ଆମେରିକା : ଆମେରିକାର ଷ୍ଟେଟ୍ ଡିପାର୍ଟମେଣ୍ଟ H-1B ଏବଂ H-4 ଭିସା ଆବେଦନକାରୀଙ୍କ ପାଇଁ ସୋସିଆଲ ମିଡିଆ ପ୍ରୋଫାଇଲ ଯାଞ୍ଚ କରିବାକୁ ବାଧ୍ୟତାମୂଳକ କରିଦେଇଛି । ଏହି ନୂଆ ନିୟମ ଆଜିଠାରୁ ଲାଗୁ ହୋଇଛି । ଏହି ନିୟମ ପୂର୍ବରୁ କେବଳ ଛାତ୍ର ଏବଂ ଏକ୍ସଚେଞ୍ଜ ଭିଜିଟର୍ସଙ୍କ F, M ଏବଂ J ଭିସା ପାଇଁ ଉପଲବ୍ଧ ଥିଲା । କିନ୍ତୁ ଏବେ ଏହାକୁ ଦକ୍ଷ ଶ୍ରମିକଙ୍କ ପାଇଁ H-1B ଭିସା ଏବଂ ସେମାନଙ୍କ ପରିବାର ସଦସ୍ୟଙ୍କ ପାଇଁ H-4 ଭିସା ପାଇଁ ବିସ୍ତାର କରାଯାଇଛି ।
ସୂଚନାନୁଯାୟୀ, ଏହି ନୂଆ ନିୟମ ଯୋଗୁଁ ଭାରତରେ ଅନେକ H-1B ଏବଂ H-4 ଭିସା ସାକ୍ଷାତକାର ତାରିଖ ବାତିଲ କରାଯାଇଛି । ଏହା ହଜାର ହଜାର ଭାରତୀୟ ଟେକ୍ ବୃତ୍ତିଗତ ଏବଂ ସେମାନଙ୍କ ପରିବାରକୁ ପ୍ରଭାବିତ କରୁଛି । କାରଣ ଭାରତରେ ସର୍ବାଧିକ ସଂଖ୍ୟକ H-1B ଭିସା ଆବେଦନ ଗ୍ରହଣ କରାଯାଏ । ଏହାରି ମଧ୍ୟରେ ଆମେରିକାରେ ରହୁଥିବା କିଛି H-1B ଏବଂ H-4 ଭିସାଧାରୀ ଇମେଲ୍ ପାଇଛନ୍ତି । ଯେଉଁଥିରେ ସେମାନଙ୍କୁ ସୂଚନା ଦିଆଯାଇଛି ଯେ, ସେମାନଙ୍କର ଭିସା ବିଚାରପୂର୍ଣ୍ଣ ଭାବରେ ପ୍ରତ୍ୟାହାର କରାଯାଇଛି ।
ଏଥିସହ ଷ୍ଟେଟ୍ ଡିପାର୍ଟମେଣ୍ଟ ସ୍ପଷ୍ଟ କରିଛି ଯେ, ଆବେଦନକାରୀମାନେ ଆମେରିକାର ସୁରକ୍ଷା କିମ୍ବା ସ୍ୱାର୍ଥ ପ୍ରତି ବିପଦ ସୃଷ୍ଟି ନକରନ୍ତି ତାହା ନିଶ୍ଚିତ କରିବା ପାଇଁ ସେମାନେ ସମସ୍ତ ଉପଲବ୍ଧ ସୂଚନା ବ୍ୟବହାର କରିବେ । ଏହି ପରିବର୍ତ୍ତନ ଭିସା ପ୍ରକ୍ରିୟାକରଣ ସମୟ ବୃଦ୍ଧି କରିପାରେ ଏବଂ ଯାତ୍ରା ଯୋଜନାକୁ ମଧ୍ୟ ପ୍ରଭାବିତ କରିପାରେ ।
ଏହି ଯାଞ୍ଚର ଉଦ୍ଦେଶ୍ୟ ହେଉଛି ଜାତୀୟ ସୁରକ୍ଷାକୁ ସୁଦୃଢ଼ କରିବା । ବର୍ତ୍ତମାନ ପ୍ରତ୍ୟେକ ଭିସା ଆବେଦନକୁ ଜାତୀୟ ସୁରକ୍ଷା ଦୃଷ୍ଟିକୋଣରୁ ବିଚାର କରାଯିବ । ଏହାରି ମଧ୍ୟରେ ସମସ୍ତ ଆବେଦନକାରୀଙ୍କୁ ସେମାନଙ୍କ ସୋସିଆଲ ମିଡିଆ ପେଜର ଆକାଉଣ୍ଟ ସେଟିଙ୍ଗ୍ସକୁ ସାର୍ବଜନୀନ କରିବାକୁ କୁହାଯାଇଛି । ଯାହା ଦ୍ବାରା କର୍ତ୍ତୁପକ୍ଷ ସେମାନଙ୍କୁ ସହଜରେ ଯାଞ୍ଚ କରିପାରିବେ । ଯଦି ଆବେଦନକାରୀଙ୍କ ପ୍ରୋଫାଇଲ୍ ବ୍ୟକ୍ତିଗତ ରହିଥାଏ କିମ୍ବା କୌଣସି ଅନଲାଇନ୍ କାର୍ଯ୍ୟକଳାପ ସନ୍ଦେହଜନକ ଦେଖାଯାଏ, ତେବେ ଭିସା ବିଳମ୍ବିତ ହୋଇପାରେ କିମ୍ବା ପ୍ରତ୍ୟାଖ୍ୟାନ ମଧ୍ୟ ହୋଇପାରେ ।
ଅନ୍ୟପଟେ ଆବେଦନକାରୀଙ୍କୁ ପରାମର୍ଶ ଦିଆଯାଇଛି ଯେ,ସେମାନେ ସେମାନଙ୍କର ସୋସିଆଲ ମିଡିଆ ପୋଷ୍ଟଗୁଡ଼ିକୁ ପୂର୍ବରୁ ଯାଞ୍ଚ କରନ୍ତୁ ଏବଂ ନିଶ୍ଚିତ କରନ୍ତୁ ଯେ ଏପରି କୌଣସି ସୂଚନା ନାହିଁ ଯାହା ଭିସା ନିୟମ ସହିତ ମେଳ ଖାଉନାହିଁ ।