କାଲିଫର୍ନିଆ : ୱାଶିଂଟନରେ ନ୍ୟାସନାଲ୍ ଗାର୍ଡ ସଦସ୍ୟଙ୍କ ଉପରେ ଆକ୍ରମଣର ୩ ଦିନ ପରେ କାଲିଫର୍ନିଆର ଷ୍ଟକଟନ୍ରେ ଏକ ବଡ଼ ଗୁଳିକାଣ୍ଡ ଘଟିଛି । ଏଥିରେ ୪ ଜଣଙ୍କର ମୃତ୍ୟୁ ହୋଇଛି ଏବଂ ୧୦ ଜଣ ଆହତ ହୋଇଛନ୍ତି । ସୂଚନା ପାଇବା ପରେ କାଲିଫର୍ନିଆ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଆକ୍ରମଣକାରୀଙ୍କୁ ସନ୍ଧାନ କାର୍ଯ୍ୟ ଜାରି ରଖିଛି ।
ସୂଚନାନୁଯାୟୀ, ଜୋଆକୁଇନ୍ କାଉଣ୍ଟି ସେରିଫ୍ କାର୍ଯ୍ୟାଳୟ କହିଛି ଯେ, ଆହତମାନଙ୍କୁ ଡାକ୍ତରଖାନାକୁ ନିଆଯିବା ସହ କର୍ତ୍ତୃପକ୍ଷ ଘଟଣାର ତଦନ୍ତ କରୁଛନ୍ତି । ଅଧିକାରୀମାନେ ଆହତଙ୍କ ଅବସ୍ଥା ବିଷୟରେ କୌଣସି ସୂଚନା ଦେଇ ନାହାଁନ୍ତି । ଏଥିସହ ମାମଲା ତଦନ୍ତାଧୀନ ରହିଛି ବୋଲି ଅଧିକାରୀମାନେ କହିଛନ୍ତି । ଗୁଳି ଚଳାଇଥିବା ବ୍ୟକ୍ତି ବିଷୟରେ ଏପର୍ଯ୍ୟନ୍ତ କୌଣସି ସୂଚନା ପ୍ରକାଶ କରାଯାଇ ନାହିଁ । ପୋଲିସ ଘଟଣାସ୍ଥଳକୁ ଘେରାବନ୍ଦୀ କରିଛି।
ଘଟଣାଟି ଏକ ଜନ୍ମଦିନ ପାର୍ଟି ନିକଟରେ ଘଟିଥିବା ଜଣାପଡ଼ିଛି । ଯେଉଁଠାରେ ପିଲାମାନେ କିଛି ସମୟ ପୂର୍ବରୁ ସେମାନଙ୍କ ପରିବାର ସହିତ ଏକାଠି ହୋଇଥିଲେ। ଏହି ଭୟଙ୍କର ଗୁଳିକାଣ୍ଡ କାଲିଫର୍ନିଆର ଷ୍ଟକଟନରେ ଘଟିଛି । ଘଟଣାସ୍ଥଳରେ ବହୁ ସଂଖ୍ୟକ ଜରୁରୀକାଳୀନ କର୍ମଚାରୀ ଏବଂ ଆଇନ ପ୍ରବର୍ତ୍ତନ ସଂସ୍ଥା ପହଞ୍ଚିଛନ୍ତି । ଏହି ଆକ୍ରମଣରେ ଅତି କମରେ ୧୯ ଜଣ ଆହତ ହୋଇଛନ୍ତି । ଯେଉଁଥିରେ ୯ ଏବଂ ୧୨ ବର୍ଷର ପିଲା, ଜଣେ ୨୩ ବର୍ଷୀୟ ଯୁବକ ଏବଂ ଅନେକ ବୟସ୍କ ଲୋକ ରହିଥିବା ଜଣାପଡିଛି । ଏହା ବ୍ୟତୀତ ଏହି ଆକ୍ରମଣରେ ୪ ଜଣଙ୍କ ମୃତ୍ୟୁ ହୋଇଥିବା କର୍ତ୍ତୃପକ୍ଷ ନିଶ୍ଚିତ କରିଛନ୍ତି । ଏହାରି ମଧ୍ୟରେ କର୍ତ୍ତୁପକ୍ଷ ସତର୍କ ସୂଚନା ଜାରି କରିଛନ୍ତି । ଆଗକୁ ମୃତ୍ୟୁ ସଂଖ୍ୟା ବଢିପାରେ ବୋଲି ଅନୁମାନ କରାଯାଉଛି ।