ବାଲିଆପାଳ : ବାଲିଆପାଳ ଥାନା ଅନ୍ତର୍ଗତ ଡଗରା ବେଳାଭୂମିରେ ଜଣେ ବଙ୍ଗୀୟ ଦମ୍ପତ୍ତି ପର୍ଯ୍ୟଟକଙ୍କୁ ସ୍ଥାନୀୟ ଅଂଚଳର କିଛି ଯୁବକ ଅସଦାଚରଣ କରିବାର ଭିଡିଓ ମୋବାଇଲରୁ ମୋବାଇଲ ଭାଇରାଲ ହେବାରେ ଲାଗିଛି । ଅନ୍ୟପଟେ ଯୁବତୀଙ୍କ ଏତଲା କ୍ରମେ ବାଲିଆପାଳ ପୋଲିସ ମାମଲା ରୁଜ୍ଜୁ କରି ଆଜି ଦୁଇଜଣଙ୍କୁ ଗିରଫ କରଛି । ଅଭିଯୋଗ ମୁତାବକ ରବିବାର ପଶ୍ଚିମବଙ୍ଗ ବାଙ୍କୁଡା ଜିଲ୍ଲା ଅନ୍ତର୍ଗତ ବିଷ୍ଣୁପୁର ଗ୍ରାମର ଜନୈକ ଦମ୍ପତ୍ତି ଡଗରା ବେଳାଭୂମିକୁ ବୁଲିବାକୁ ଆସିଥିଲେ । ସେମାନେ ବେଳାଭୂମିରେ ବୁଲୁଥିବା ସମୟରେ ବେଳାଭୂମିରେ ବସି ମଦ୍ୟପାନ କରୁଥିବା ଚାରି ପାଞ୍ଚଜଣ ସ୍ଥାନୀୟ ଯୁବକ ଉକ୍ତ ଦମ୍ପତ୍ତିଙ୍କୁ ଅଶାଳୀନ ମନ୍ତବ୍ୟ ଦେଇଥିଲେ । ତେବେ ଏହା ଶୁଣିପାରି ଏହି ଦମ୍ପତ୍ତି ସେମାନଙ୍କୁ କାହିଁକି ଖରାପ ବ୍ୟବହାର କରୁଛ ବୋଲି ପଚାରିବାରୁ ଉକ୍ତ ଯୁବକମାନେ ଯୁବକ ଜଣଙ୍କୁ ମାଡ ମାରିବା ସହ ମହିଳାଙ୍କୁ ଖରାପ ବ୍ୟବହାର ପ୍ରଦର୍ଶନ କରିଥିଲେ । ଏପରିକି ମହିଳା ଜଣଙ୍କୁ ତଳେ ମାଡ ମାରିବାକୁ ପଛେଇ ନଥିଲେ । ଅନ୍ୟ କିଛି ପର୍ଯ୍ୟଟକଙ୍କ ହସ୍ତକ୍ଷେପ ପରେ ଉକ୍ତ ଦମ୍ପତ୍ତି ସେହି ଯୁବକ ମାନଙ୍କ ଠାରୁ ଉଦ୍ଧାର ପାଇଥିଲେ ।
ଏନେଇ ପିଡୀତା ମହିଳା ଶ୍ରାବଣୀ କୁଣ୍ଡୁ ନାଗ ବାଲିଆପାଳ ଥାନାରେ ଲିଖିତ ଅଭିଯୋଗ କରିଥିଲେ । ବାଲିଆପାଳ ପୋଲିସ ଏହି ଘଟଣାରେ ସୋମବାର ୧୬୧/୨୫ରେ ଏକ ମାମାଲା ରୁଜ୍ଜୁ କରି ତଦନ୍ତ ଆରମ୍ଭ କରିଥିଲା ଆଜି ଏହି ଘଟଣାର ଭିଡିଓ ଭାଇରାଲ ହେବା ସହ ଘଟଣାକୁ ବିଭିନ୍ନ ମହଲରୁ ତୀବ୍ର ନିନ୍ଦା କରାଯାଇଥିଲା । ଅପରାହ୍ନରେ ପୋଲିସ ଏହି ଘଟନାରେ ସଂପୃକ୍ତ ଜାମତକୁଲା ଗ୍ରାମର ବାବୁ ମହୁରୀ,ଏବଂ କାଳୀପଦା ଅଞ୍ଚଳର ଦିଲ୍ଲୀପ ଦାସଙ୍କୁ ଗିରଫ କରିଛି । ଆସନ୍ତାକାଲି ଏହି ଦୁଇଜଣଙ୍କୁ କୋର୍ଟ ଚାଲାଣ କରାଯିବା ସହ ଏଥିରେ ସଂପୃକ୍ତ ଅନ୍ୟମାନଙ୍କୁ ମଧ୍ୟ ଗିରଫ କରାଯିବ ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି । ସୂଚନା ଯୋଗ୍ୟ ଡଗରା ବେଳଭୂମିରେ ପ୍ରତିଦିନ ବହୁ ପର୍ଯ୍ୟଟକ ଆସୁଥିବାବେଳେ ସେଠାରେ ଆଇନ ସୃଙ୍ଖଳା ପରିସ୍ଥିତି ପାଇଁ କୌଣସି ପୋଲିସ ରହୁନଥିବାରୁ ବେଳାଭୂମିରେ ବହୁ ବେଆଇନ ମଦ ଦୋକାନ ଖୋଲିବା ସହ ମଦ୍ୟପଙ୍କ ଆଡ୍ଡା ଜମ୍ମୁଛି । ବିଭିନ୍ନ ସମୟରେ ଏହିଭଳି ଛୋଟ ବଡ ଗଣ୍ଡଗୋଳ ହେବା ସହ ପୂର୍ବରୁ ଏହିଭଳି ମାନ ଘଟଣା ଘଟିଛି । ତୁରନ୍ତ ବେଳାଭୂମିରେ ଏକ ମୁଦ୍ରୀକ ଥାନା ପ୍ରତିଷ୍ଠା ପାଇଁ ବୁଦ୍ଧିଜିବୀ ମହଲରେ ଦାବି ହୋଇଛି ।