କନ୍ଧମାଳ : ମୁହାଁମୁହିଁ ଧକ୍କା ପରେ ଜଳିଗଲା କାର୍ ଓ ଅଟୋ । ଜଣେ ଜୀବନ୍ତ ଦଗ୍ଧ । ଫୁଲବାଣୀ ସଦର ଥାନା ଆଇଟିଆଇ ନିକଟରେ ଦୁର୍ଘଟଣା । ମୁହାଁମୁହିଁ ଧକ୍କା ହେବା ପରେ ରାସ୍ତାରେ ହୁହୁ ହୋଇ ଜଳିଲା କାର ଓ ଅଟୋ । ଜଣେ ଜୀବନ୍ତ ଦଗ୍ଧ ହୋଇଥିବା ବେଳେ ଦୁଇ ଜଣ ଗୁରୁତର ଅଛନ୍ତି । ଦୁଇ ଗୁରୁତରଙ୍କୁ ଫୁଲବାଣୀ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା ।
ପରେ ବ୍ରହ୍ମପୁର ଏମକେସିଜି ମେଡିକାଲକୁ ସ୍ଥାନାନ୍ତର କରାଯାଇଛି । ମୃତକ ହେଉଛନ୍ତି ଅଟୋ ଡ୍ରାଇଭର । ତାଙ୍କ ନାଁ ବରୁଣ କୁମାର ମଲ୍ଲିକ । ତାଙ୍କ ଘର ମାଣିଆକାଠି ଗାଁରେ ବୋଲି ଜଣାପଡ଼ିଛି । ସେ ଫୁଲବାଣୀରୁ ଘରକୁ ଫେରିବା ବେଳେ ଏକ କାର୍ ସହ ତାଙ୍କ ଅଟୋ ମୁହାଁମୁହିଁ ଧକ୍କା ଲାଗିଥିଲା । ଦୁର୍ଘଟଣା ପରେ କାର୍ ଡ୍ରାଇଭର ଫେରାର ହୋଇ ଯାଇଛି । ଅଟୋକୁ ଧକ୍କା ଦେଇଥିବା କାର୍ ବୌଦ୍ଧ ପଟୁ ଦ୍ରୁତ ଗତିରେ ଆସୁଥିଲା । ଦୁର୍ଘଟଣା ସଂପର୍କରେ ସୂଚନା ପାଇବା ପରେ ଅଗ୍ନିଶମ କର୍ମଚାରୀ ପହଞ୍ଚି ନିଆଁକୁ ଆୟତ୍ତ କରିଛନ୍ତି ।