
କଟକ: କଟକ ସହରରେ ଆୟୋଜିତ ହେବାକୁ ଥିବା ବାଲିଯାତ୍ରା ପାଇଁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଭିଡ଼ ଉପରେ ତୀକ୍ଷ୍ଣ ନଜର ରଖିବା ପାଇଁ ପ୍ରାୟ ୧,୪୦୦ଟି ‘ଏଆଇ’ (AI – କୃତ୍ରିମ ବୁଦ୍ଧିମତ୍ତା) ଯୁକ୍ତ କ୍ୟାମେରା ଏବଂ ୩୮ଟି ୱାଚ୍ଟାୱାର ସ୍ଥାପନ କରାଯାଇଛି।
ନଭେମ୍ବର ୨୪ ତାରିଖରୁ ଆରମ୍ଭ ହେବାକୁ ଥିବା ଏହି ଆଠ ଦିନିଆ ଉତ୍ସବ ସମୟରେ ଦର୍ଶକଙ୍କ ସୁରକ୍ଷା ଏବଂ ଆଇନଶୃଙ୍ଖଳା ରକ୍ଷା କରିବା ପାଇଁ ବ୍ୟାପକ ପୋଲିସ ମୁତୟନ କରାଯିବ। ସୁରକ୍ଷା ବ୍ୟବସ୍ଥାର ଅଂଶବିଶେଷ ଭାବରେ ମେଳା ପଡ଼ିଆ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ସ୍ଥାନଗୁଡ଼ିକରେ ପୋଲିସର ୭୦ ପ୍ଲାଟୁନରୁ ଅଧିକ ଫୋର୍ସ ଏବଂ ୪୦୦ ଅଧିକାରୀଙ୍କୁ ନିୟୋଜିତ କରାଯିବ।
କଟକ ଡିସିପି ଋଷିକେଶ ଜ୍ଞାନଦେଓ ଖିଲାରୀଙ୍କ ସୂଚନା ଅନୁଯାୟୀ, ‘ଏଆଇ’ ଯୁକ୍ତ କ୍ୟାମେରାଗୁଡ଼ିକ ଜନସମାଗମ ଉପରେ ନଜର ରଖିବା ସହ ସମ୍ଭାବ୍ୟ ସୁରକ୍ଷା ସମସ୍ୟାକୁ ଚିହ୍ନଟ କରିବାରେ ସାହାଯ୍ୟ କରିବ। ଏହା ସହିତ ୩୮ଟି ୱାଚ୍ଟାୱାରରେ ମୁତୟନ କର୍ମଚାରୀମାନେ ୨୪ ଘଣ୍ଟିଆ ନିରୀକ୍ଷଣ ଜାରି ରଖିବେ।
ଏହା ବ୍ୟତୀତ କମିଶନରେଟ୍ ପୋଲିସ ପକ୍ଷରୁ ବାଲିଯାତ୍ରା ପାଇଁ ଏକ ବିସ୍ତୃତ ଟ୍ରାଫିକ ପରାମର୍ଶାବଳୀ ଜାରି କରାଯାଇଛି। ଏହା ଅନୁଯାୟୀ ପ୍ରତିଦିନ ଅପରାହ୍ନ ୨ଟାରୁ ଆରମ୍ଭ କରି ଭିଡ଼ ହଟିବା ପର୍ଯ୍ୟନ୍ତ କଟକ ସହର ଭିତରେ ଓ ଆଖପାଖ ଅଞ୍ଚଳରେ ଗାଡ଼ି ଚଳାଚଳ ଉପରେ କଟକଣା ଲାଗୁ କରାଯାଇଛି। ଜାଣନ୍ତୁ କେଉଁ ପଟେ ଯାତାୟତ କରିବେ…
