ନୂଆଦିଲ୍ଲୀ : ଆଧାରକାର୍ଡକୁ ନେଇ ଆସିଲା ବଡ ଓ ନୂଆ ଅପଡେଟ୍ । ଭାରତୀୟ ସ୍ୱତନ୍ତ୍ର ପରିଚୟ ପ୍ରାଧିକରଣ (ୟୁଆଇଡିଏଆଇ) ଇ-ଆଧାର ମୋବାଇଲ୍ ଆପ୍ ଲଞ୍ଚ କରିବା ନେଇ ପ୍ରସ୍ତୁତି କରୁଛି ଓ ଏହି ଆଧାର ମୋବାଇଲ୍ ଆପ୍ (ଇ-ଆଧାର ଆପ୍) କେବେ ଲଞ୍ଚ ହେବ ସେନେଇ ମଧ୍ୟ ସୂଚନା ମିଳି ପାରୁଛି । ୟୁଆଇଡିଏଆଇ ଅନୁଯାୟୀ, ମୋବାଇଲ୍ ଆପ୍ଲିକେସନ୍କୁ ଶୀଘ୍ରରୁ ଅତି ଶୀଘ୍ର ତିଆରି କରିବା ପାଇଁ କେନ୍ଦ୍ର ସରକାର ନିର୍ଦ୍ଦେଶ ଦେଇଛନ୍ତି । ଯେପରି ବର୍ଷ ୨୦୨୫ ଶେଷ ସୁଦ୍ଧା ଏହାକୁ ଲଞ୍ଚ କରାଯିବ।
ଇ-ଆଧାର ଆପ୍ରୁ ଲୋକେ ଘରେ ବସି କିଛି ମଧ୍ୟ କ୍ଲିକ୍ କରି ନିଜ ଆଧାରକାର୍ଡକୁ ଅପଡେଟ୍ କରି ପାରିବେ । ଲୋକେ ମୋବଇଲ୍ ଆପ୍ ଜରିଆରେ ହିଁ ନିଜ ଆଧାରକାର୍ଡରେ ନିଜର ତଥ୍ୟକୁ ଆବଶ୍ୟକତା ଅନୁସାରେ ପରିବର୍ତ୍ତନ କରିବା ସହ ଅପଡେଟ୍ କରି ପାରିବେ । ଯେପରି ନିଜର ଜନ୍ମ ତାରିଖ, ଘରର ଠିକଣା, ମୋବାଇଲ୍ ନମ୍ବର ଆଦି । ଇ-ଆଧାର ମୋବାଇଲ୍ ଆପ୍ ସିଙ୍ଗଲ୍ ଡିଜିଟାଲ ଇଣ୍ଟରଫେସ୍ ଟେକ୍ନୋଲୋଜିର ଅନୁଯାୟୀ ଡିଜାଇନ୍ କରାଯାଇଛି । ଏଆଇକୁ ଫେସ୍ ଆଇଡି ସହ ଏକାଠି କରାଯାଇ ଗ୍ରାହକଙ୍କୁ ସୁରକ୍ଷିତ ଓ ଅନ୍ଲାଇନ୍ ଆଧାର ସୁବିଧା ଉପଲବ୍ଧ କରାଇବା ପାଇଁ ପ୍ରସ୍ତୁତ କରାଯାଇଛି ।
ମୋବାଇଲ୍ ଆପ୍ କରିବା ପଛରେ ଆଧାର କାର୍ଡ ଅପଡେଟ୍ ସେବାକୁ କାଗଜବିହୀନ କରିବା ୟୁଆଇଡିଏଆଇର ଉଦ୍ଦେଶ୍ୟ। ଡିଜିଟାଇଜେସନକୁ ପ୍ରୋତ୍ସାହିତ କରିବା ଏବଂ ଇ-ସମ୍ପର୍କ କେନ୍ଦ୍ର ଉପରେ ଲୋକଙ୍କ ନିର୍ଭରଶୀଳତା ହ୍ରାସ କରିବା। ଆଧାର ଅପଡେଟ୍ ପ୍ରକ୍ରିୟାକୁ ସହଜ କରି, ଆଧାର ଅପଡେଟ୍ ସମୟ ମଧ୍ୟରେ ସୁନିଶ୍ଚିତ କରିବାକୁ ପଡିବ। ଆଧାର କାର୍ଡ ସୂଚନା ଲିକ୍ ହେବା ସହ ଜଡିତ ବିପଦକୁ କମ କରିବା ପାଇଁ।
ନଭେମ୍ବର ୨୦୨୫ରୁ ଆଧାର କାର୍ଡ ବ୍ୟବହାରକାରୀମାନଙ୍କୁ କେବଳ ବାୟୋମେଟ୍ରିକ୍ ଯାଞ୍ଚ, ଫିଙ୍ଗରପ୍ରିଣ୍ଟ ଏବଂ ଆଇରିସ୍ ସ୍କାନିଂ ପାଇଁ ଯୋଗାଯୋଗ କେନ୍ଦ୍ରକୁ ଯିବାକୁ ପଡିବ। ବାକି ଅପଡେଟ୍ ପାଇଁ ସେମାନଙ୍କୁ ମୋବାଇଲ୍ ଆପ୍ ବ୍ୟବହାର କରିବାକୁ ପଡିବ। ୟୁଆଇଡିଏଆଇ ଏହାର ମୋବାଇଲ୍ ଆପ୍ ମାଧ୍ୟମରେ ଜନ୍ମ ପ୍ରମାଣପତ୍ର, ପାନ୍ କାର୍ଡ, ପାସପୋର୍ଟ, ଡ୍ରାଇଭିଂ ଲାଇସେନ୍ସ, ରାସନ୍ କାର୍ଡ ଏବଂ ମନରେଗା ରେକର୍ଡଗୁଡ଼ିକୁ ଅନଲାଇନ୍ କରିବାକୁ ମଧ୍ୟ ଯୋଜନା କରୁଛି। ଏଥିରେ ବିଦ୍ୟୁତ୍ ବିଲ୍ ମଧ୍ୟ ଅନ୍ତର୍ଭୁକ୍ତ କରାଯାଇପାରିବ।
ଇ-ଆଧାର ଆଧାରକାର୍ଡର ଏକ ଡିଜିଟାଲ୍ କିମ୍ବା ଅନଲାଇନ୍ ସଂସ୍କରଣ, ଯାହାକୁ ୟୁଆଇଡିଏଆଇ ୱେବସାଇଟରୁ ପିଡିଏଫ ଫର୍ମାଟରେ ଡାଉନଲୋଡ୍ କରି ଫୋନରେ ସେଭ୍ କରାଯାଇପାରିବ। ପାସୱାର୍ଡ ଯୋଗୁଁ, କେହି ଇ-ଆଧାରକୁ ଆକ୍ସେସ୍ କରିପାରିବେ ନାହିଁ ଏବଂ ଏହାର ଅପବ୍ୟବହାରର କୌଣସି ଆଶଙ୍କା ରହିବ ନାହିଁ। ଇ-ଆଧାରକୁ Myaadhaar.uidai.gov.in କିମ୍ବା mAadhaar ଆପରୁ ଡାଉନଲୋଡ୍ କରିପାରିବେ।