ନୂଆଦିଲ୍ଲୀ :କୁକୁର ପାଇଁ ବଞ୍ଚିଲା ୬୭ ଜଣଙ୍କ ଜୀବନ। ହିମାଚଳ ପ୍ରଦେଶ ମଣ୍ଡି ଅଂଚଳରେ ଜାରି ରହିଛି ବର୍ଷାର ତାଣ୍ଡବ । ବାଦଲ ଫଟା ବର୍ଷା ସାଙ୍ଗକୁ ଭୂସ୍ଖଳନ ଲୋକଙ୍କ ପାଇଁ ପାଲଟିଛି ମୁଖ୍ୟ ସମସ୍ୟା । ଗତ ୧୫ ଦିନରେ ଏକାଧିକ ଥର ବାଦଲ ଫଟା ବର୍ଷା, ବନ୍ୟା ଓ ପାହାଡ଼ରୁ ମାଟି ଅତଡ଼ା ଧସିବା ଦ୍ବାରା ଏହି ଅଂଚଳରେ ବ୍ୟାପକ କ୍ଷୟକ୍ଷତି ହୋଇଛି । ଏହା ମଧ୍ୟରେ କୁକୁର ପାଇଁ ବଞ୍ଚି ଯାଇଛି ଅନେକ ଜୀବନ । ଘଟଣା ଅନୁଯାୟୀ, ସିୟାଥି ଗାଁର କୁକୁର ଭୁକିବା କାରଣରୁ ଏମାନଙ୍କ ଜୀବନ ବଞ୍ଚି ଯାଇଛି । ବନ୍ୟା ପାଣି ମାଡି ଆସିବାରୁ ପୂରା ଗାଁଟି ଭାସିଯାଇ ମାଟିରେ ମିଶି ଯାଇଛି ।
ଗତ ଜୁନ ୩୦ରେ ମଣ୍ଡିରେ ହୋଇଥିବା ଭୟଙ୍କର ବାଦଲଫଟା ବର୍ଷା, ରାତିରେ ଏଭଳି ଚମତ୍କାର ଘଟଣା ଘଟିଛି । ରାତି ପ୍ରାୟ ୧ଟାରେ ମଣ୍ଡିରେ ହୋଇଥିଲା ବାଦଲ ଫଟା ବର୍ଷା। ଫଳରେ ସେଠାରେ ଦେଖା ଦେଇଥିଲା ଅଚାନକ୍ ବନ୍ୟା, ଏହା ପଛକୁ ପାହାଡରୁ ମାଟି ଅତଡ଼ା ଧସିଥିଲା । ଏହି ସମୟରେ ସିୟାଥି ଗାଁ ଲୋକେ ଘରେ ଶୋଇଥିଲେ । ଗାଁ ମୁହାଁ ବନ୍ୟା ଦେଖି କୁକୁରମାନେ ଏକାସାଙ୍ଗେ ଅତି ଜୋରରେ ବିକଟାଳ ଭୁକିବାରେ ଲାଗିଥିଲେ । ଫଳରେ ଚମକି ପଡି ଗାଁର ୨୦ ପରିବାର ରାତି ଅଧରେ ଉଠି ଯାଇଥିଲେ । ଆଉ ତୁରନ୍ତ ସୁରକ୍ଷିତ ସ୍ଥାନକୁ ପଳାଇ ଯାଇଥିଲେ ।
ସିୟାଥି ଗ୍ରାମବାସୀ କହିଛନ୍ତି କୁକୁର ଭୁକିବା ଶୁଣି ସେମାନେ ସତର୍କ ହୋଇ ଯାଇଥିଲେ । ଏହାପରେ ହଠାତ ଭୂସ୍ଖଳନ ହୋଇ ଗାଁ ମାଟିରେ ମିଶିଯାଇଥିଲା । କେବଳ ୩ରୁ ୪ଟି ଘରକୁ ଛାଡ଼ିଦେଲେ ପୂରା ଗାଁ ମାଟିରେ ମିଶିଯାଇଛି । ହିମାଚଳ ପ୍ରଦେଶରେ ମୌସୁମୀ ଜନିତ ବର୍ଷା ଓ ବନ୍ୟାରେ ବର୍ତ୍ତମାନ୍ ୭୮ ଜଣଙ୍କ ମୃତ୍ୟୁ ହେଲାଣି ।