ଭୁବନେଶ୍ୱର : ମହାନଦୀରେ ଆଉ ବଢ଼ିବନି ପାଣି । ଟଳୁଛି ବଡ଼ ବନ୍ୟା ଆଶଙ୍କା । ତେବେ ତଳମୁଣ୍ଡରେ ଜଳବନ୍ଦି ସ୍ଥିତି ଦେଖାଯିବ । ଜଳ ସଂପଦ ବିଭାଗ ସର୍ବୋଚ୍ଚ ଯନ୍ତ୍ରୀଙ୍କ ସୂଚନା, ଦୁଇ ଦିନ ତଳେ ଥିଲା ସର୍ବାଧିକ ବନ୍ୟା । ଆଉ ପାଣି ବଢ଼ିବାର ଆଶଂକା ନାହିଁ । ହୀରାକୁଦରେ ଏବେ ୬୨୫ ଫୁଟ ପାଣି ଅଛି । ଉପରମୁଣ୍ଡରୁ ପାଣି କମିଛି । ଗତକାଲି ୨୨ ଗେଟ ଖୋଲା ଥିଲା । ଆସନ୍ତା ଦୁଇ ଦିନ ଯାଏଁ କୌଣସି ଗେଟ ବନ୍ଦ ହେବନି ।
ଏହି ୨୨ ଗେଟ୍ ଦେଇ ବନ୍ୟା ଜଳ ନିଷ୍କାସନ ହେବ । ଆସନ୍ତା ତିନି ତାରିଖରେ ୬୧୮ ଫୁଟକୁ ଖସିବ ହୀରାକୁଦ ଜଳସ୍ତର । ମୁଣ୍ଡଳୀରେ ଆଦୌ ବନ୍ୟା ନଥିବା କହିଛନ୍ତି ଜଳ ସଂପଦ ବିଭାଗ ସର୍ବୋଚ୍ଚ ଯନ୍ତ୍ରୀ । ତେବେ ପୁରୀ, ଖୋର୍ଦ୍ଧା, ଜଗତସିଂହପୁର ଓ କେନ୍ଦ୍ରାପଡ଼ାରେ ଜଳବନ୍ଦି ପରିସ୍ଥିତି ଦେଖାଯିବ ।
ବର୍ଷା ନ ହେବା ଯାଏଁ ମହାନଦୀକୁ ଆଉ ବନ୍ୟା ନାହିଁ । ହୀରାକୁଦ ଜଳଭଣ୍ଡାରକୁ ୩ ଦିନ ଭିତରେ SOP ଅନୁସାରେ ଖାଲି କରାଯିବ । ସେହିପରି ବୈତରଣୀ ସମେତ ଅନ୍ୟ ସବୁ ନଦୀରେ ଜଳସ୍ତର କମୁଛି । ସବୁ ନଦୀ ବିପଦ ସଂକେତ ତଳକୁ ଆସିଲାଣି। ବ୍ରାହ୍ମଣୀରେ ବନ୍ୟା ହେବନି ବୋଲି ସର୍ବୋଚ୍ଚ ଯନ୍ତ୍ରୀ ସୂଚନା ଦେଇଛନ୍ତି ।
