ନୂଆଦିଲ୍ଲୀ : ମଧ୍ୟପ୍ରାଚ୍ୟରେ ଯୁଦ୍ଧ ପରିସ୍ଥିତି ଥମିବାର ନାଁ ଧରୁନି। ଦିନକୁ ଦିନ ଏହି ଉତ୍ତେଜନା ବୃଦ୍ଧି ପାଇବାରେ ଲାଗିଛି। ମିଳିଥିବା ସୂଚନା ଅନୁଯାୟୀ, ଏହି ଯୁଦ୍ଧ ଏକ ଭୟଙ୍କର ମୋଡ଼ରେ ପହଞ୍ଚିଛି। ଇରାନୀ ଗଣମାଧ୍ୟମ ଏବଂ ସୁରକ୍ଷା ସଂସ୍ଥାଗୁଡ଼ିକ ସୂଚିତ କରିଛନ୍ତି ଯେ ସମୁଦ୍ର ତଳେ ଇଣ୍ଟରନେଟ୍ କେବୁଲ ଗୁଡ଼ିକ ଉପରେ ମଧ୍ୟ ଆକ୍ରମଣ ହୋଇପାରେ। ଏହି କେବୁଲ ଗୁଡ଼ିକ ପ୍ରାୟ ସମଗ୍ର ବିଶ୍ୱର ଇଣ୍ଟରନେଟ୍କୁ ଶକ୍ତି ପ୍ରଦାନ କରନ୍ତି। ଯଦି ଏହା ଘଟେ, ତେବେ କ’ଣ ସମଗ୍ର ବିଶ୍ୱର ଇଣ୍ଟରନେଟ୍ ବନ୍ଦ ହୋଇଯିବ? ଏହାକୁ ନେଇ ଏବେ ବଡ ପ୍ରଶ୍ନବାଚୀ ସୃଷ୍ଟି ହୋଇଛି। ଏପର୍ଯ୍ୟନ୍ତ, ଇରାନ, ଆମେରିକା ଏବଂ ଇସ୍ରାଏଲ ମଧ୍ୟରେ ଚାଲିଥିବା ଯୁଦ୍ଧ କେବଳ ତେଲ, ଜାହାଜ ଏବଂ କ୍ଷେପଣାସ୍ତ୍ର ପର୍ଯ୍ୟନ୍ତ ସୀମିତ ଥିଲା। କିନ୍ତୁ ପରବର୍ତ୍ତୀ ସମୟରେ ଇରାନର ଲକ୍ଷ, ସମୁଦ୍ର ତଳେ ଥିବା କେବୁଲ ଉପରେ ହୋଇପାରେ।
ହର୍ମୁଜ୍ ପ୍ରଣାଳୀ କେବଳ ଏକ ତୈଳ ପଥ ନୁହେଁ, ଏହା ଡିଜିଟାଲ୍ ଦୁନିଆର ଏକ ପ୍ରମୁଖ ଚେକପଏଣ୍ଟ ମଧ୍ୟ। ଏହା ଦେଇ ଅନେକ ଆନ୍ତର୍ଜାତୀୟ ଫାଇବର ଅପ୍ଟିକ୍ କେବୁଲ୍ ଯାଇଥାଏ, ଯାହା ଏସିଆ, ୟୁରୋପ ଏବଂ ମଧ୍ୟପ୍ରାଚ୍ୟକୁ ସଂଯୋଗ କରିଥାଏ। ଏହି ଚ୍ୟାନେଲର କୌଣସି କ୍ଷତି କେବଳ ଗୋଟିଏ ଦେଶ ପାଇଁ ନୁହେଁ, ବରଂ ଅନେକଙ୍କ ପାଇଁ ଇଣ୍ଟରନେଟ୍ ସଂଯୋଗକୁ ପ୍ରଭାବିତ କରିବ। ଏହି ଦୃଷ୍ଟିରୁ ଭାରତ ସମ୍ପୂର୍ଣ୍ଣ ସୁରକ୍ଷିତ ନୁହେଁ। ଭାରତର ପ୍ରାୟ ୬୦ ପ୍ରତିଶତ ଇଣ୍ଟରନେଟ୍ ମଧ୍ୟପ୍ରାଚ୍ୟ ଏବଂ ୟୁରୋପକୁ ଯାଉଥିବା କେବୁଲ୍ ଦେଇ ଗତି କରେ। ଏହାର ଅର୍ଥ ହେଉଛି ହର୍ମୁଜ୍ ପ୍ରଣାଳୀ କିମ୍ବା ଲୋହିତ ସାଗରରେ କେବୁଲ୍ କ୍ଷତି ଭାରତରେ ଇଣ୍ଟରନେଟ୍ ଗତିକୁ ମନ୍ଥର କରିପାରେ। ବିଶେଷକରି ଆନ୍ତର୍ଜାତୀୟ ୱେବସାଇଟ୍, କ୍ଲାଉଡ୍ ସେବା ଏବଂ ଅନଲାଇନ୍ ପେମେଣ୍ଟ ସିଷ୍ଟମକୁ ପ୍ରଭାବିତ କରିପାରେ। ଯଦିଓ ଭାରତରେ ଏକ ଦ୍ୱିତୀୟ ମାର୍ଗ ଅଛି, ଯାହା ପୂର୍ବ ଦିଗକୁ ସିଙ୍ଗାପୁର ଏବଂ ପ୍ରଶାନ୍ତ ମହାସାଗର ଦେଇ ଗତି କରେ। ଏହାକୁ ସମ୍ପୂର୍ଣ୍ଣ ଭାବରେ ବ୍ୟାକ୍ ଅପ୍ କରାଯାଇପାରିବ ନାହିଁ। ତେଣୁ ବିପଦ ରହିଛି।
