ମାଲକାନଗିରି : ଜିଲ୍ଲା ପଡିଆ ବ୍ଳକ ସଦର ମହକୁମାରେ ବ୍ଲକସ୍ତରୀୟ ଭୀମଭୋଇ ଭିନ୍ନକ୍ଷମ ସାମର୍ଥ୍ୟ ଶିବିର ଅନୁଷ୍ଠିତ ହୋଇଯାଇଛି । ଏଥିପାଇଁ ପଡିଆ ବ୍ଲକ ସଦର ମହକୁମାରେ ଥିବା ଅନୂସୁଚିତ ଜାତି ଓ ଜନଜାତି ଉଚ୍ଚ ବିଦ୍ୟାଳୟରେ ଏକ କ୍ୟାମ୍ପ କରାଯାଇ ପଡିଆ ବ୍ଲକର ଆଠଟି ପଞ୍ଚାୟତରୁ ଆସିଥିବା ହିତାଧିକାରୀଙ୍କ ଶାରୀରିକ ମାପ କରାଯାଇଥିଲା । ଏହି କ୍ୟାମ୍ପରେ ଶ୍ରବଣ ଜନିତ ୧୫୭ ଜଣ, ମାନସିକ ଅସୁସ୍ଥତା ଜନିତ ୮୮ ଜଣ, ଦୃଷ୍ଟି ବାଧିତା ଜନିତ ୧୨୯ ଜଣ, ସଞ୍ଚାଳନଶୀଳ ଜନିତ ୨୪୬ ଜଣ ଓ ଅନ୍ୟାନ୍ୟ ବିଭାଗର ୬୬ ଜଣ ଙ୍କୁ ମିଶାଇ ମୋଟ ୬୮୬ ଜଣ ହିତାଧିକାରୀ ସ୍ୱାସ୍ଥ୍ୟ ମାପ କରାଇ ଭିନ୍ନକ୍ଷମତା ନେଇ ଆବେଦନ କରିଥିଲେ। ଏହି ଅବସରରେ ଆୟୋଯିତ ଉଦଘାଟନୀ କାର୍ଯ୍ୟକ୍ରମରେ ପଡିଆ ଗୋଷ୍ଠୀ ଉନ୍ନୟନ ଅଧିକାରୀ ଅଶ୍ୱିନୀ କୁମାର ମହାପାତ୍ର, ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ପଡିଆ ଜିଲ୍ଲା ପରିଷଦ ସଭ୍ୟା ସୁରଭୀ ଭୌମିକ, ବିଧାୟକଙ୍କ ପ୍ରତିନିଧି ମନ ଦୀପଙ୍କର ରାୟ, ସମନ୍ୱିତ ଶିଶୁ ବିକାଶ ଅଧୀକାରିଣୀ ରିନାରାଣୀ ରାଉତ ପ୍ରମୁଖ ଉପସ୍ଥିତ ଥିଲେ। ଏହି ଶିବିର ଆୟୋଜନ ପାଇଁ ବିଭିନ୍ନ ପଞ୍ଚାୟତରୁ ପିଇଓ ଓ ଜନ ପ୍ରତିନିଧି ମାନେ ହିତାଧିକାରୀଙ୍କୁ ଉତ୍ସାହିତ କରିବା ସହ ସହଯୋଗ କରିଥିଲେ।