ଭୁବନେଶ୍ୱର,୧୮ା୭: ଓଡ଼ିଶା ଖଣି ବିଭାଗ ଯାଜପୁର ଜିଲାର ଧର୍ମଶାଳା ଅଞ୍ଚଳରେ ଥିବା ଖଣି ଏବଂ ପଥର ଖଣି ଉପରେ ବ୍ୟାପକ ଚଢାଉ କରିଛି। ଲୁଣିବାର, ଚଢେଇଧରା ଏବଂ ଡଙ୍କାରୀ ଖଣି ଅଞ୍ଚଳରେ ଏହି ଚଢ଼ାଉ କରାଯାଇଥିଲା।
ପୂର୍ବ ବିଜେଡି ସରକାର ସମୟରେ ଖଣି କାରବାରରେ ଅନିୟମିତତା ହୋଇଥିବା ଧର୍ମଶାଳା ବିଧାୟକ ହିମାଂଶୁ ସାହୁଙ୍କ ଅଭିଯୋଗ ପରେ ଏହି ଚଢ଼ାଉ କରାଯାଇଛି। ବେଆଇନ କାର୍ଯ୍ୟକଳାପରେ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବିଧାୟକ କହିଛନ୍ତି।
“ଏହାପୂର୍ବରୁ ପୂର୍ବ ସରକାରଙ୍କ କାର୍ଯ୍ୟକାଳ ମଧ୍ୟରେ ଅନିୟମିତତା ଅଭିଯୋଗ ଆସିଥିଲା। ବିସ୍ତୃତ ଅନୁସନ୍ଧାନ ପାଇଁ ଆମେ ମାଇନର୍ ମିନେରାଲ୍ସର ନିର୍ଦ୍ଦେଶକ, କଲେକ୍ଟର, ରାଜସ୍ୱ ବିଭାଗକୁ ଲେଖିଥିଲୁ ବୋଲି ସାହୁ କହିଛନ୍ତି।
ଖଣି ବିଭାଗ, ଯୁଗ୍ମ ନିର୍ଦ୍ଦେଶକ ଏନ.ଏନ ସିଂହଦେଓ କହିଛନ୍ତି ଯେ, ବିଧାୟକଙ୍କ ଅଭିଯୋଗ ପରେ ଆମେ ଅଧିକ ଅନୁସନ୍ଧାନ ପାଇଁ ଆସିଛୁ। ଅତ୍ୟଧିକ ଖଣି ଖନନ ହୋଇଛି କି ନାହିଁ ଏବଂ ଆଇନ ପାଳନ କରାଯାଇଛି କି ନାହିଁ ତାହା ଅନୁସନ୍ଧାନ କରାଯିବ। ପରେ ସର୍ଭେ ଏବଂ ଅନ୍ୟାନ୍ୟ ପଦକ୍ଷେପ ନିଆଯିବ। ”
