ଭୁବନେଶ୍ୱର: ଭୁବନେଶ୍ୱରର ଇସ୍କନ ମନ୍ଦିରର ରଥଯାତ୍ରା, ବାହୁଡା ଯାତ୍ରା ଏବଂ ସୁନାବେଶ ଉତ୍ସବକୁ ଦୃଷ୍ଟିରେ ରଖି, କମିସନରେଟ୍ ପୁଲିସ ଭକ୍ତମାନଙ୍କ ପାଇଁ ସୁଗମ ଯାନବାହାନ ଚଳାଚଳ ଏବଂ ଅସୁବିଧାମୁକ୍ତ ଅଂଶଗ୍ରହଣ ସୁନିଶ୍ଚିତ କରିବା ପାଇଁ ଏକ ବିସ୍ତୃତ ଟ୍ରାଫିକ୍ ପରାମର୍ଶ ଜାରି କରିଛି। ଇସ୍କନ ମନ୍ଦିରରେ ରଥଯାତ୍ରା କାର୍ଯ୍ୟକ୍ରମ ଯଥାକ୍ରମେ ଜୁନ୍ ୨୭, ଜୁଲାଇ ୫ ଏବଂ ଜୁଲାଇ ୬ ରେ ଅନୁଷ୍ଠିତ ହେବାକୁ ଯାଉଛି। ଇସ୍କନ୍ ମନ୍ଦିର ପରିସରରେ ଶ୍ରଦ୍ଧାଳୁଙ୍କ ବିପୁଳ ସମାଗମ ହେବାର ଆଶା କରାଯାଉଛି, ଯାହା ଫଳରେ ପୋଲିସ ଆଖପାଖ ଅଞ୍ଚଳରେ ଟ୍ରାଫିକ୍ ପରିବର୍ତ୍ତନ ଏବଂ କଟକଣା ଜାରି କରିଛି।
ରଥଯାତ୍ରା ଜୁନ୍ ୨୭ରେ ହେବ ଏବଂ ବାହୁଡା ଯାତ୍ରା ଜୁଲାଇ ୫ରେ ହେବ। ଏନେଇ ପାଇଁ ଟ୍ରାଫିକ୍ କଟକଣା ଜାରି କରାଯାଇଛି। ଉଭୟ ଦିନ ଅପରାହ୍ନ ୩ଟାରୁ, ଖୋର୍ଦ୍ଧା ପାର୍ଶ୍ୱରୁ ଆସୁଥିବା ଭାରୀ ଯାନଗୁଡ଼ିକୁ ରଥଗୁଡ଼ିକ ସିଆରପି ଛକ ଅତିକ୍ରମ ନ କରିବା ପର୍ଯ୍ୟନ୍ତ ଅଗ୍ନିଶମ ଷ୍ଟେସନ ଛକ ଆଡକୁ ସର୍ଭିସ୍ ରୋଡ୍ ବ୍ୟବହାର କରିବାକୁ ଅନୁମତି ଦିଆଯିବ ନାହିଁ।
ଏହି ସମୟ ମଧ୍ୟରେ ଡିଏଭି ସ୍କୁଲ, ୟୁନିଟ୍-୮ ରୁ ମାଉସୀମା ମନ୍ଦିର ଏବଂ ସିଆରପି ସ୍କୋୟାର ପର୍ଯ୍ୟନ୍ତ ତଥା ସିଆରପି ଛକରୁ ଇସ୍କନ ମନ୍ଦିର ଆଡକୁ ଯାନବାହାନ ଚଳାଚଳ ନେଇ କଟକଣା ଜାରି ରହିବ। ରଥଗୁଡ଼ିକ ଅତିକ୍ରମ ନ କରିବା ପର୍ଯ୍ୟନ୍ତ କସ୍ତୁରବା ସ୍କୁଲ ପାର୍ଶ୍ୱ ଏବଂ ନୟାପଲ୍ଲୀ ଅଣ୍ଡରପାସ୍ ପାର୍ଶ୍ୱରୁ ସିଆରପି ଛକ ଆଡକୁ ଯାଉଥିବା ସର୍ଭିସ୍ ରୋଡରେ ଯାନବାହନଗୁଡ଼ିକୁ ଚଳାଚଳ କରିବାକୁ ଅନୁମତି ଦିଆଯିବ ନାହିଁ।
ସେହିପରି ସୁନାବେଶ ପାଇଁ ଜୁଲାଇ ୬ରେ ଟ୍ରାଫିକ୍ କଟକଣା ଜାରି କରାଯାଇଛି। ସନ୍ଧ୍ୟା ୫ଟାରୁ ସୁନାବେଶ ଦର୍ଶନ ଶେଷ ହେବା ପର୍ଯ୍ୟନ୍ତ କୌଣସି ଯାନବାହାନକୁ ସିଆରପି ଛକରୁ ଇସ୍କନ ମନ୍ଦିର ଆଡକୁ ଯିବାକୁ ଅନୁମତି ଦିଆଯିବ ନାହିଁ। କମିସନରେଟ୍ ପୁଲିସ ସ୍ପଷ୍ଟ କରିଛି ଯେ, ଏହି କଟକଣା ପୁଲିସ, ଅଗ୍ନିଶମ ଏବଂ ଆମ୍ବୁଲାନ୍ସ ଭଳି ଜରୁରୀକାଳୀନ ସେବା ଯାନ ପାଇଁ ପ୍ରଯୁଜ୍ୟ ହେବ ନାହିଁ।
ଅସୁବିଧାକୁ ଏଡାଇବା ପାଇଁ କମିସନରେଟ୍ ପୁଲିସ ଜନସାଧାରଣଙ୍କୁ ନିୟମାବଳୀ ସହିତ ସହଯୋଗ କରିବାକୁ ଏବଂ ସେହି ଅନୁସାରେ ସେମାନଙ୍କର ଯାତ୍ରା ପଥ ଯୋଜନା କରିବାକୁ ପରାମର୍ଶ ଦେଇଛି।