ଭୁବନେଶ୍ବର: ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ୍ (ADR) ଏବଂ ନ୍ୟାସନାଲ୍ ଇଲେକ୍ସନ୍ ୱାଚ୍ ର ଏକ ରିପୋର୍ଟ ଅନୁଯାୟୀ, ଓଡ଼ିଶା ଏବଂ ଆନ୍ଧ୍ର ପ୍ରଦେଶ ଏପରି ରାଜ୍ୟ ଭାବରେ ଉଭା ହୋଇଛି ଯେଉଁଠାରେ ସର୍ବାଧିକ ପ୍ରତିଶତ ମନ୍ତ୍ରୀଙ୍କ ବିରୋଧରେ ଅପରାଧିକ ଅଭିଯୋଗ ରହିଛି। ବିଶ୍ଳେଷଣରୁ ଜଣାପଡିଛି ଯେ ଦେଶର ଓଡ଼ିଶା ସମେତ ୧୧ଟି ରାଜ୍ୟ ବିଧାନସଭାରେ ୬୦%ରୁ ଅଧିକ ମନ୍ତ୍ରୀ ଅପରାଧିକ ମାମଲାରେ ଫସିଛନ୍ତି ।
ଆନ୍ଧ୍ର ଏବଂ ଓଡିଶା ରାଜ୍ୟର ଆଶ୍ଚର୍ଯ୍ୟଜନକ ଭାବରେ ପ୍ରାୟ ୮୮% ମନ୍ତ୍ରୀଙ୍କ ବିରୋଧରେ ଅପରାଧିକ ମାମଲା ପଞ୍ଜିକୃତ ହୋଇଛି । ଯେଉଁଥିରେ ୫୬% ଗୁରୁତର ଅପରାଧିକ ଅଭିଯୋଗର ସମ୍ମୁଖୀନ ହେଉଛନ୍ତି। ୨୭ଟି ରାଜ୍ୟ ଏବଂ ତିନୋଟି କେନ୍ଦ୍ରଶାସିତ ଅଞ୍ଚଳର ମନ୍ତ୍ରୀଙ୍କ ଦ୍ୱାରା ଦାଖଲ କରାଯାଇଥିବା ଶପଥପତ୍ରର ବିଶ୍ଳେଷଣ ଉପରେ ଆଧାରିତ ଏହି ରିପୋର୍ଟ ରାଜନୈତିକ ଦୃଶ୍ୟପଟର ଏକ ଚିନ୍ତାଜନକ ଚିତ୍ର ସାମ୍ନାକୁ ଆଣିଛି ।
ରିପୋର୍ଟ ଅନୁଯାୟୀ, ଓଡ଼ିଶାରେ, ୧୬ ଜଣ ମନ୍ତ୍ରୀଙ୍କ ମଧ୍ୟରୁ ୧୪ ଜଣ ଅପରାଧିକ ମାମଲା ଏବଂ ନଅ ଜଣ ଗୁରୁତର ଅପରାଧିକ ଅଭିଯୋଗର ସମ୍ମୁଖୀନ ହେଉଛନ୍ତି। ସେଥିମଧ୍ୟରୁ ମନ୍ତ୍ରୀ କୃଷ୍ଣ ଚନ୍ଦ୍ର ମହାପାତ୍ରଙ୍କ ୧୫ଟି ମାମଲା ରହିଛି, ରବି ନାରାୟଣ ନାୟକ ୧୭, ଉପମୁଖ୍ୟମନ୍ତ୍ରୀ ପ୍ରଭାତି ପରିଡା ୯, ବିଭୂତି ଭୂଷଣ ଜେନା ୧୦, ଗୋକୁଳାନନ୍ଦ ମଲ୍ଲିକ ୬, ସୂର୍ଯ୍ୟବଂଶୀ ସୂରଜ ୫, ନିତ୍ୟାନନ୍ଦ ଗଣ୍ଡ ୪, କୃଷ୍ଣ ଚନ୍ଦ୍ର ପାତ୍ର ୩, ସମ୍ପଦ ଚରଣ ସ୍ବାଇଁ ୨, ସୁରେଶ ପୂଜାରୀ ୨, କନକ ବର୍ଦ୍ଧନ ସିଂଦେଓ ୨, ଗଣେଶ ରାମ ସିଂ ଖୁଣ୍ଟିଆ ୧, ମୁକେଶ ମହଲିଙ୍ଗ ୧, ଏବଂ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନାଁରେ ଗୋଟିଏ ମାମଲା ରହିଛି ।
ଏହି ରିପୋର୍ଟରେ ଓଡିଶାର ମନ୍ତ୍ରୀଙ୍କ ସମ୍ପତ୍ତିକୁ ମଧ୍ୟ ଦର୍ଶାଯାଇଛି। ଉପ-ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂ ଦେଓ ସବୁଠାରୁ ଧନୀ, ଯାହାଙ୍କର ମୋଟ ସମ୍ପତ୍ତି ୬୭.୩୦ କୋଟିରୁ ଅଧିକ । ମନ୍ତ୍ରୀ ପ୍ରଦୀପ ବଳ ସାମନ୍ତ ୧୭.୩ କୋଟିରୁ ଅଧିକ ସମ୍ପତ୍ତି ଥିବାବେଳେ ଯୋଗାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ରଙ୍କର ସମ୍ପତ୍ତି ୭.୬୬ କୋଟିରୁ ଅଧିକ ରହିଛି ।
ଆନ୍ଧ୍ରପ୍ରଦେଶରେ ୨୫ ଜଣ ମନ୍ତ୍ରୀଙ୍କ ମଧ୍ୟରୁ ୨୨ ଜଣ ଅପରାଧିକ ମାମଲାର ସମ୍ମୁଖୀନ ହୋଇଛନ୍ତି ଏବଂ ୧୪ ଜଣ ଗୁରୁତର ଅପରାଧରେ ଦୋଷୀ ସାବ୍ୟସ୍ତ ହୋଇଛନ୍ତି। ସାରା ଭାରତରେ, ଆନ୍ଧ୍ର ପ୍ରଦେଶ, ତାମିଲନାଡୁ, ବିହାର, ଓଡ଼ିଶା, ମହାରାଷ୍ଟ୍ର, କର୍ଣ୍ଣାଟକ, ପଞ୍ଜାବ, ତେଲେଙ୍ଗାନା, ହିମାଚଳ ପ୍ରଦେଶ, ଦିଲ୍ଲୀ ଏବଂ ପୁଦୁଚେରୀ ସମେତ ୧୧ଟି ରାଜ୍ୟର ମନ୍ତ୍ରୀଙ୍କ ବିରୁଦ୍ଧରେ ୬୦% ରୁ ଅଧିକ ଅପରାଧିକ ମାମଲା ରହିଛି। ଅପରପକ୍ଷରେ, ହରିୟାଣା, ଜମ୍ମୁ ଏବଂ କାଶ୍ମୀର, ନାଗାଲାଣ୍ଡ ଏବଂ ଉତ୍ତରାଖଣ୍ଡରେ କୌଣସି ମନ୍ତ୍ରୀଙ୍କ ବିରୁଦ୍ଧରେ ଅପରାଧିକ ମାମଲା ନାହିଁ। ଯାହା ଏବେ ରାଜନୈତିକ ନେତୃତ୍ୱର ସାଧୁତା ଏବଂ ଅପରାଧିକ ପୃଷ୍ଠଭୂମି ଥିବା ପ୍ରାର୍ଥୀଙ୍କ କଠୋର ଯାଞ୍ଚର ଆବଶ୍ୟକତା ଉପରେ ପ୍ରଶ୍ନ ଉଠାଇଛି ।