ଉଦଳା: କଥାରେ ଅଛି ରାଗରେ ମଣିଷ ତାର ହିତାହିତ ଜ୍ଞାନ ଭୁଲି କିଛି ବି କରି ବସେ । ଭୁଲିଯାଏ ସବୁ ସମ୍ପର୍କ । ନିକଟରେ ଏଭଳି ଏକ ଘଟଣା ଘଟିଛି ଯାହା ଆପଣ ବିଶ୍ୱାସ କରିବାକୁ ଅସମର୍ଥ ହେବେ । ଟଙ୍କା କେଇଟା ପାଇଁ ସାଙ୍ଗ ଭୁଲିଗଲା ବନ୍ଧୁତା । ମାଂସ ବିକ୍ରି ଟଙ୍କା ପାଇଁ ଇଟାରେ ଛେଚି ଛେଚି ସାଙ୍ଗକୁ ମାରିଲା ସାଙ୍ଗ । ପୋଲିସ ତଦନ୍ତ ପରେ ସାମ୍ନାକୁ ଆସିଛି ଅଭିଯୁକ୍ତ ସାଙ୍ଗର ଅସଲ ଚେହେରା ।
ଗତ ନଭେମ୍ବର ୨୮ ତାରିଖ ଦିନ ଖୁଣ୍ଟା ଥାନା ବଡ଼ଖୁଣ୍ଟା ରାସ୍ତାରେ ଜଣେ ଯୁବକଙ୍କ ମରଶରୀର ମିଳିଥିଲା । ପ୍ରାଥମିକ ତଦନ୍ତରୁ ଯୁବକଙ୍କୁ ପଥରରେ ଛେଚି ହତ୍ୟା କରାଯାଇଥିବା ଅନୁମାନ କରାଯାଇଥିଲା । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଆରମ୍ଭ କରିଥିଲା ଛାନଭିନ୍ । ଆଉ ତଦନ୍ତ ପରେ ଘଟଣାର ହୋଇଛି ପର୍ଦାଫାଶ । ମୃତକ ହେଉଛନ୍ତି ଗଣେଶ ହେମ୍ବ୍ରମ । ଗଣେଶଙ୍କ ଭାଇଙ୍କ ଲିଖିତ ଅଭିଯୋଗ ଆଧାରରେ ତଦନ୍ତ ଆରମ୍ଭ କରିଥିଲା ପୋଲିସ । ଖୁଣ୍ଟା ପୋଲିସ ଗଣେଶଙ୍କ ସାଙ୍ଗ ଅଭିଯୁକ୍ତ ମଙ୍ଗଲ ମୁର୍ମୁକୁ ଗିରଫ କରିଛି ଏବଂ ପୁରା ଘଟଣା ଉପରୁ ପରଦା ହଟାଇଛି ।
ସୂଚନା ଅନୂସାରେ ଅଭିଯୁକ୍ତ ମଙ୍ଗଲ ମୁର୍ମୁ ଏବଂ ମୃତକ ଗଣେଶ ଉଭୟ ଗୁରୁବାର ଦିନ ମାଂସ ବିକ୍ରି କରିବା ପାଇଁ ଖୁଣ୍ଟା ସାପ୍ତାହିକ ହାଟକୁ ଯାଇଥିଲେ । ହାଟରେ ଉଭୟ ମିଶି ମାଂସ ବିକ୍ରି କରି ଫେରିବା ସମୟରେ ଅଭିଯୁକ୍ତ ମଙ୍ଗଲ ସାଙ୍ଗ ଗଣେଶକୁ ମାଂସ ବିକ୍ରି ଟଙ୍କା ମାଗିଥିଲା । ହେଲେ ଗଣେଶ ଟଙ୍କା ନାହିଁ ବୋଲି କହିବାରୁ ବଡ଼ଖୁଣ୍ଟା ନିକଟ ରାସ୍ତା ପାଖରେ ଉଭୟଙ୍କ ମଧ୍ୟରେ ଆରମ୍ଭ ହୋଇଥିଲା ଝଗଡା । ନିଶାସକ୍ତ ଅବସ୍ଥାରେ ଥିବାରୁ ଝଗଡା ଏତେ ଉଗ୍ର ରୂପ ନେଲା ଯେ ଅଭିଯୁକ୍ତ ସାଙ୍ଗ ଏକ ଇଟା ଆଣି ଗଣେଷଙ୍କ ମୁଣ୍ଡକୁ ଛେଚିଥିଲା । ଆଉ ଅଭିଯୁକ୍ତ ସାଙ୍ଗର ଆକ୍ରମଣରେ ଗଣେଶଙ୍କ ଜୀବନ ଯାଇଥିଲା । ଏଭଳି କାଣ୍ଡ କରିବା ପରେ ଗଣେଶଙ୍କ ପକେଟରୁ ମୋବାଇଲ ଏବଂ ଟଙ୍କା ନେଇ ଫେରାର ହୋଇଯାଇଥିଲା ଅଭିଯୁକ୍ତ ।
ଘଟଣାସ୍ଥଳରେ ପଡ଼ିଥିବା ଗାଡି ଚାବି କାଠିକୁ ନେଇ ପୋଲିସ ଆରମ୍ଭ କରିଥିଲା ତଦନ୍ତ । ପରେ ଅଭିଯୁକ୍ତ ସାଙ୍ଗ ମଙ୍ଗଲ ମୁର୍ମୁକୁ ଗିରଫ କରି କୋର୍ଟଚାଲାଣ କରିଛି ପୋଲିସ । ମାଂସ ବିକ୍ରି ଟଙ୍କା ନ ଦେବାରୁ ସାଙ୍ଗକୁ ହତ୍ୟା କରିଥିବା କହିଛି ଅଭିଯୁକ୍ତ । ସେପଟେ ଅଭିଯୁକ୍ତକୁ କୋଠର ଦଣ୍ଡ ଦେବା ପାଇଁ ଦାବି କରିଛନ୍ତି ମୃତକଙ୍କ ପରିବାର ଲୋକେ । ସାମାନ୍ୟ ଟଙ୍କା କେଇଟା ପାଇଁ ଏ ଖଳ ସମାଜ ଏତେ ନୃଶଂସ ହୋଇଗଲାଣି ଯେ ସମ୍ପର୍କର ଡୋରିକୁ ବି କ୍ଷଣିକରେ ଛିଡ଼େଇ ଦେଉଛନ୍ତି । ମଣିଷ ନିଜର ହିତାହିତ ଜ୍ଞାନ ଭୁଲି ଯାଇ ବନି ଯାଉଛି ଅମଣିଷ ।