ଗୁଣ୍ଟୁର: ଲୋକସଭା ନିର୍ବାଚନର ଫଳାଫଳ ଆସିବାର ୩ ଦିନ ବିତିଗଲାଣି। ଏଥର ବିଜେପି ପୂର୍ଣ୍ଣ ସଂଖ୍ୟାଗରିଷ୍ଠତା ହାସଲ କରି ନାହିଁ ଏବଂ ସହଯୋଗୀମାନଙ୍କ ସହାୟତାରେ ସରକାର ଗଠନ କରିବାକୁ ଯାଉଛି। ଏଥିପାଇଁ ତେଲୁଗୁ ଦେଶମ ପାର୍ଟି (ଟିଡିପି) ମଧ୍ୟ ବିଜେପିକୁ ସମର୍ଥନ ଘୋଷଣା କରିଛି। ଟିଡିପି ମୁଖ୍ୟ ଚନ୍ଦ୍ରବାବୁ ନାଇଡୁ ନରେନ୍ଦ୍ର ମୋଦୀଙ୍କୁ ଭେଟି ସମର୍ଥନ ପତ୍ର ଦାଖଲ କରିଛନ୍ତି।
ଯେତେବେଳେ ଜୁନ୍ ୪ ରେ ଲୋକସଭା ନିର୍ବାଚନର ଫଳାଫଳ ଆସିଲା, ସେତେବେଳେ ବିଜେପି ପୂର୍ଣ୍ଣ ସଂଖ୍ୟାଗରିଷ୍ଠତା ନ ପାଇଥିବାରୁ ଷ୍ଟକ୍ ମାର୍କେଟ୍ ଧରାଶାୟୀ ହୋଇଥିଲା। ୩୦ ଲକ୍ଷ କୋଟିରୁ ଅଧିକ ମୂଲ୍ୟର ନିବେଶକଙ୍କ ଟଙ୍କା ନଷ୍ଟ ହୋଇଯାଇଥିଲା। ଯଦିଓ ଏହା ପରେ ବଜାରରେ ଉନ୍ନତି ଘଟିଛି, କିଛି ନିବେଶକ ଏପର୍ଯ୍ୟନ୍ତ ଅଣ୍ଟା ସଳଖିବାକୁ ସକ୍ଷମ ହୋଇ ନାହାନ୍ତି। ଅନ୍ୟପକ୍ଷରେ ଚନ୍ଦ୍ରବାବୁ ନାଇଡୁଙ୍କ ପତ୍ନୀ ୭ ଦିନ ମଧ୍ୟରେ ସେୟାର ବଜାରରୁ ୫୮୪କୋଟି ଟଙ୍କା ରୋଜଗାର କରିଛନ୍ତ।
ଚନ୍ଦ୍ରବାବୁ ନାଇଡୁଙ୍କ ପତ୍ନୀ ନାରା ଭୁବନେଶ୍ୱରୀ ହେରିଟେଜ୍ ଫୁଡ୍ସରେ ୨୪.୩୭ ପ୍ରତିଶତ ଅଂଶଧନ ପାଇଛନ୍ତି। ସେ ଏହି କମ୍ପାନୀର ୨,୨୬,୧୧.୫୨୫ ଅଂଶଧନ ରଖିଛନ୍ତି। ନିର୍ବାଚନ ଫଳାଫଳ ଦିନ, ଯେତେବେଳେ ଷ୍ଟକ୍ ମାର୍କେଟ୍ ଖସିୁଥିଲା ଏବଂ ନିବେଶକଙ୍କ ଟଙ୍କା ବୁଡ଼ିଯାଉଥିଲା ନାରା ଭୁବନେଶ୍ୱରୀଙ୍କ ସମ୍ପତ୍ତି ବୃଦ୍ଧି ପାଉଥିଲା।
ଏହାପୂର୍ବରୁ ମେ’ ୩୧ ରେ, ଏହି କମ୍ପାନୀର ଗୋଟିଏ ସେୟାର ମୂଲ୍ୟ ୪୦୨.୯୦ ଟଙ୍କା ଥିଲା। ଏହି ଅନୁଯାୟୀ, ନାରା ଭୁବନେଶ୍ୱରୀଙ୍କ ଏହି କମ୍ପାନୀରେ ପ୍ରାୟ ୯୧୧ କୋଟି ଟଙ୍କା ଥିଲା। ଆଜି ଅର୍ଥାତ୍ ଶୁକ୍ରବାର ଦିନ, ଗୋଟିଏ ସେୟାରର ମୂଲ୍ୟ ୬୬୧.୨୫ ଟଙ୍କା ହୋଇଛି। ସେହି ଅନୁଯାୟୀ, ଶୁକ୍ରବାର ଏହି କମ୍ପାନୀରେ ତାଙ୍କର ଟଙ୍କା ପ୍ରାୟ ୧୪୯୫ କୋଟି ଟଙ୍କାକୁ ବୃଦ୍ଧି ପାଇଛି। ଏଭଳି ପରିସ୍ଥିତିରେ ନାରା ଭୁବନେଶ୍ୱରୀ ଏହି ୭ ଦିନରେ ପ୍ରାୟ ୫୮୪ କୋଟି ଟଙ୍କା ଲାଭ କରିଛନ୍ତି। ଏହି କମ୍ପାନୀର ପ୍ରତିଷ୍ଠାତା ହେଉଛନ୍ତି ଚନ୍ଦ୍ରବାବୁ ନାଇଡୁ ଏବଂ ଏହାର କାର୍ଯ୍ୟାଳୟ ହାଇଦ୍ରାବାଦରେ ଅଛି।
ଆନ୍ଧ୍ରପ୍ରଦେଶରେ ଲୋକସଭା ନିର୍ବାଚନ ଏବଂ ବିଧାନସଭା ନିର୍ବାଚନରେ ଟିଡିପି ଭଲ ପ୍ରଦର୍ଶନ କରିଛି। ଟିଡିପି ମଧ୍ୟ କେନ୍ଦ୍ରରେ ଯୋଗଦେବାକୁ ଯାଉଛି। ଏହା ବ୍ୟତୀତ ବିଧାନସଭା ନିର୍ବାଚନର ଫଳାଫଳ ମଧ୍ୟ ରାଜ୍ୟରେ ଆସିଛି ଏବଂ ଟିଡିପି ଏଥିରେ ସରକାର ଗଠନ କରିବାକୁ ଯାଉଛି। ଟିଡିପିର ଏହି ଭଲ ପ୍ରଦର୍ଶନ ଯୋଗୁ ହେରିଟେଜ୍ ଫୁଡ୍ସର ସେୟାର ଏବେ ଏକ ରକେଟରେ ପରିଣତ ହୋଇଛି।
ହେରିଟେଜ୍ ଫୁଡ୍ ସେୟାରଗୁଡିକ ମାତ୍ର ୩ ଦିନରେ ୪୪ ପ୍ରତିଶତ ରିଟର୍ଣ୍ଣ ଦେଇଛି।| ଜୁନ୍ ୪ ରେ ଯେତେବେଳେ ବଜାର ବନ୍ଦ ହେଲା, ଗୋଟିଏ ସେୟାରର ମୂଲ୍ୟ ୪୫୯ ଟଙ୍କା ଥିଲା। ଆଜି ଅର୍ଥାତ୍ ଶୁକ୍ରବାର ଅପରାହ୍ନ ପ୍ରାୟ ୧ ଟା ସୁଦ୍ଧା ଏହାର ମୂଲ୍ୟ ପ୍ରାୟ ୬୬୧.୨୫ ଟଙ୍କାକୁ ବୃଦ୍ଧି ପାଇଛି। ଏଭଳି ପରିସ୍ଥିତିରେ ଏହି ଷ୍ଟକ୍ ଜୁନ୍ ୫ରୁ ୪୪ ପ୍ରତିଶତ ରିଟର୍ଣ୍ଣ ଦେଇଛି। ଏହା ଗୋଟିଏ ବର୍ଷରେ ୧୦୦ ପ୍ରତିଶତରୁ ଅଧିକ ରିଟର୍ଣ୍ଣ ଦେଇଛି। ବର୍ତ୍ତମାନ କମ୍ପାନୀର ବଜାର କ୍ୟାପ୍ ୬.୧୪ ହଜାର କୋଟି ଟଙ୍କା।
