ଶ୍ରୀନଗର: ଜମ୍ମୁ-କଶ୍ମୀରର ପାହାଡ଼ିଆ ରାସ୍ତାରେ ଏବେ ଆହୁରି ବେଗରେ ଦୌଡ଼ିବ ବନ୍ଦେ ଭାରତ। ଦୁନିଆର ସବୁଠୁ ଉଚ୍ଚ ରେଲୱେ ବ୍ରିଜ୍ ଚେନାବ ରେଲୱେ ବ୍ରିଜ୍ ଉପରେ ଘଣ୍ଟାପ୍ରତି ୧୦୦ କିଲୋମିଟର ବେଗରେ ଦୌଡ଼ିଛି ବନ୍ଦେ ଭାରତ ଏକ୍ସପ୍ରେସ୍। ଏହା ସହ ଭାରତର ପ୍ରଥମ କେବଲ୍-ଷ୍ଟେ ରେଲୱେ ବ୍ରିଜ୍ ଅଞ୍ଜି ଖଡ୍ଡ ବ୍ରିଜ୍ ମଧ୍ୟ ସମାନ ବେଗରେ ଅତିକ୍ରମ କରିଛି ଟ୍ରେନ୍। ଜମ୍ମୁ-କଶ୍ମୀରର ରିଆସି ଅଞ୍ଚଳରେ ଏହି ଦୃଶ୍ୟ ଦେଖିବାକୁ ମିଳିଛି। କଟରା-ବନିହାଲ ୧୧୧ କିଲୋମିଟର ଲମ୍ବା ବ୍ରଡ୍ଗେଜ୍ ରେଲୱେ ସେକ୍ସନ୍ରେ ଟ୍ରେନ୍ର ସର୍ବାଧିକ ଅନୁମୋଦିତ ବେଗକୁ ୭୫ କିମି ପ୍ରତି ଘଣ୍ଟାରୁ ବଢ଼ାଇ ୧୦୦ କିମି ପ୍ରତି ଘଣ୍ଟା କରାଯାଇଛି। ଏହି ସ୍ପିଡ୍ ବୃଦ୍ଧି ପରେ ବନ୍ଦେ ଭାରତ ପ୍ରଥମ ଥର ପାଇଁ ଉଭୟ ବିଶାଳ ବ୍ରିଜ୍ ଉପରେ ୧୦୦ କିମି ବେଗରେ ଚାଲିଛି।
ଉତ୍ତର ରେଳର ବିଭାଗର ଜମ୍ମୁ ଡିଭିଜନ୍ ଅଧୀନରେ ଥିବା କଟରା-ବନିହାଲ ସେକ୍ସନ୍ରେ ପୂର୍ବରୁ ସର୍ବାଧିକ ୭୫ କିମି ପ୍ରତି ଘଣ୍ଟା ବେଗରେ ଟ୍ରେନ୍ ଚଳାଚଳ କରୁଥିଲା। ରେଲୱେ ପକ୍ଷରୁ ଆବଶ୍ୟକ ସୁରକ୍ଷା ଯାଞ୍ଚ ଓ ସମସ୍ତ ମାନଦଣ୍ଡ ପୂରଣ ପରେ ଚଳିତ ବର୍ଷ ଅଗଷ୍ଟରେ ବେଗ ବଢ଼ାଇବାକୁ ଅନୁମତି ମିଳିଥିଲା। ଏହା ପରେ ଗୁରୁବାର ଏହି ରୁଟ୍ରେ ସ୍ପିଡ୍ ବୃଦ୍ଧିର ସଫଳ ପରୀକ୍ଷଣ କରାଯାଇଥିଲା। ଏବେ ୧୧୧ କିମି ଲମ୍ବା କଟରା-ବନିହାଲ ସେକ୍ସନ୍ରେ ସର୍ବାଧିକ ୧୦୦ କିମି ବେଗରେ ଟ୍ରେନ୍ ଚଳାଇବା ସମ୍ଭବ ହୋଇଛି। ଚେନାବ ନଦୀ ଉପରେ ନିର୍ମିତ ଚିନାବ ରେଲୱେ ବ୍ରିଜ୍ ହେଉଛି ବିଶ୍ୱର ସର୍ବୋଚ୍ଚ ରେଲୱେ ବ୍ରିଜ୍। ଏହି ବିଶାଳ ରେଲୱେ ପୋଲ୍ ଉପରେ ୧୦୦ କିମି ବେଗରେ ବନ୍ଦେ ଭାରତର ଦୌଡ଼ିବା ଏହି ରେଳ ସଂଯୋଗର ନୂଆ କ୍ଷମତାକୁ ଦର୍ଶାଉଛି। କେବଳ ଚେନାବ ବ୍ରିଜ୍ ନୁହେଁ, ଭାରତର ପ୍ରଥମ କେବଲ୍-ଷ୍ଟେ ରେଲୱେ ବ୍ରିଜ୍ ଅଞ୍ଜି ବ୍ରିଜ୍ ଉପରେ ମଧ୍ୟ ବନ୍ଦେ ଭାରତ ସମାନ ବେଗରେ ଗତି କରିଛି। ଏହି ଦୁଇଟି ବ୍ରିଜ୍ ଅତିକ୍ରମ କରିବା ବେଳେ ୧୦୦ କିମି ବେଗ ହାସଲ କରିବାକୁ ରେଲୱେ ଏକ ନୂଆ ରେକର୍ଡ ଭାବେ ଦେଖୁଛି।
ତେବେ ବେଗ ବୃଦ୍ଧିର ସିଧା ପ୍ରଭାବ ଯାତ୍ରୀଙ୍କ ଉପରେ ପଡ଼ିବ। ରେଲୱେ ଅନୁସାରେ, ଟ୍ରେନ୍ର ଯାତ୍ରା ସମୟ କମିବା ସହ ଅପରେସନ୍ ଆହୁରି ସୁଗମ ହୋଇପାରେ। ଯାତ୍ରୀମାନେ ଦ୍ରୁତ, ସୁରକ୍ଷିତ ଏବଂ ଆରାମଦାୟକ ଯାତ୍ରାର ସୁବିଧା ପାଇପାରିବେ। କଟରା-ବନିହାଲ ରେଲୱେ ସେକ୍ସନ୍ ଉଧମପୁର-ଶ୍ରୀନଗର-ବାରାମୁଲା ରେଲୱେ ଲିଙ୍କ୍ (USBRL) ପ୍ରକଳ୍ପର ଏକ ଗୁରୁତ୍ୱପୂର୍ଣ୍ଣ ଅଂଶ। ଏହି ପ୍ରକଳ୍ପର ଲକ୍ଷ୍ୟ ହେଉଛି କାଶ୍ମୀର ଉପତ୍ୟକାକୁ ଦେଶର ଅନ୍ୟ ଅଞ୍ଚଳ ସହ ନିରବଚ୍ଛିନ୍ନ ରେଲ୍ ସଂଯୋଗ ଦେବା। ଏହି ରେଲୱେ ଲାଇନ୍ ସାଧାରଣ ରୁଟ୍ ନୁହେଁ। ପୀର ପଞ୍ଜାଲ୍ ଏବଂ ଲୋୟର ହିମାଳୟର ଅତ୍ୟନ୍ତ କଠିନ ଭୌଗୋଳିକ ଅଞ୍ଚଳ ଦେଇ ଏହା ନିର୍ମିତ ହୋଇଛି। ରାସ୍ତାରେ ରହିଛି ଗଭୀର ଉପତ୍ୟକା, ଖଡ଼ା ପାହାଡ଼, ବଡ଼ ବଡ଼ ନଦୀ ଏବଂ ଜଟିଳ ଭୂ-ଗଠନ। ଏହି କଠିନ ଅଞ୍ଚଳରେ ରେଳ ଲାଇନ୍ ନିର୍ମାଣ ପାଇଁ ଅତ୍ୟାଧୁନିକ ଇଞ୍ଜିନିୟରିଂର ସହାୟତା ନିଆଯାଇଛି। ଏହି ସେକ୍ସନ୍ରେ ୩୩ଟି ସୁଡ଼ଙ୍ଗ, ବିଶ୍ୱର ସର୍ବୋଚ୍ଚ ଚିନାବ ରେଲୱେ ବ୍ରିଜ୍ ଏବଂ ଅଞ୍ଜି ଖଡ୍ଡ କେବଲ୍-ଷ୍ଟେ ବ୍ରିଜ୍ ଭଳି ବଡ଼ ଇଞ୍ଜିନିୟରିଂ ଢାଞ୍ଚା ରହିଛି।
ତେବେ କହିରଖୁଛୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୬ ଜୁନ୍ ୨୦୨୫ରେ ଶ୍ରୀମାତା ବୈଷ୍ଣୋଦେବୀ କଟରାରୁ କଟରା-ଶ୍ରୀନଗର ବନ୍ଦେ ଭାରତ ଏକ୍ସପ୍ରେସ୍କୁ ସବୁଜ ପତାକା ଦେଖାଇଥିଲେ। ଏବେ କଟରା-ବନିହାଲ ସେକ୍ସନ୍ରେ ବେଗ ୧୦୦ କିମି ପ୍ରତି ଘଣ୍ଟା ହେବା ପରେ କାଶ୍ମୀର ଯାତ୍ରା ଆହୁରି ଦ୍ରୁତ ହେବା ସହ USBRL ପ୍ରକଳ୍ପରେ ଟ୍ରେନ୍ ଚଳାଚଳ ମଧ୍ୟ ଆହୁରି ସୁଗମ ହେବ ବୋଲି ଆଶା କରାଯାଉଛି।
