ଭୁବନେଶ୍ୱର,୬।୭: ଓଡ଼ିଶା ଭାରତୀୟ ଜନତା ପାର୍ଟି (ଭାଜପା) ରାଜ୍ୟ ସଭାପତି ଏବଂ ରାଷ୍ଟ୍ରୀୟ ପରିଷଦ ସଦସ୍ୟ ନିର୍ବାଚନ ପାଇଁ ପ୍ରସ୍ତୁତି ଜୋରଦାର ହୋଇଛି। ଏହି ନିର୍ବାଚନ ପାଇଁ ଚୂଡ଼ାନ୍ତ ଭୋଟର ତାଲିକା ପ୍ରକାଶ ପାଇଛି, ଯେଉଁଥିରେ ମୋଟ ୨୭୩ ଜଣ ଭୋଟରଙ୍କ ନାମ ସାମିଲ ହୋଇଛି। ଏହି ତାଲିକାରେ ଜିଲା ସଭାପତି, ରାଜ୍ୟ ପରିଷଦ ସଦସ୍ୟ ଏବଂ ନିର୍ବାଚିତ ବିଧାୟକ ଓ ସାଂସଦଙ୍କ ମଧ୍ୟରୁ ୧୦ ପ୍ରତିଶତଙ୍କୁ ସ୍ଥାନ ଦିଆଯାଇଛି।
ଭାଜପା ରାଷ୍ଟ୍ରୀୟ ନିର୍ବାଚନ ଅଧିକାରୀ ଡ. କେ. ଲକ୍ଷ୍ମଣଙ୍କ ନିର୍ଦ୍ଦେଶ ଅନୁସାରେ ଏହି ନିର୍ବାଚନ ପ୍ରକ୍ରିୟା ଆରମ୍ଭ ହୋଇଛି। ରାଜ୍ୟ ନିର୍ବାଚନ ଅଧିକାରୀ ତଥା ବାଲେଶ୍ୱର ସାଂସଦ ପ୍ରତାପ ଷଡ଼ଙ୍ଗୀଙ୍କ ସୂଚନା ଅନୁଯାୟୀ, ଆସନ୍ତାକାଲି ଅର୍ଥାତ୍ ଜୁଲାଇ ୭ରେ ନାମାଙ୍କନ ଦାଖଲ ହେବ। ଯଦି ଏକାଧିକ ପ୍ରାର୍ଥୀ ନାମାଙ୍କନ ଦାଖଲ କରନ୍ତି, ତେବେ ଜୁଲାଇ ୮ରେ ଗଣତାନ୍ତ୍ରିକ ପଦ୍ଧତିରେ ନିର୍ବାଚନ ଅନୁଷ୍ଠିତ ହୋଇ ଫଳାଫଳ ପ୍ରକାଶ ପାଇବ।
ଭାଜପା ରାଜ୍ୟ ପ୍ରଭାରୀ ବିଜୟ ସିଂ ପାଲ ତୋମାରଙ୍କ ସୂଚନା ଅନୁଯାୟୀ, ଏହି ନିର୍ବାଚନ ପାଇଁ ରାଷ୍ଟ୍ରୀୟ ପର୍ଯ୍ୟବେକ୍ଷକ ଭାବେ ବିହାରର ସାଂସଦ ସଞ୍ଜୟ ଜୟସ୍ୱାଲ ଜୁଲାଇ ୭ରେ ଓଡ଼ିଶା ଆସି ନିର୍ବାଚନ ପ୍ରକ୍ରିୟାର ତଦାରଖ କରିବେ।
ସୂଚନା ଅନୁସାରେ, ଏହି ନିର୍ବାଚନରେ ଡି. ପୁରନ୍ଦେଶ୍ୱରୀ, ନିର୍ମଳା ସୀତାରମଣ ଏବଂ ଭନତୀ ଶ୍ରୀନିବାସନଙ୍କ ନାମ ରାଜ୍ୟ ସଭାପତି ପଦବୀ ପାଇଁ ଚର୍ଚ୍ଚାରେ ରହିଛି। ଏହା ପୂର୍ବରୁ ୬ଟି ରାଜ୍ୟର ବିଜେପି ସଭାପତି ନିର୍ବାଚନ ସମ୍ପନ୍ନ ହୋଇଥିବା ବେଳେ ବର୍ତ୍ତମାନ ଜାତୀୟ ସଭାପତି ନିର୍ବାଚନ ପାଇଁ ମଧ୍ୟ ପ୍ରସ୍ତୁତି ଚାଲିଛି। ନାମାଙ୍କନ ପରେ ନିର୍ବାଚନ ହେବ ନା ସହମତିରେ ସଭାପତି ଚୟନ ହେବ, ତାହା ସ୍ପଷ୍ଟ ହେବ।
