ଅସ୍ତରଙ୍ଗ : ପର୍ବ, ପର୍ବାଣି, ପୂଜା, ମହୋତ୍ସବ ଆମ ଓଡିଆ ପରମ୍ପରାର ଏକ ଅଂଶ ବିଶେଷ। ବିଶେଷ ଭାବରେ ବିଘ୍ନ ବିନାୟକ ଗଣପତି ବାବା ଗଣେଶଙ୍କ ପୂଜା ଠାରୁ ପାର୍ବଣ ଋତୁ ଆରମ୍ଭ ହୋଇଥାଏ । ଏହି ସମୟରେ ବିଭିନ୍ନ ପର୍ବପର୍ବାଣି ସହିତ ଦେବୀ ଦେବତାଙ୍କ ପୂଜା ଆରମ୍ଭ ହୋଇଥାଏ । ଆଜିକାଲିର ଯୁବପିଢି ମାନେ ବିଭିନ୍ନ ପୂଜା ମହୋତ୍ସବ ଆୟୋଜନ କରି ସେଠାରେ ଆଧୁନିକ ସଭ୍ୟତାର ନାଚ ଗୀତର ଆସରକୁ ପସନ୍ଦ କରିଥାନ୍ତି । ଆଜିକାଲିର ଯୁବପିଢି ବିଭିନ୍ନ ଦେବା ଦେବୀଙ୍କ ପୂଜା ମଣ୍ଡପକୁ ଏକ ମଉଜ ମଜଲିସର ସ୍ଥାନ ବୋଲି ଭାବି ନେଇଛନ୍ତି ।
ଯେଉଁଠି ଈଶ୍ବରଙ୍କ ଆରାଧନା ସହିତ ଲୋକକଳା ପାଲା, ଦାସକାଠିଆ, ପ୍ରବଚନ ଭଳି ଆମ ସଂସ୍କୃତି ଆମ ପରମ୍ପରାର ଝଲକ ଦେଖିବାକୁ ମିଳୁଥିଲା ସେଠି ଏବେ ଆଧୁନିକ ମେଲୋଡି,ଡ୍ରାମା ଆଇଟମ ଡାନ୍ସ ପରିବେଷଣ କରାଯାଇ ଏହା ଏକ ଚିତବିନୋଦନର ମାଧ୍ୟମ ସାଜିଛି । ଏହି ସମୟରେ ଚଳିତ ବର୍ଷ ଗଣେଶ ପୂଜା ଅବସରରେ ଅସ୍ତରଙ୍ଗ ନିକଟ ଓସ୍ତପୁର ଗାଁର ମୁଦୁଲି ସାହିରେ ବାସୁଦେବ ୟୁଥକ୍ଲବର ଯୁବକ ମାନଙ୍କ ଦ୍ବାରା ପ୍ରବଚକ ଜିତୁ ଦାସଙ୍କ ଦ୍ବାରା ପ୍ରବଚନ କାର୍ଯକ୍ରମ ଆୟୋଜନ କରାଯାଇଥିବା ଦେଖିବାକୁ ମିଳିଛି । ଏହି ପ୍ରବଚନ କାର୍ଯ୍ୟକ୍ରମ ମାଧ୍ୟମରେ ଆଧ୍ୟାତ୍ମିକ ପରିବେଶ ସୃଷ୍ଟି ହେବା ସହିତ ସାମାଜିକ ଶୃଙ୍ଖଳାର କଥା ଲୋକମାନଙ୍କୁ ଉତ୍ତମ ଚରିତ୍ର ଗଠନରେ ପ୍ରେରଣା ଦେଉଛି ।
ଗଣେଶ ପୂଜା ଅବସରରେ ଅସ୍ତରଙ୍ଗ ନିକଟ ଓସ୍ତପୁର ଗାଁର ବାସୁଦେବ ୟୁଥ କ୍ଲବର ଯୁବକ ମାନଙ୍କ ଦ୍ବାରା ଆୟୋଜିତ ଆଧ୍ୟାତ୍ମିକ ପ୍ରବଚନରେ ଓଡ଼ିଶାର ବିଶିଷ୍ଟ ପ୍ରବଚକ ଜିତୁ ଦାସ ଯୋଗଦେଇ ଉପସ୍ତିତ ଗ୍ରାମବାସିଙ୍କୁ ଆଧ୍ୟାତ୍ମିକ କଥା ପ୍ରବଚନ ମାଧ୍ୟମରେ କହିଥିଲେ । ହିନ୍ଦୁ ଧର୍ମର ବିଭିନ୍ନ ଶାସ୍ତ୍ର ପୁରାଣର କଥାକୁ ସରଳ ଭାବରେ ଉପସ୍ଥିତ ଗ୍ରାମବାସୀଙ୍କୁ ପରସି ଦେଉଥିବା ବେଳେ ଲୋକମାନେ ଈଶ୍ବରୀୟ ଚେତନାରେ ଡୁବିଯାଉଥିବା ଦେଖିବାକୁ ମିଳିଥିଲା ।
ପୁରାଣ ଶାସ୍ତ୍ରରେ ଉଲେଖ୍ୟ ଥିବା ଆଧ୍ୟାତ୍ମିକ କଥାବସ୍ତୁ ସାମାଜିକ ଜୀବନ ଚର୍ଜ୍ୟ ଉପରେ ପ୍ରଭାବ ପକାଇବା ସହିତ ଏକ ସୁସ୍ଥ ସମାଜ ଗଠନ ଦିଗରେ ଏକ ପ୍ରମୁଖ ଭୂମିକା ଗ୍ରହଣ କରିଥାଏ । ଯାହା ଓସ୍ତପୁର ଗ୍ରାମର ୟୁଥ କ୍ଲବ ର ଯୁବକ ମାନେ ଏହି ପ୍ରବଚନ କାର୍ଯକ୍ରମକୁ ଆୟୋଜନ କରି ଏକ ଉଦାହରଣ ସୃଷ୍ଟି କରିଛନ୍ତି । ଗ୍ରାମର ସମସ୍ତ ଆବାଳ ବୃଦ୍ଧ ବନିତା ଏହି ପ୍ରବଚନ ଶୁଣିବା ସହିତ ହରି କୀର୍ତନ ରେ ନିଜକୁ ସାମିଲ କରିଥିବା ଦେଖିବାକୁ ମିଳିଥିଲା ।