ନୂଆଦିଲ୍ଲୀ: ଏଥର ଜି-୭ ସମ୍ମିଳନୀରେ ଅଂଶଗ୍ରହଣ ନକରିପାରନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। କାନାଡାରେ ହେବାକୁ ଥିବା ଏହି ସମ୍ମିଳନୀରେ ମୋଦୀଙ୍କ ଭାଗ ନେବାର ସମ୍ଭାବନା ଖୁବ୍ କମ୍। ଜି-୭ ହେଉଛି ବିଶ୍ୱର ସର୍ବାଧିକ ଶିଳ୍ପୋନ୍ନତ ଅର୍ଥନୀତି। ଯାହାକି ଫ୍ରାନ୍ସ, ଜର୍ମାନୀ, ଇଟାଲୀ, ଯୁକ୍ତରାଜ୍ୟ, ଜାପାନ, ଯୁକ୍ତରାଷ୍ଟ୍ର ଏବଂ କାନାଡାର ଏକ ଅନୌପଚାରିକ ଗୋଷ୍ଠୀ।
ଏଥିରେ ୟୁରୋପୀୟ ସଂଘ (ଇୟୁ), ଆଇଏମ୍ଏଫ୍, ବିଶ୍ବ ବ୍ୟାଙ୍କ୍ ଏବଂ ଜାତିସଂଘ ମଧ୍ୟ ଯୋଗ ଦେଇଛନ୍ତି। ଦକ୍ଷିଣ ଆଫ୍ରିକା, ୟୁକ୍ରେନ ଏବଂ ଅଷ୍ଟ୍ରେଲିଆ କାନାଡାରୁ ନିମନ୍ତ୍ରଣ ଗ୍ରହଣ କରିଥିବା ଜଣାପଡ଼ିଛି। କିନ୍ତୁ ପ୍ରଧାନମନ୍ତ୍ରୀ ମୋଦୀଙ୍କ ଗସ୍ତକୁ ନେଇ ଅନିଶ୍ଚିତତା ରହିଛି।
ଜୁନ୍ ୧୫-୧୭ ପର୍ଯ୍ୟନ୍ତ କାନାଡା ଦ୍ୱାରା ଆୟୋଜିତ ହେବାକୁ ଥିବା ଏହି ଶିଖର ସମ୍ମିଳନୀ ପାଇଁ ଭାରତକୁ ଏପର୍ଯ୍ୟନ୍ତ କୌଣସି ସରକାରୀ ନିମନ୍ତ୍ରଣ ମିଳିନାହିଁ।
ସୂତ୍ରରୁ ଜାଣିବାକୁ ମିଳିଛି ଯେ ଯଦି ପ୍ରଧାନମନ୍ତ୍ରୀ ମୋଦି ଭବିଷ୍ୟତରେ କାନାଡା ଯାତ୍ରା କରନ୍ତି, ତେବେ ସୁରକ୍ଷା ସମସ୍ୟାର ସମାଧାନ କରିବାକୁ ପଡିବ।
ଗତ ମାସରେ, ବୈଦେଶିକ ବ୍ୟାପାର ମନ୍ତ୍ରଣାଳୟ ଦୁଇଥର କହିଥିଲା ଯେ ଜି-୭ ଶିଖର ସମ୍ମିଳନୀ ପାଇଁ ପ୍ରଧାନମନ୍ତ୍ରୀ ମୋଦୀଙ୍କ କାନାଡା ଗସ୍ତ ବିଷୟରେ “କୌଣସି ସୂଚନା ନାହିଁ”।