ନୂଆଦିଲ୍ଲୀ : ମଧ୍ୟପ୍ରାଚ୍ୟ ଯୁଦ୍ଧ ଯୋଗୁଁ ଇଣ୍ଡିଗୋ ଘରୋଇ ଏବଂ ଅନ୍ତରାଷ୍ଟ୍ରୀୟ ବିମାନ ପାଇଁ ଇନ୍ଧନ ସରଚାର୍ଜ ବୃଦ୍ଧି କରିବାକୁ ଘୋଷଣା କରିଛି । ଏୟାର ଟର୍ବାଇନ୍ ଇନ୍ଧନ ସରଚାର୍ଜର ମୂଲ୍ୟ ବୃଦ୍ଧି ହେବା ଯୋଗୁଁ ଏହାର ପ୍ରଭାବ ଯାତ୍ରୀଙ୍କ ଉପରେ ପଡିଛି । ଇନ୍ଧନ ମହଙ୍ଗା ହେବା ମଧ୍ୟରେ ଇଣ୍ଡିଗୋ ଇନ୍ଧନ ଚାର୍ଜରେ ସଂଶୋଧନ କରିଛି । ୨ ଏପ୍ରିଲଠାରୁ ହୋଇଥିବା ସମସ୍ତ ବୁକିଂ ଉପରେ ଲାଗୁ କରାଯାଇଛି । ପ୍ରଥମେ ସମସ୍ତ ଘରୋଇ ରୁଟରେ ୪୨୫ ଟଙ୍କାର ଫ୍ଲାଟ୍ ଇନ୍ଧନ ଚାର୍ଜ ଲାଗୁ ହେଉଥିଲା । ଏବେ ଏହି ଦୂରତା ଆଧାରରେ ନିଷ୍ପତ୍ତି ନିଆଯାଇଛି ।
୫୦୦ କିଲୋମିଟର ପର୍ଯ୍ୟନ୍ତ ବିମାନ ଚାର୍ଜ ୨୭୫ ଟଙ୍କା, ୫୦୦ରୁ ୧୦୦୦କିଲୋମିଟର ପର୍ଯ୍ୟନ୍ତ ବିମାନ ଚାର୍ଜ ୪୦୦ ଟଙ୍କା, ୧୦୦୦ରୁ ୧୫୦୦ କିଲୋମିଟର ପର୍ଯ୍ୟନ୍ତ ଏହାର ଚାର୍ଜ ୬୦୦ଟଙ୍କା,୧୫୦୦ରୁ ୨୦୦୦କିଲୋମିଟର ପର୍ଯ୍ୟନ୍ତ ଏହାର ଚାର୍ଜ ୮୦୦ଟଙ୍କା ଥିଲାବେଳେ ୨୦୦୦ କିଲୋମିଟରରୁ ଅଧିକ ଉଡାଣ ଭରିବାକୁ ୯୫୦ ଟଙ୍କା ଚାର୍ଜ ଲାଗୁ କରାଯିବ ।
ଅଳ୍ପ ରୁଟ୍ ଯାତ୍ରା କରୁଥିବା ଯାତ୍ରୀଙ୍କ ପାଇଁ ବଡ଼ ଆଶ୍ବସ୍ତି ରହିଛି । କିନ୍ତୁ ଲମ୍ବା ଯାତ୍ରା କରୁଥିବା ଯାତ୍ରୀମାନଙ୍କ ପାଇଁ ଚାର୍ଜ ବୃଦ୍ଧି ପାଇଛି । ୧୪ ମାର୍ଚ୍ଚକୁ ପ୍ରଥମେ ଇନ୍ଧନ ଚାର୍ଜ ଲଗାଯାଇଥିଲା । କିନ୍ତୁ ମଧ୍ୟପ୍ରାଚ୍ୟରେ ଜାରି ରହିଥିବା ଉତ୍ତେଜନା ଏବଂ ଇନ୍ଧନ ମୂଲ୍ୟ ବୃଦ୍ଧି ଯୋଗୁଁ ବିମାନ କମ୍ପାନୀକୁ ଏହାକୁ ପୁଣି ଥରେ ସଂଶୋଧନ କରିବାକୁ ପଡିଛି । ସେହିପରି ଘରୋଇ ଉଡାଣ ଉପରେ ସରକାର ହସ୍ତକ୍ଷେପ କରିଛନ୍ତି । ଯାହା ଦ୍ବାରା ଯାତ୍ରୀଙ୍କୁ ଆଶ୍ବସ୍ତି ଦେଇଛି । ପେଟ୍ରୋଲିୟମ୍ ମନ୍ତ୍ରଣାଳୟ ଏବଂ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଟିକେଟ୍ ମୂଲ୍ୟରେ ହଠାତ୍ ବୃଦ୍ଧିକୁ ଏଡାଇବା ପାଇଁ ବିମାନ କମ୍ପାନୀଗୁଡିକ ୨୫ ପ୍ରତିଶତ ପର୍ଯ୍ୟନ୍ତ ସାମାନ୍ୟ ବୃଦ୍ଧି କରିବାକୁ ଅନୁମତି ଦେଇଛନ୍ତି । ସରକାରଙ୍କ ଦ୍ବାରା କୌଣସି ସୀମା ଲାଗୁ କରାଯାଇନାହିଁ । ଫଳରେ ଇନ୍ଧନ ଚାର୍ଜ ଖୁବ୍ ଜୋରରେ ବୃଦ୍ଧି ପାଉଛି ।
୧୪ ମାର୍ଚ୍ଚରେ ମଧ୍ୟପ୍ରାଚ୍ୟ ଯୁଦ୍ଧ ପାଇଁ ଇନ୍ଧନ ସରଚାର୍ଜ ପ୍ରାୟ ୯୦୦ ଟଙ୍କା, ଦକ୍ଷିଣ ଏସିଆ ଏବଂ ଚୀନରେ ୧୮୦୦ଟଙ୍କା, ୟୁରୋପରେ ୨୩୦୦ଟଙ୍କା ଧାର୍ଯ୍ୟ କରାଯାଇଛି । ଆଜିଠାରୁ ମଧ୍ୟପ୍ରାଚ୍ୟ ଯୁଦ୍ଧ ପାଇଁ ଇନ୍ଧନ ଚାର୍ଜ ୩୦୦୦ଟଙ୍କାରୁ ୫୦୦୦ଟଙ୍କା ରହିଛି । ଦକ୍ଷିଣ ଏସିଆ ଏବଂ ଚୀନରେ ୩୫୦୦ରୁ ୫୦୦୦ଟଙ୍କା, ତୁର୍କୀ-ଗ୍ରୀସ୍ ପାଇଁ ୭୫୦୦ଟଙ୍କା ଏବଂ ୟୁରୋପ ପାଇଁ ୧୦,୦୦୦ପର୍ଯ୍ୟନ୍ତ ଟଙ୍କା ରଖାଯାଇଛି । ମାତ୍ର ୩ ସପ୍ତାହ ମଧ୍ୟରେ ଇନ୍ଧନ ଚାର୍ଜ ତିନିରୁ ଚାରି ଗୁଣା ବୃଦ୍ଧି ପାଇଛି ।
ଅନ୍ୟପଟେ ଇନ୍ଧନ ଚାର୍ଜରେ ଏହି ଟିକେଟ ବୃଦ୍ଧିର ମୋଟ ମୂଲ୍ୟ ଉପରେ ସିଧାସଳଖ ପ୍ରଭାବ ପକାଇବ । ବିଶେଷକରି ଅନ୍ତର୍ଜାତୀୟ ଏବଂ ଦୂର ବିମାନ ଯାତ୍ରୀମାନଙ୍କୁ ଏବେ ପୂର୍ବ ଅପେକ୍ଷା ଅଧିକ ଦେୟ ଦେବାକୁ ପଡିବ । ବିମାନ କମ୍ପାନୀ କହିଛି ଯେ, ଯାତ୍ରୀଙ୍କ ଉପରେ ଏହା ସମ୍ପୂର୍ଣ୍ଣ ବୋଝ ଲଦି ଦେଇନାହିଁ । କିନ୍ତୁ ଯଦି ATF ମୂଲ୍ୟ ଏହି ହାରରେ ବୃଦ୍ଧି ପାଇବା ଜାରି ରହେ ତେବେ ଭବିଷ୍ୟତରେ ବିମାନ ଭଡା ଆହୁରି ବୃଦ୍ଧି ପାଇପାରେ ।