା ବାହାର କରିଥିଲା। ଏହି ପ୍ରତିବାଦ ଶୋଭାଯାତ୍ରା ବିହାର କଂଗ୍ରେସ ରାଜ୍ୟ କାର୍ଯ୍ୟାଳୟ ସଦକତ ଆଶ୍ରମ ଦେଇ ଯିବା ମାତ୍ରେ ବିଜେପି ଏବଂ କଂଗ୍ରେସ ନେତାଙ୍କ ମଧ୍ୟରେ ସଂଘର୍ଷ ହୋଇଥିଲା। କଂଗ୍ରେସ ଏବଂ ବିଜେପି କର୍ମୀମାନେ ପରସ୍ପର ଉପରେ ଆକ୍ରମଣ କରିବା ଆରମ୍ଭ କରିଦେଇଥିଲେ।
ପ୍ରଧାନମନ୍ତ୍ରୀ ମୋଦୀଙ୍କୁ ଦୁର୍ବ୍ୟବହାର ପ୍ରତିବାଦରେ ବିଜେପି ନେତାମାନେ କୁର୍ଜି ହସ୍ପିଟାଲରୁ ସଦକତ ଆଶ୍ରମ ପର୍ଯ୍ୟନ୍ତ ଏକ ପ୍ରତିବାଦ ଶୋଭାଯାତ୍ରାରେ ବାହାର କରିଥିଲେ। ଏହି ଶୋଭାଯାତ୍ରାରେ ବହୁ ସଂଖ୍ୟକ ବିଜେପି ନେତା ଉପସ୍ଥିତ ଥିଲେ।
ସୂଚନାନୁଯାୟୀ, ବୁଧବାର ଦିନ ଦରଭଙ୍ଗାରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ଭୋଟର ଅଧିକାର ଯାତ୍ରା ସମୟରେ ଏକ ବଡ଼ ବିବାଦ ସୃଷ୍ଟି ହୋଇଥିଲା। ଏହି ଯାତ୍ରା ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିରୁଦ୍ଧରେ ଆପତ୍ତିଜନକ ଏବଂ ଅପମାନଜନକ ଶବ୍ଦ ବ୍ୟବହାର କରାଯାଇଥିଲା। ଯାତ୍ରାରେ ସାମିଲ କିଛି ନେତା ଏବଂ କର୍ମୀ କେବଳ ମୋଦୀ ବିରୋଧୀ ସ୍ଲୋଗାନ ଦେଇନଥିଲେ ବରଂ ଅପମାନଜନକ ଶବ୍ଦ ମଧ୍ୟ ବ୍ୟବହାର କରିଥିଲେ। ଏହି ଘଟଣାର ଭିଡିଓ ସୋସିଆଲ ମିଡିଆରେ ଅଧିକ ଭାଇରାଲ ହେବାରେ ଲାଗିଛି।
ଏହି ମାମଲାରେ ରାଜନୈତିକ ହଇଚଇ ସୃଷ୍ଟି ହୋଇଥିଲା ଏବଂ ଏବେ ଦରଭଙ୍ଗାର ସିମରି ପୁଲିସ ଭିଡିଓ ଫୁଟେଜ୍ ଆଧାରରେ ଭାପୁରାର ବାସିନ୍ଦା ଅଭିଯୁକ୍ତ ରିଜଭି ଓରଫ ରାଜାଙ୍କୁ ଗିରଫ କରିଛି। କୁହାଯାଉଛି ଯେ ପଙ୍କଚର ଦୋକାନ ଚଳାଉଥିବା ରିଜଭି କଂଗ୍ରେସ କର୍ମକର୍ତ୍ତା ନୁହଁନ୍ତି ବରଂ ସ୍ଥାନୀୟ ନେତାଙ୍କ ସମର୍ଥକ। ସାଇବର ତଦନ୍ତ ଏବଂ ଭିଡିଓ ଫୁଟେଜ୍ ଆଧାରରେ ଭାପୁରାର ୱାର୍ଡ ୧ର ଭବାନୀପୁର ପଞ୍ଚାୟତର ବାସିନ୍ଦା ଅନିଶ କୁରେଶୀଙ୍କ ପୁଅ ରିଜଭି ଓରଫ ରାଜାଙ୍କୁ ସିମରି ପୁଲିସ ଗିରଫ କରିଛି। ଅନ୍ୟ ସନ୍ଦିଗ୍ଧ ବ୍ୟକ୍ତିଙ୍କ ଚିହ୍ନଟ ଚାଲିଛି।