ବେଜିଂ : ବୈଦେଶିକ ସଚିବ ବିକ୍ରମ ମିସ୍ରି ସୋମବାର ଚୀନ୍ ବୈଦେଶିକ ମନ୍ତ୍ରୀ ୱାଙ୍ଗ୍ ୟିଙ୍କୁ ଭେଟି ଦ୍ୱିପାକ୍ଷିକ ସ୍ୱାର୍ଥ ପ୍ରସଙ୍ଗରେ ଆଲୋଚନା କରିଛନ୍ତି। ବୈଦେଶିକ ମନ୍ତ୍ରୀ ହେବା ବ୍ୟତୀତ ୱାଙ୍ଗ ଶାସକ କମ୍ୟୁନିଷ୍ଟ ପାର୍ଟିର ଶକ୍ତିଶାଳୀ ରାଜନୈତିକ ବ୍ୟୁରୋର ସଦସ୍ୟ ଏବଂ ଭାରତ-ଚୀନ୍ ସୀମା ବ୍ୟବସ୍ଥା ପାଇଁ ଚୀନର ସ୍ୱତନ୍ତ୍ର ପ୍ରତିନିଧି।
ଗତ ମାସରେ ସ୍ବତନ୍ତ୍ର ପ୍ରତିନିଧି ବ୍ୟବସ୍ଥା ଅଧୀନରେ ୱାଙ୍ଗ୍ ଓ ଭାରତର ଏନଏସଏ ଅଜିତ ଡୋଭାଲଙ୍କ ମଧ୍ୟରେ ଆଲୋଚନା ପରେ ମିସ୍ରିଙ୍କ ଚୀନ୍ ଗସ୍ତ ହୋଇଛି। ମିସ୍ରିଙ୍କ ସହ ସାକ୍ଷାତରେ ୱାଙ୍ଗ ଦର୍ଶାଇଛନ୍ତି ଯେ ଗତବର୍ଷ ରୁଷିଆର କାଜାନରେ ରାଷ୍ଟ୍ରପତି ସି ଜିନପିଙ୍ଗ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମଧ୍ୟରେ ହୋଇଥିବା ବୈଠକ ପରଠାରୁ ଉଭୟ ପକ୍ଷ ଦୁଇ ଦେଶର ନେତାଙ୍କ ମଧ୍ୟରେ ହୋଇଥିବା ଗୁରୁତ୍ୱପୂର୍ଣ୍ଣ ସହମତିକୁ ଆନ୍ତରିକତାର ସହ କାର୍ଯ୍ୟକାରୀ କରିଛନ୍ତି ଏବଂ ସବୁ ସ୍ତରରେ ସକ୍ରିୟ ଯୋଗାଯୋଗ ବଜାୟ ରଖିଛନ୍ତି। ଚୀନ-ଭାରତ ସମ୍ପର୍କରେ ଉନ୍ନତି ଆଣିବା ପ୍ରକ୍ରିୟାକୁ ଆହୁରି ତ୍ୱରାନ୍ୱିତ କରାଯାଇଛି ।
ଚୀନ୍ ବୈଦେଶିକ ମନ୍ତ୍ରୀ କହିଛନ୍ତି ଯେ ଭାରତ ଓ ଚୀନ୍ ମଧ୍ୟରେ ସମ୍ପର୍କର ଉନ୍ନତି ଏବଂ ବିକାଶ ଉଭୟ ଦେଶ ଏବଂ ସେମାନଙ୍କ ନାଗରିକଙ୍କ ସ୍ୱାର୍ଥକୁ ପୂରଣ କରୁଛି। ଏହା ସହିତ ଏହା ବିଶ୍ୱର ଦକ୍ଷିଣ ଦେଶମାନଙ୍କର ବୈଧ ଅଧିକାର ଏବଂ ସ୍ୱାର୍ଥରକ୍ଷାରେ ସହାୟକ ହେବ । ଭାରତ ଏବଂ ଚୀନ୍ ମଧ୍ୟରେ ଉତ୍ତମ ସମ୍ପର୍କ ଏସିଆ ଏବଂ ବିଶ୍ୱର ଦୁଇଟି ପ୍ରାଚୀନ ସଭ୍ୟତାର ଶାନ୍ତି, ସ୍ଥିରତା, ବିକାଶ ଏବଂ ସମୃଦ୍ଧିରେ ସହାୟକ ହେବ ବୋଲି ସେ କହିଥିଲେ।
