ସୁନ୍ଦରଗଡ଼: ଭଉଣୀର ବିବାହକୁ ମାତ୍ର କିଛି ଦିନ ବାକି ଥିବାବେଳେ ଚାଲିଗଲା ଭାଇର ଜୀବନ। ସୁନ୍ଦରଗଡ଼ ଜିଲ୍ଲା ତଲସରା ଥାନା ଅନ୍ତର୍ଗତ ମୟାବାହାଲ ଦେହୁରୀପଡ଼ାରେ ଶୁକ୍ରବାର ରାତିରେ ଏଭଳି ଏକ ନିର୍ମମ ହତ୍ୟାକାଣ୍ଡ ଘଟିଯାଇଛି। ସ୍ୱାମୀ-ସ୍ତ୍ରୀଙ୍କ ଝଗଡ଼ା ସମାଧାନ କରିବାକୁ ଯାଇ ପଡ଼ୋଶୀ ଯୁବକ ହେମନ୍ତ ନାଏକ (୨୬)ଙ୍କର ଗଲା ଜୀବନ। ଏହି ଘଟଣାରେ ପୋଲିସ ମୁଖ୍ୟ ଅଭିଯୁକ୍ତ କନ୍ଦର୍ପ ଦେହୁରୀଙ୍କୁ ଗିରଫ କରିଛି।
ସୂଚନା ଅନୁଯାୟୀ, ଗତ ଶୁକ୍ରବାର ଗ୍ରାମରେ ଡେମୂଳ ପୂଜା ଅନୁଷ୍ଠିତ ହୋଇଥିଲା, ଯେଉଁଥିରେ ଅଭିଯୁକ୍ତ କନ୍ଦର୍ପ ଦେହୁରୀ ଗ୍ରାମର ପୂଜକ ଭାବେ ଦାୟିତ୍ୱ ତୁଲାଉଥିଲେ। ପୂଜା ପରେ କୌଣସି କଥାକୁ କେନ୍ଦ୍ର କରି କନ୍ଦର୍ପ ଓ ତାଙ୍କ ସ୍ତ୍ରୀଙ୍କ ମଧ୍ୟରେ ଝଗଡ଼ା ହୋଇଥିଲା। ଭୟଭୀତ ହୋଇ କନ୍ଦର୍ପଙ୍କ ସ୍ତ୍ରୀ ପଡ଼ୋଶୀ ହେମନ୍ତଙ୍କ ଘରକୁ ଦୌଡ଼ି ପଳାଇଥିଲେ। କନ୍ଦର୍ପ ମଧ୍ୟ ତାଙ୍କ ପଛେ ପଛେ ସେଠାରେ ପହଞ୍ଚିଥିଲେ।
ସେଠାରେ ହେମନ୍ତ ଓ ତାଙ୍କ ପରିବାର ଲୋକେ ସ୍ୱାମୀ-ସ୍ତ୍ରୀଙ୍କ ଗଣ୍ଡଗୋଳ ଶାନ୍ତ କରିବାକୁ ଚେଷ୍ଟା କରୁଥିବା ବେଳେ କନ୍ଦର୍ପ ଉତ୍ତ୍ୟକ୍ତ ହୋଇ ହେମନ୍ତଙ୍କ ଭଉଣୀଙ୍କୁ ହାତ ଉଠାଇଥିଲେ। ଏହାକୁ ନେଇ ହେମନ୍ତ ଓ କନ୍ଦର୍ପଙ୍କ ମଧ୍ୟରେ ଠେଲାପେଲା ହୋଇଥିଲା। ପରେ ଗ୍ରାମର କିଛି ଯୁବକ କନ୍ଦର୍ପଙ୍କୁ ବୁଝାସୁଝା କରି ତାଙ୍କ ଘରକୁ ଛାଡ଼ି ଆସିଥିଲେ।
ଅଭିଯୋଗ ମୁତାବକ, ରାତି ପ୍ରାୟ ୧୦:୩୦ ରୁ ୧୧:୦୦ ମଧ୍ୟରେ ହେମନ୍ତ ନିଜ ଘର ବାହାରେ ଏକାକୀ ବସିଥିବା ବେଳେ କନ୍ଦର୍ପ ଏକ ଧାରୁଆ ଅସ୍ତ୍ର ଆଣି ହେମନ୍ତଙ୍କ ମୁଣ୍ଡକୁ ପ୍ରହାର କରିଥିଲେ। ଜୋରଦାର ଆଘାତ ଯୋଗୁଁ ଘଟଣାସ୍ଥଳରେ ହିଁ ହେମନ୍ତଙ୍କ ମୃତ୍ୟୁ ହୋଇଥିଲା। ମୃତ ହେମନ୍ତଙ୍କ ବାପାଙ୍କର ଗତ ବର୍ଷ ମୃତ୍ୟୁ ହୋଇଥିବା ବେଳେ ଆସନ୍ତା ଜୁଲାଇ ୬ ତାରିଖରେ ତାଙ୍କ ଭଉଣୀଙ୍କ ବାହାଘର ହେବାର ଥିଲା। ଏହାରି ଭିତରେ ଏଭଳି ଅଘଟଣ ଘଟିଯାଇଛି। ଖବର ପାଇ ସଦର ଏସଡିପିଓ ଏବଂ ତଲସରା ଥାନା ଅଧିକାରୀ ଅଭିଯୁକ୍ତକୁ ଗିରଫ କରିଛନ୍ତି।
