ନୂଆଦିଲ୍ଲୀ: ରୁଷର ଦୁଇଟି ପ୍ରମୁଖ ଉତ୍ପାଦକଙ୍କ ଉପରେ ଆମେରିକାର କଟକଣା ପରେ, ଭାରତର ତୈଳ ବିଶୋଧନଗାର ଗୁଡିକ ଉପରେ ପ୍ରଭାବ ପଡିବା ଆରମ୍ଭ ହୋଇଛି। ରୁଷରୁ ଆମଦାନୀ ହ୍ରାସ ପାଇଁ ମଧ୍ୟପ୍ରାଚ୍ୟ, ଲାଟିନ୍ ଆମେରିକା ଏବଂ ଆମେରିକାରୁ ଭାରତ ଅଶୋଧିତ ତୈଳ କ୍ରୟ ବୃଦ୍ଧି କରିବାର ସମ୍ଭାବନା ଦେଖାଦେଇଛି। ଚଳିତ ମାସ ୨୨ ତାରିଖରେ ଆମେରିକା ପ୍ରଶାସନ ପକ୍ଷରୁ ରୁଷର ଦୁଇଟି ସର୍ବବୃହତ ଅଶୋଧିତ ତୈଳ ଉତ୍ପାଦକ, ରୋସନେଫ୍ଟ ଏବଂ ଲୁକୋଇଲ୍ ଉପରେ କଟକଣା ଜାରି କରାଯାଇଥିଲା, ଫଳରେ କୌଣସି ଆମେରିକୀୟ ସଂସ୍ଥା ଏବଂ ବ୍ୟକ୍ତିବିଶେଷ ସେମାନଙ୍କ ସହିତ ବ୍ୟବସାୟ କରିପାରିବେ ନାହିଁ ବୋଲି ମଧ୍ୟ ଜଣାପଡ଼ିଥିଲା। ଏଭଳି ସ୍ଥିତିରେ ଆସନ୍ତା ନଭେବର ୨୧ ସୁଦ୍ଧା ରୋସନେଫ୍ଟ ଏବଂ ଲୁକୋଇଲ୍ ସହିତ ସମସ୍ତ କାରବାର ବନ୍ଦ କରିବାକୁ ପଡିବ।
ଅନ୍ୟପକ୍ଷରେ ରୁଷ ବର୍ତ୍ତମାନ ଭାରତକୁ ପ୍ରାୟ ଏକ ତୃତୀୟାଂଶ ଅଶୋଧିତ ତୈଳ ଆମଦାନୀ ଯୋଗାଇଥାଏ, ଯାହା ୨୦୨୫ ମସିହାରେ ପ୍ରତିଦିନ ହାରାହାରି ପ୍ରାୟ ୧.୭ ନିୟୁତ ବ୍ୟାରେଲଥିଲା, ଯାହା ମଧ୍ୟରୁ ପ୍ରାୟ ୧.୨ ନିୟୁତ ବ୍ୟାରେଲ ସିଧାସଳଖ ରୋସନେଫ୍ଟ ଏବଂ ଲୁକୋଇଲରୁ ଆସିଥିଲା। ନଭେମ୍ବର ୨୧ ପର୍ଯ୍ୟନ୍ତ ରୁଷୀୟ ଅଶୋଧିତ ତୈଳ ପ୍ରବାହ ୧.୬-୧.୮ ନିୟୁତ ବ୍ୟାରେଲ ମଧ୍ୟରେ ରହିବ, କିନ୍ତୁ ଏହା ପରେ ରୋସନେଫ୍ଟ ଏବଂ ଲୁକୋଇଲରୁ ସିଧାସଳଖ ତେଲ ପରିମାଣ ହ୍ରାସ ପାଇବାର ସମ୍ଭାବନା ରହିଛି, କାରଣ ଭାରତୀୟ ରିଫାଇନରମାନେ ଆମେରିକୀୟ ପ୍ରତିବନ୍ଧକ ଜନିତ କୌଣସି ବିପଦକୁ ଏଡାଇବାକୁ ଚାହୁଁଛନ୍ତି। ସମ୍ଭାବ୍ୟ ଅସୁବିଧାକୁ ଦୃଷ୍ଟିରେ ରଖି ଭାରତୀୟ ରିଫାଇନରମାନେ ମଧ୍ୟପ୍ରାଚ୍ୟ, ବ୍ରାଜିଲ, ଲାଟିନ୍ ଆମେରିକା, ପଶ୍ଚିମ ଆଫ୍ରିକା, କାନାଡା ଏବଂ ଯୁକ୍ତରାଷ୍ଟ୍ରରୁ ଆମଦାନୀ ବୃଦ୍ଧି କରିବେ ବୋଲି ଆଶା କରାଯାଉଛି।