ନୂଆଦିଲ୍ଲୀ: ଲୁଧିଆନାରେ ମେକାନିକ୍ ଉପକରଣ ତିଆରି କରୁଥିବା ଏକ ଫ୍ୟାକ୍ଟ୍ରିରେ ହଠାତ୍ ବିଷାକ୍ତ ଗ୍ୟାସ ଲିକ୍ ହୋଇଥିଲା । ଯାହା ଫଳରେ ସଙ୍ଗେ ସଙ୍ଗେ ବ୍ୟାପକ ଆତଙ୍କ ଖେଳିଗଲା । ଶ୍ୱାସରୁଦ୍ଧ ହୋଇ ଜଣେ ବାପା ଏବଂ ପୁଅଙ୍କ ମୃତ୍ୟୁ ଘଟିଥିବା ବେଳେ ଆଉ ଜଣେ ବ୍ୟକ୍ତି ମଧ୍ୟ ପ୍ରାଣ ହରାଇଛନ୍ତି । ହେଲେ, ତାଙ୍କ ପରିଚୟ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ଏଥିରେ ଅନେକ ଶ୍ରମିକ ଗୁରୁତର ଭାବରେ ଆକ୍ରାନ୍ତ ମଧ୍ୟ ହୋଇଛନ୍ତି । କେତେକ ବେହୋସ ହୋଇ ପଡ଼ିଛନ୍ତି ଏବଂ ଅନ୍ୟ କେତେକଙ୍କ ଅବସ୍ଥା ଗୁରୁତର ଥିବା ଜଣାପଡ଼ିଛି ।
ପ୍ରତ୍ୟକ୍ଷଦର୍ଶୀଙ୍କ ଅନୁଯାୟୀ, ଫ୍ୟାକ୍ଟ୍ରିରେ କାମ ସ୍ୱାଭାବିକ ଭାବରେ ଚାଲିଥିଲା, ହଠାତ୍ ଏକ ପାଇପଲାଇନ କିମ୍ବା ସିଲିଣ୍ଡରରୁ ଗ୍ୟାସ ଲିକ୍ ହେବା ଆରମ୍ଭ ହେଲା । କିଛି ମିନିଟ୍ ମଧ୍ୟରେ ବିଷାକ୍ତ ଗ୍ୟାସ ସମଗ୍ର ଫ୍ୟାକ୍ଟ୍ରିରେ ବ୍ୟାପିଗଲା । ଗ୍ୟାସର ପ୍ରଭାବ ଏତେ ଜୋର ଥିଲା ଯେ ସେଠାରେ ଉପସ୍ଥିତ ଶ୍ରମିକମାନେ ପଳାଇଯିବାକୁ ସୁଯୋଗ ପାଇନଥିଲେ । ଶ୍ୱାସରୁଦ୍ଧ ହେବା ଏବଂ ଆଖିରେ ପ୍ରବଳ ପୋଡ଼ାଜଳା ହୋଇଥିଲା । ଯାହା ଯୋଗୁଁ ଅନେକ ଶ୍ରମିକ କାରଖାନା ଭିତରେ ତଳେ ପଡ଼ିଗଲେ ।
ଦୁର୍ଘଟଣାର ଖବର ବ୍ୟାପିବା ମାତ୍ରେ ଅଞ୍ଚଳରେ ଆତଙ୍କ ଖେଳିଗଲା । ଭିତରେ ଥିବା ଲୋକଙ୍କୁ ଉଦ୍ଧାର କରିବା ପାଇଁ ଚେଷ୍ଟା କରାଯାଇଥିଲା । ଯେଉଁ ବାପା ଏବଂ ପୁଅଙ୍କର ମୃତ୍ୟୁ ହୋଇଥିଲା ତାଙ୍କ ନାମ ହେଉଛି- ମାନ ସିଂହ (ବାପା) ଏବଂ ପୁଅ ଅମିତ । ସେମାନେ ମେସିନ ତଳୁ ମାଟି ସଂଗ୍ରହ କରି ଟ୍ରଲିରେ ଲୋଡ୍ କରିବାକୁ ଯାଇଥିଲେ ।
ଏହି ସମୟରେ, ଉଭୟ ଗ୍ୟାସ ଲିକ୍ ଦ୍ୱାରା ପ୍ରଭାବିତ ହୋଇଥିଲେ । ପରିବାର ଅନୁଯାୟୀ, ମାନ ସିଂହ ଏବଂ ଅମିତ ଉଭୟ ପରିବାରର ରୋଜଗାରକ୍ଷମ ଥିଲେ । ଅମିତଙ୍କର ଦୁଇ ଭଉଣୀ ଏବଂ ଗୋଟିଏ ସାନ ଭାଇ ଅଛି । ଅମିତ ବିବାହିତ ଥିଲେ । ତାଙ୍କ ସ୍ତ୍ରୀ ଜଣେ ଗୃହିଣୀ ଏବଂ ସେମାନଙ୍କର ଗୋଟିଏ ବର୍ଷର ଝିଅ ମଧ୍ୟ ଅଛି ।
ମୃତ ମାନ ସିଂହଙ୍କ ମାଆ ରେଣୁ କହିଛନ୍ତି ଯେ ତାଙ୍କ ସ୍ୱାମୀ ଏବଂ ପୁଅ ଉଭୟ ରାତିରେ କାମକୁ ଯାଇଥିଲେ । ସେମାନେ ସବୁଦିନ ରାତି ଦୁଇଟା କିମ୍ବା ତିନିଟାରେ ଫେରି ଆସୁଥିଲେ । ଆମେ ବାରମ୍ବାର ଫୋନ୍ କଲୁ, କିନ୍ତୁ କେହି ଉତ୍ତର ଦେଲେ ନାହିଁ । ଆମେ ସକାଳେ କାରଖାନାରେ ପହଞ୍ଚିଲୁ । ଆମେ ପ୍ରଥମେ କାରଖାନାକୁ ଯାଇ ସେଠାରେ ଏକ ଟ୍ରାକ୍ଟର ଠିଆ ହୋଇଥିବା ଦେଖିଲୁ । ସେମାନେ ଆମକୁ କହିଲେ ଯେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ।
ସେମାନେ ଆମକୁ ଥରେ ବି ଫୋନ୍ କରିନଥିଲେ କିମ୍ବା ଦୁର୍ଘଟଣା ବିଷୟରେ କୌଣସି ସୂଚନା ବି ଦେଇନଥିଲେ । ଯେତେବେଳେ ଆମେ ହସ୍ପିଟାଲରେ ପହଞ୍ଚିଲୁ, ଆମେ ଜାଣିବାକୁ ପାଇଲୁ ଯେ ମୋ ସ୍ୱାମୀ ଏବଂ ପୁଅର ମୃତ୍ୟୁ ହୋଇଛି । ସେମାନେ କହିଥିଲେ ଯେ ମୋଟ ତିନି ଜଣଙ୍କର ମୃତ୍ୟୁ ହୋଇଛି । ରେଣୁ କହିଲେ, ମୋ ସ୍ୱାମୀଙ୍କ ନାମ ମାନ ସିଂହ ଆଉ ମୋ ପୁଅର ନାମ ହେଉଛି ଅମିତ । ତୃତୀୟ ବ୍ୟକ୍ତିଙ୍କ ନାମ ଅଜଣା । ଏକଥା ମଧ୍ୟ କହିଛନ୍ତି ଯେ, କାରଖାନା ମାଲିକ ଏପର୍ଯ୍ୟନ୍ତ ସେମାନଙ୍କ ଭଲମନ୍ଦ ପଚାରିବାକୁ ଆସିନାହାଁନ୍ତି ।
