ନୂଆଦିଲ୍ଲୀ: ଭାରତ ଏକ ବଡ଼ ସଫଳତା ହାସଲ କରି ଇଣ୍ଟିଗ୍ରେଟେଡ୍ ଏୟାର ଡିଫେନ୍ସ ୱେପନ୍ ସିଷ୍ଟମ୍ (IADWS)ର ସଫଳ ପରୀକ୍ଷଣ କରିଛି । ଏହି ପରୀକ୍ଷଣ ଭାରତର ଏୟାର ଡିଫେନ୍ସ ସିଷ୍ଟମ୍ ଓ କ୍ଷମତାକୁ ଆଉ ପାଦେ ଆଗେଇ ନେଇଛି । ବିଶେଷଜ୍ଞଙ୍କ ମତରେ, ଏହି ସଫଳତା ଭାରତକୁ ସେହି କିଛି ବଛା ବଛା ଦେଶଙ୍କ ଶ୍ରେଣୀରେ ସାମିଲ କରିଛି, ଯେଉଁମାନଙ୍କ ପାଖରେ ଆଧୁନିକ, ସ୍ୱଦେଶୀ ଏବଂ ବହୁ-ସ୍ତରୀୟ ବାୟୁ ପ୍ରତିରକ୍ଷା ପ୍ରଣାଳୀ ରହିଛି । IADWS ଏକ ବହୁ-ସ୍ତରୀୟ ବାୟୁ ପ୍ରତିରକ୍ଷା ପ୍ରଣାଳୀ, ଯେଉଁଥିରେ ସମ୍ପୂର୍ଣ୍ଣ ସ୍ୱଦେଶୀ କ୍ୱିକ୍ ରିଆକ୍ସନ୍ ସର୍ଫେସ୍ ଟୁ ଏୟାର ମିସାଇଲ୍, ଆଡଭାନ୍ସଡ୍ ଭେରି ସର୍ଟ ରେଞ୍ଜ୍ ଏୟାର ଡିଫେନ୍ସ ସିଷ୍ଟମ୍ ମିସାଇଲ୍ ଏବଂ ଏକ ଉଚ୍ଚ-ଶକ୍ତି ସମ୍ପନ୍ନ ଲେଜର-ଆଧାରିତ ନିର୍ଦ୍ଦେଶିତ ଶକ୍ତି ଅସ୍ତ୍ର ସାମିଲ ଅଛି ।
ଏହି ଗୁରୁତ୍ୱପୂର୍ଣ୍ଣ ପରୀକ୍ଷଣ ପରେ ରକ୍ଷା ମନ୍ତ୍ରୀ ରାଜନାଥ ସିଂହ କହିଛନ୍ତି, “ମୁଁ ଡିଆରଡିଓ, ଭାରତୀୟ ସଶସ୍ତ୍ର ବଳ ଏବଂ ଶିଳ୍ପ ଜଗତକୁ IADWSର ସଫଳ ବିକାଶ ପାଇଁ ଶୁଭେଚ୍ଛା ଜଣାଉଛି । ଏହି ଅନନ୍ୟ ଉଡ଼ାଣ ପରୀକ୍ଷଣ ଆମ ଦେଶର ବହୁ-ସ୍ତରୀୟ ଏୟାର ଡିଫେନ୍ସ କ୍ଷମତାକୁ ପ୍ରତିଷ୍ଠା କରୁଛି । ଏହା ଗୁରୁତ୍ୱପୂର୍ଣ୍ଣ ସ୍ଥାନଗୁଡ଼ିକର ସୁରକ୍ଷାକୁ ମଜଭୁତ କରିବ ଏବଂ ଦେଶକୁ ଶତ୍ରୁର ଆକାଶୀୟ ବିପଦ ବିରୁଦ୍ଧରେ ଅଧିକ ଶକ୍ତିଶାଳୀ କରିବ ।”
ରକ୍ଷା ମନ୍ତ୍ରୀ ରାଜନାଥ ସିଂହ ସୂଚନା ଦେଇ କହିଛନ୍ତି ଯେ, ଡିଫେନ୍ସ ରିସର୍ଚ୍ଚ ଆଣ୍ଡ ଡେଭଲପମେଣ୍ଟ ଅର୍ଗାନାଇଜେସନ୍ (DRDO) ଅଗଷ୍ଟ ୨୩ ତାରିଖ ଦିନ ପ୍ରାୟ ୧୨ଟା ୩୦ ମିନିଟରେ ଓଡ଼ିଶା ଉପକୂଳରୁ ଏହି ଏକୀକୃତ ବାୟୁ ପ୍ରତିରକ୍ଷା ଅସ୍ତ୍ର ପ୍ରଣାଳୀର ସଫଳ ପ୍ରଥମ ଉଡ଼ାଣ ପରୀକ୍ଷଣ କରିଛି । ଏହି ସଫଳତା ପାଇଁ ଶୁଭେଚ୍ଛା ଜଣାଇ ସେ କହିଛନ୍ତି ଯେ ଡିଆରଡିଓ, ଭାରତୀୟ ସଶସ୍ତ୍ର ବଳ ଏବଂ ଶିଳ୍ପ ଜଗତ ମିଳିତ ଭାବେ ଦେଶର ସୁରକ୍ଷା କ୍ଷମତାକୁ ନୂଆ ଶକ୍ତି ପ୍ରଦାନ କରିଛନ୍ତି ।
କ’ଣ ଏହି IADWS ?
ସୂଚନା ଅନୁସାରେ ସ୍ୱଦେଶୀ ଜ୍ଞାନକୌଶଳ ଉପରେ ଆଧାରିତ ଏହି ପରୀକ୍ଷଣ ଡିଆରଡିଓ ଦ୍ୱାରା କରାଯାଇଛି । IADWS ଏକ ବହୁ-ସ୍ତରୀୟ ଏୟାର ଡିଫେନ୍ସ ସିଷ୍ଟମ୍, ଯାହାକୁ ସମ୍ପୂର୍ଣ୍ଣ ସ୍ୱଦେଶୀ ଜ୍ଞାନକୌଶଳରେ ବିକଶିତ କରାଯାଇଛି । ଏଥିରେ କ୍ୱିକ୍ ରିଆକ୍ସନ୍ ସର୍ଫେସ୍ ଟୁ ଏୟାର ମିସାଇଲ୍ ସାମିଲ ଅଛି । ଏହି ମିସାଇଲ୍ ଶତ୍ରୁର ଯୁଦ୍ଧ ବିମାନ ଏବଂ ମିସାଇଲକୁ ମଧ୍ୟମ ଦୂରତାରେ ଟାର୍ଗେଟ୍ କରିବାରେ ସକ୍ଷମ । ଏହା ବ୍ୟତୀତ, ଏଥିରେ ଲାଗିଥିବା ଆଡଭାନ୍ସଡ୍ ଭେରି ସର୍ଟ ରେଞ୍ଜ୍ ଏୟାର ଡିଫେନ୍ସ ସିଷ୍ଟମ୍ କମ୍ ଉଚ୍ଚତାରେ ଆସୁଥିବା ଆକାଶୀୟ ବିପଦ ଯେପରିକି ଡ୍ରୋନ୍, ହେଲିକପ୍ଟର ଏବଂ ଫାଇଟର୍ ଜେଟକୁ ତୁରନ୍ତ ନିଷ୍କ୍ରିୟ କରିବାର କ୍ଷମତା ରଖିଛି ।
ଏଥିସହ ଜାଣିରଖନ୍ତୁ ଯେ, ଏହି ଉଡ଼ାଣ ପରୀକ୍ଷଣ ଭାରତର ମଲ୍ଟି ଲେୟାର୍ଡ ଏୟାର ଡିଫେନ୍ସ କ୍ଷମତାକୁ ପ୍ରତିଷ୍ଠା କରିଛି । ଏହି ପ୍ରଣାଳୀ କୌଣସି ବି ଆକାଶୀୟ ବିପଦର ମୁକାବିଲା କରିବାରେ ସକ୍ଷମ । ବିଶେଷଜ୍ଞଙ୍କ ମତରେ, ଏହା ଫାଇଟର୍ ଜେଟ୍, ଡ୍ରୋନ୍, ହେଲିକପ୍ଟର କିମ୍ବା କ୍ରୁଜ୍ ମିସାଇଲ୍ ହେଉ, ଏହି ଭାରତୀୟ ଏୟାର ଡିଫେନ୍ସ ସିଷ୍ଟମ୍ ସମସ୍ତଙ୍କୁ ଭିନ୍ନ ଭିନ୍ନ ସ୍ତରରେ ରୋକିବାରେ ସକ୍ଷମ ହେବ । ଏହା ଦେଶର ସୁରକ୍ଷାକୁ ନୂଆ ଶକ୍ତି ପ୍ରଦାନ କରିଛି । ସରକାର ଏବଂ ପ୍ରତିରକ୍ଷା ପ୍ରତିଷ୍ଠାନ ଏହି ସଫଳତା ପାଇଁ ଡିଆରଡିଓ, ଭାରତୀୟ ସଶସ୍ତ୍ର ବଳ ଏବଂ ଶିଳ୍ପ ଜଗତକୁ ଶୁଭେଚ୍ଛା ଜଣାଇଛନ୍ତି ।
ଏହି ପ୍ରଣାଳୀ ଏବେ ଦେଶର ଗୁରୁତ୍ୱପୂର୍ଣ୍ଣ ସାମରିକ ଓ ଶିଳ୍ପ ପ୍ରତିଷ୍ଠାନଗୁଡ଼ିକୁ ଶତ୍ରୁର ଆକାଶୀୟ ଆକ୍ରମଣରୁ ସୁରକ୍ଷିତ ରଖିବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ । ଏହି ଅନନ୍ୟ ସଫଳ ପରୀକ୍ଷଣ ଦ୍ୱାରା ଭାରତ କେବଳ ନିଜର ପ୍ରତିରକ୍ଷା କ୍ଷମତାକୁ ଅଧିକ ମଜଭୁତ କରୁନାହିଁ, ବରଂ ‘ଆତ୍ମନିର୍ଭର ଭାରତ’ ଅଭିଯାନ ଅଧୀନରେ ପ୍ରତିରକ୍ଷା କ୍ଷେତ୍ରରେ ସ୍ୱଦେଶୀକରଣ ଦିଗରେ ମଧ୍ୟ ଏକ ବଡ଼ ପଦକ୍ଷେପ ନେଇଛି ।