ଭୁବନେଶ୍ୱର: ପୋଲିସ ବାବୁଙ୍କ ପାଇଁ କଡ଼ା ନିର୍ଦ୍ଦେଶ। ଏଣିକି ଥାନାରେ ଇଭି ଗାଡି ଚାର୍ଜିଂ କରିପାରିବେ ନାହିଁ। ଥାନାରେ ବିଦ୍ୟୁତ ବ୍ୟବହାର ଉପରେ ଲାଗିଲା କଟକଣା। ଓଡ଼ିଶା ପୋଲିସ ପକ୍ଷରୁ ଅଫିସ୍ ପରିସରରେ ବିଦ୍ୟୁତ ବ୍ୟବହାରକୁ ନେଇ କଡ଼ା ନିର୍ଦ୍ଦେଶ ଜାରି କରାଯାଇଛି। ଓଡ଼ିଶା ପୋଲିସ ମୁଖ୍ୟାଳୟ ପକ୍ଷରୁ ରାଜ୍ୟର ସମସ୍ତ ପୋଲିସ ଜିଲ୍ଲା, ରେଞ୍ଜ, ପ୍ରତିଷ୍ଠାନ ଏବଂ ବାଟାଲିୟନକୁ ବିଦ୍ୟୁତ୍ ଶକ୍ତିର ଅପବ୍ୟବହାର ରୋକିବା ପାଇଁ ଏହି କଡ଼ା ନିର୍ଦ୍ଦେଶନାମା ଜାରି କରାଯାଇଛି।
ଅଫିସ୍ ପରିସରରୁ ଆବାସିକ କ୍ୱାଟର, ବାରାକ୍ ଏବଂ ବ୍ୟକ୍ତିଗତ ବୈଦ୍ୟୁତିକ ଗାଡ଼ି (EV) ଚାର୍ଜିଂ ପାଇଁ ହେଉଥିବା ଗେଆଇନ ବୈଦ୍ୟୁତିକ ସଂଯୋଗକୁ ତୁରନ୍ତ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି। କେତେକ ସ୍ଥାନରେ ପୋଲିସ କାର୍ଯ୍ୟାଳୟ ପାଇଁ ଆସୁଥିବା ମୁଖ୍ୟ ବିଦ୍ୟୁତ ଲାଇନରୁ ବେଆଇନ ଭାବେ ଆବାସିକ କ୍ୱାର୍ଟର ଏବଂ ବ୍ୟାରାକକୁ ସଂଯୋଗ ଦିଆଯାଉଥିବା ଅଭିଯୋଗ ପରେ ଏହି ଭଳି କାର୍ଯ୍ୟନୁଷ୍ଠାନ ନିଆଯାଇଛି।
ପୋଲିସ ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଛି ଯେ, ସମସ୍ତ ପୋଲିସ କାର୍ଯ୍ୟାଳୟ ମୁଖ୍ୟମାନେ ନିଜ ଅଧୀନସ୍ଥ ଅଞ୍ଚଳରେ ତୁରନ୍ତ ଏକ ଯାଞ୍ଚ ଅଭିଯାନ ଆରମ୍ଭ କରିବେ। ଯଦି କୌଣସି ସ୍ଥାନରେ ଅଫିସ୍ ଲାଇନରୁ କ୍ୱାର୍ଟରକୁ ବେଆଇନ ସଂଯୋଗ କିମ୍ବା ଅନଧିକୃତ ଭାବେ ବିଦ୍ୟୁତ ଦୁରୁପଯୋଗ ହେଉଥିବା ନଜରକୁ ଆସେ, ତେବେ ତୁରନ୍ତ ସେହି ସଂଯୋଗକୁ ବିଚ୍ଛିନ୍ନ କରାଯିବ। ଏଥି ସହିତ ଏହି ନିୟମକୁ ଅମାନ୍ୟ କରୁଥିବା ସମ୍ପୃକ୍ତ କର୍ମଚାରୀଙ୍କ ବିରୋଧରେ ବିଭାଗୀୟ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ନିର୍ଦ୍ଦେଶନାମାରେ ଦର୍ଶାଯାଇଛି।
