ନୂଆଦିଲ୍ଲୀ: ଚୀନ ଗସ୍ତର ଗୋଟିଏ ଦିନ ପୂର୍ବରୁ ଜାପାନରୁ ରାଷ୍ଟ୍ରପତି ଜିନପିଙ୍ଗ ପାଇଁ ବନ୍ଧୁତ୍ୱର ବାର୍ତ୍ତା ପଠାଇଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଶୁକ୍ରବାର ଜାପାନରେ ପ୍ରତିକ୍ରିୟା ଦେଇ ମୋଦୀ କହିଛନ୍ତି ଯେ ଭାରତ ଏବଂ ଚୀନ୍, ଦୁଇଟି ପ୍ରମୁଖ ଅର୍ଥନୀତି। ତେଣୁ ବିଶ୍ୱ ଅର୍ଥନୈତିକ କ୍ରମରେ ସ୍ଥିରତା ଆଣିବା ପାଇଁ ଏହି ଦୁଇ ଦେଶକୁ ମିଳିତ ଭାବରେ କାମ କରିବାକୁ ପଡିବ।
ବିଶେଷକରି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶୁଳ୍କ ପଦକ୍ଷେପ ଦ୍ୱାରା ସୃଷ୍ଟି ହୋଇଥିବା ଅନିଶ୍ଚିତତା ମଧ୍ୟରେ ଦୁଇ ଦେଶର ସମ୍ପର୍କ ମଜଭୁତ ରହିବାକୁ ସେ ଗୁରୁତ୍ୱ ଦେଇଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ବିଶ୍ୱ ଶାନ୍ତି ଏବଂ ସ୍ଥିରତା ପାଇଁ ମହାନ ଏସୀୟ ରାଷ୍ଟ୍ରଗୁଡ଼ିକ ମଧ୍ୟରେ ସ୍ଥିର, ଏବଂ ବନ୍ଧୁତ୍ୱପୂର୍ଣ୍ଣ ସମ୍ପର୍କ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
ଜାପାନର ଦୈନିକ ଖବରକାଗଜ ୟୋମିଉରି ଶିମ୍ବୁନକୁ ଏକ ସାକ୍ଷାତକାର ଦେଇ ମୋଦୀ କହିଛନ୍ତି “ବିଶ୍ୱ ଅର୍ଥନୀତିରେ ବର୍ତ୍ତମାନର ଅସ୍ଥିରତାକୁ ଦୃଷ୍ଟିରେ ରଖି, ଭାରତ ଏବଂ ଚୀନ୍ ଦୁଇଟି ପ୍ରମୁଖ ଅର୍ଥନୀତି ଭାବରେ ବିଶ୍ୱ ଅର୍ଥନୀତିରେ ସ୍ଥିରତା ଆଣିବା ପାଇଁ ଏକାଠି କାମ କରିବା ମଧ୍ୟ ଗୁରୁତ୍ୱପୂର୍ଣ୍ଣ।”
ମୋଦୀ ଆହୁରି କହିଛନ୍ତି “ଭାରତ ପାରସ୍ପରିକ ସମ୍ମାନ, ପାରସ୍ପରିକ ସ୍ୱାର୍ଥ ଏବଂ ପାରସ୍ପରିକ ସମ୍ବେଦନଶୀଳତା ଆଧାରରେ ରଣନୈତିକ ଏବଂ ଦୀର୍ଘକାଳୀନ ଦୃଷ୍ଟିକୋଣରୁ ଦ୍ୱିପାକ୍ଷିକ ସମ୍ପର୍କକୁ ଆଗକୁ ବଢାଇବାକୁ ପ୍ରସ୍ତୁତ ଅଛି। ଏବଂ ଆମର ବିକାଶମୂଳକ ଚ୍ୟାଲେଞ୍ଜଗୁଡ଼ିକର ମୁକାବିଲା ପାଇଁ ରଣନୈତିକ ଯୋଗାଯୋଗକୁ ବୃଦ୍ଧି କରିବାକୁ ମଧ୍ୟ ଭାରତ ପ୍ରସ୍ତୁତ ରହିଛି।”
ନିକଟରେ ଭାରତ ଚୀନ ମଧ୍ୟରେ ସମ୍ପର୍କ ସୁଧୁରୁଛି। ଦୁଇ ଦେଶର ଭଳ ସମ୍ପର୍କ କେବଳ ପାରସ୍ପରିକ ଶାନ୍ତି ନୁହେଁ ଏହା ବିଶ୍ୱ ଶାନ୍ତି ପାଇଁ ଆବଶ୍ୟକ ବୋଲି ମୋଦୀ କହିଛନ୍ତି। ଇଣ୍ଟରଭ୍ୟୁରେ ସେ କହିଛନ୍ତି “ଭାରତ ଏବଂ ଚୀନ୍ ମଧ୍ୟରେ ସ୍ଥିର, ସରଳ ଏବଂ ସୌହାର୍ଦ୍ଦପୂର୍ଣ୍ଣ ଦ୍ୱିପାକ୍ଷିକ ସମ୍ପର୍କ କେବଳ ଦୁଇ ପଡ଼ୋଶୀ ମଧ୍ୟରେ ନୁହେଁ ବରଂ ପୃଥିବୀର ଦୁଇଟି ବୃହତ୍ତମ ରାଷ୍ଟ୍ର ଭାବରେ, ଆଞ୍ଚଳିକ ଏବଂ ବିଶ୍ୱ ଶାନ୍ତି ଓ ସମୃଦ୍ଧି ଉପରେ ଏକ ସକାରାତ୍ମକ ପ୍ରଭାବ ପକାଇପାରେ। ଏହା ଏକ ବହୁ-ଧ୍ରୁବୀୟ ଏସିଆ ଏବଂ ଏକ ବହୁ-ଧ୍ରୁବୀୟ ବିଶ୍ୱ ପାଇଁ ମଧ୍ୟ ଗୁରୁତ୍ୱପୂର୍ଣ୍ଣ।”
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ଉପରେ ୫୦ ପ୍ରତିଶତ ଶୁଳ୍କ ଲାଗୁ କରିଛନ୍ତି, ଯେଉଁଥିରେ ୨୫ ପ୍ରତିଶତ ଆମଦାନୀ ଶୁଳ୍କ ଏବଂ ରୁଷ ସହିତ ଭାରତର ତୈଳ ବାଣିଜ୍ୟ ଉପରେ ଅତିରିକ୍ତ ୨୫ ପ୍ରତିଶତ ଶୁଳ୍କ ଲାଗୁ କରାଯାଇଛି। ସେହିପରି, ଆମେରିକା ଚୀନ୍ ସାମଗ୍ରୀ ଉପରେ ଶୁଳ୍କକୁ ୧୪୫ ପ୍ରତିଶତକୁ ବୃଦ୍ଧି କରିବା ପରେ ଚୀନ୍ ୱାଶିଂଟନ୍ ମଧ୍ୟରେ ମଧ୍ୟ ଚାପ ଦେଖା ଦେଇଛି।
ସାକ୍ଷାତକାରରେ ମୋଦୀ ଆହୁରି କହିଛନ୍ତି ଯେ ଗତ ବର୍ଷ କାଜାନରେ ରାଷ୍ଟ୍ରପତି ଜିନପିଙ୍ଗଙ୍କ ସହ ତାଙ୍କର ସାକ୍ଷାତ ପରଠାରୁ, ଭାରତ-ଚୀନ୍ ସମ୍ପର୍କରେ ସ୍ଥିର ଏବଂ ସକାରାତ୍ମକ ପ୍ରଗତି ହୋଇଛି। ତେବେ ଆଗାମୀ ଶିଖର ସମ୍ମିଳନୀରେ ପାରସ୍ପରିକ ସ୍ୱାର୍ଥ ଉପରେ ଆଲୋଚନା କରିବା ଏବଂ ଆଞ୍ଚଳିକ ଚ୍ୟାଲେଞ୍ଜର ସମାଧାନ ପାଇଁ ଏକ ଗୁରୁତ୍ୱପୂର୍ଣ୍ଣ ମଞ୍ଚ ପ୍ରଦାନ କରିବ ବୋଲି ମୋଦୀ କହିଛନ୍ତି। ପ୍ରଧାନମନ୍ତ୍ରୀ ଦୁଇ ଦିନିଆ ଜାପାନରେ ଗସ୍ତରେ ଯାଇଛନ୍ତି। ସେ ଆଜି ଓ କାଲି ଜାପାନରେ ରହିବେ। ୩୧ ତାରିଖରେ ଏସସିଓ ସମ୍ମିଳନୀରେ ଯୋଗ ଦେଇ ଜିନପିଙ୍ଗଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି।