ମସ୍କୋ ୨୯।୮: ୟୁକ୍ରେନ ବିପକ୍ଷରେ ଜାରି ଯୁଦ୍ଧରେ ଋଷିଆ ପ୍ରଥମ ଥର ସମୁଦ୍ର ଡ୍ରୋନ ବ୍ୟବହାର କରିଛି। ଏଥିରେ ୟୁକ୍ରେନ ନୌସେନାର ସବୁଠୁ ବଡ଼ ଯୁଦ୍ଧପୋତକୁ ବୁଡାଇ ଦିଆଯାଇଛି। ଋଷିଆ ଦାବି କରିଛି ଯେ ଯୁଦ୍ଧରେ ସି-ଡ୍ରୋନ ବ୍ୟବହାର କରି ୟୁକ୍ରେନ ନୌସେନା ଜାହାଜ ‘ସିମ୍ଫରୋପୋଲ’କୁ ବୁଡାଯାଇଛି। ରିପୋର୍ଟ ଅନୁସାରେ ୟୁକ୍ରେନର ଏହି ଯୁଦ୍ଧଜାହାଜ ଲାଗୁନା କ୍ଲାସର ମଧ୍ୟମ ଆକାର ଗୁଇନ୍ଦା ଜାହାଜ ଥିଲା।
ଏହି ଜାହାଜକୁ ରେଡିଓ, ଇଲେକ୍ଟ୍ରୋନିକ୍, ରାଡାର ଓ ଅପ୍ଟିକାଲ ସର୍ଭିଲାନ୍ସ ଲାଗି ଡିଜାଇନ କରାଯାଇଥିଲା। ଋଷିଆ ପ୍ରତିରକ୍ଷା ମନ୍ତ୍ରାଳୟ ରିପୋର୍ଟରେ କୁହାଯାଇଛି ଯେ ଏହି ଆକ୍ରମଣ ଦାନ୍ୟୁବନଦୀର ଡେଲ୍ଟା କ୍ଷେତ୍ରରେ କରାଯାଇଥିଲା ଓ ଏଥିରେ ପ୍ରଥମ ଥର ସି-ଡ୍ରୋନକୁ ଉପଯୋଗ କରାଯାଇଥିବା ବେଳେ ଏହା ସମ୍ପୂର୍ଣ୍ଣ ସଠିକ ଆକ୍ରମଣ ଅଟେ। ଏହି କ୍ଷେତ୍ରଟି ଆଂଶିକ ରୂପେ ୟୁକ୍ରେନର ଓଡେଶା କ୍ଷେତ୍ରରେ ଆସୁଛି।
ଋଷୀୟ ମିଡିଆ ରିପୋର୍ଟରେ କୁହାଯାଇଛି ଯେ ସି-ଡ୍ରୋନକୁ ବ୍ୟବହାର କରି ୟୁକ୍ରେନ ନୌସେନା ଜାହାଜକୁ ସଫଳତା ପୂର୍ବକ ଟାର୍ଗେଟ କରାଯିବାର ଏହା ପ୍ରଥମ ଘଟଣା। ଋଷିଆର ଏହି ଆକ୍ରମଣ ଏବେ କେସ୍ ଷ୍ଟଡି ପାଲଟିଛି। କାରଣ ଏ ପର୍ଯ୍ୟନ୍ତ ଆକାଶୀୟ ଯୁଦ୍ଧରେ ଡ୍ରୋନ ବ୍ୟବହାର ହୋଇଆସୁଥିଲା। ହେଲେ ପ୍ରଥମ ଥର ସି-ଡ୍ରୋନ ବିଶ୍ୱର ମହଙ୍ଗା ମହଙ୍ଗା ଜାହାଜଙ୍କୁ ବିପଦରେ ପକାଇ ଦେଇଛି।
ସେପଟେ ୟୁକ୍ରେନ ଅଧିକାରୀମାନେ ଏହି ଆକ୍ରମଣକୁ ପୁଷ୍ଟି କରିଛନ୍ତି। ଏଥିରେ ଋଷିଆ ଆମର ଜାହାଜ ଉପରେ ଘାତକ ଆକ୍ରମଣ କରିଥିବା ସ୍ୱୀକାର କରିଛି। କିଭ୍ ଇଣ୍ଡିପେଣ୍ଡେଣ୍ଟ ୟୁକ୍ରେନ ନୌସେନା ମୁକପାତ୍ରଙ୍କ ସୂତ୍ରରୁ ଲେଖିଛି ଯେ ଏହି ଆକ୍ରମଣରେ ଜଣେ ଚାଳକ ଦଳ ସଦସ୍ୟଙ୍କ ମୃତ୍ୟୁ ହୋଇଥିବା ବେଳେ ଅନେକ ଆହତ ହୋଇଛନ୍ତି। ତେବେ ଅଧିକାଂଶ ଚାଳକ ଦଳ ସଦସ୍ୟ ସୁରକ୍ଷିତ ଥିବା ସେ କହିଛନ୍ତି। ଏଣୁ ଆକ୍ରମଣ ପରେ ଆମେ ପରିସ୍ଥିତିକୁ ସମ୍ଭାଳିବାକୁ ଉଦ୍ୟମ କରୁଥିବା କହିଛନ୍ତି।
ୟୁକ୍ରେନ ନୌସେନାର ଏହି ଜାହାଜ ୨୦୧୯ ମସିହାରେ ଲଞ୍ଚ ହୋଇଥିଲା ଓ ୨ ବର୍ଷ ପରେ ୟୁକ୍ରେନ ନୌସେନାରେ ସାମିଲ ହୋଇଥିଲା। ବିଶେଷଜ୍ଞଙ୍କ ଅନୁସାରେ ଯୁଦ୍ଧରେ ସି-ଡ୍ରୋନ ଉପଯୋଗ ହେବା ଏକ ନୂଆ ମୋର୍ଚ୍ଚା ଖୋଲିଛି ଓ ‘ସମ୍ଫରୋପୋଲ’ ଜାହାଜ ବୁଡିବା ମନୋବୈଜ୍ଞାନିକ ଓ ସାମରିକ ମୋର୍ଚ୍ଚାରେ ୟୁକ୍ରେନର ମନବଳ ଭାଙ୍ଗିବ। ଋଷିଆ ଟେଲିଗ୍ରାମ ଚ୍ୟାନେଲ ‘ୱାର ଗୋଞ୍ଜୋ’ ରିପୋର୍ଟ ଅନୁସାରେ ଏହି ଜାହାଜ ୟୁକ୍ରେନ ନୌସେନାର ସାମୁଦ୍ରିକ ଶକ୍ତିର ପ୍ରତୀକ ଥିଲା, ଯାହାକୁ ଡ୍ରୋନ ଟେକ୍ନୋଲଜିରେ ଧ୍ୱଂସ କରିଦିଆଯାଇଛି।