ୱାସିଂଟନ୍: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ୟୁରୋପୀୟ ସଂଘ (ଇୟୁ) ମଧ୍ୟରେ ଏକ ପ୍ରମୁଖ ବାଣିଜ୍ୟ ଚୁକ୍ତି ହୋଇଥିବା ଜାତୀୟ ଗଣମାଧ୍ୟମର ରିପୋର୍ଟରୁ ଜଣାଯାଇଛି । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ଘୋଷଣା କରିଛନ୍ତି । ଟ୍ରମ୍ପ ଏହାକୁ ଏପର୍ଯ୍ୟନ୍ତ ସର୍ବୋତ୍ତମ ବାଣିଜ୍ୟ ଚୁକ୍ତି ବୋଲି ମଧ୍ୟ କହିଛନ୍ତି । ସେ କହିଛନ୍ତି, ଉଭୟ ପକ୍ଷ ଏଥିରୁ ଲାଭ ପାଇବେ । ଟ୍ରମ୍ପ ବାଣିଜ୍ୟ ଚୁକ୍ତି ସମୟରେ ୟୁରୋପୀୟ ସଂଘ ଉପରେ ୧୫ ପ୍ରତିଶତ ଶୁଳ୍କ ଲାଗୁ କରିଛନ୍ତି । ରିପୋର୍ଟ ଅନୁଯାୟୀ, ସେ କହିଛନ୍ତି ଯେ ଏହି ଚୁକ୍ତି ସମସ୍ତ କ୍ଷେତ୍ରର ବଜାର ଖୋଲିବ ।
ୟୁରୋପୀୟ ସଂଘ ବାଣିଜ୍ୟ ଚୁକ୍ତି ମାଧ୍ୟମରେ ଆମେରିକାରୁ ସାମରିକ ଉପକରଣ କ୍ରୟ ବୃଦ୍ଧି କରିବ । ଏହା ଆମେରିକାରୁ ୧୫୦ ବିଲିୟନ ଡଲାର ମୂଲ୍ୟର ଶକ୍ତି ମଧ୍ୟ କ୍ରୟ କରିବ । ୟୁରୋପୀୟ ମୁଖ୍ୟ ଉର୍ସୁଲା ଭନ୍ ଡେର ଲେଏନ୍ କହିଛନ୍ତି ଯେ ଆମେରିକା ସହିତ ଏକ ବହୁତ ଭଲ ଚୁକ୍ତି ହୋଇଛି ।
ବାଣିଜ୍ୟ ଚୁକ୍ତି ଘୋଷଣା କରିବା ସମୟରେ ଆମେରିକାର ରାଷ୍ଟ୍ରପତି ଟ୍ରମ୍ପ କହିଛନ୍ତି ଯେ ୟୁରୋପୀୟ ସଂଘ ଆମେରିକାରେ ୬୦୦ବିଲିୟନ ଡଲାର ନିବେଶ କରିବ । ଏହି ଚୁକ୍ତି ଅନୁଯାୟୀ, ଇସ୍ପାତ ଏବଂ ଆଲୁମିନିୟମ ଉପରେ ପୂର୍ବରୁ ବଳବତ୍ତର ଥିବା ଶୁଳ୍କ ବ୍ୟବସ୍ଥା ଜାରି ରହିବ। ଚିପ୍ସ କିମ୍ବା ସେମିକଣ୍ଡକ୍ଟର କ୍ଷେତ୍ର ସମ୍ପର୍କରେ ଘୋଷଣା ଆଗାମୀ ଦୁଇ ସପ୍ତାହ ମଧ୍ୟରେ କରାଯାଇପାରିବ ।
ସୂଚନାଯୋଗ୍ୟ ଡୋନାଲ୍ଡ ଟ୍ରମ୍ପ ଅନେକ ଦେଶ ଉପରେ ଶୁଳ୍କ ବୋମା ପକାଇଛନ୍ତି। ଅନ୍ୟପଟରେ କିଛି ଦେଶକୁ ଆଶ୍ବସ୍ଥି ମଧ୍ୟ ଦେଇଛନ୍ତି। ସେ ଚୀନ ଉପରେ ୩୪ ପ୍ରତିଶତ ଏବଂ ଭିଏତନାମ ଉପରେ ୪୬ପ୍ରତିଶତ ଶୁଳ୍କ ଲଗାଇଛନ୍ତି। ପାକିସ୍ତାନ ଉପରେ ୨୯ ପ୍ରତିଶତ ଏବଂ ବାଂଲାଦେଶ ଉପରେ ୩୭ ପ୍ରତିଶତ ଶୁଳ୍କ ଲଗାଇଛନ୍ତି। ଟ୍ରମ୍ପ ପୂର୍ବରୁ ବ୍ରାଜିଲ ଉପରେ ୧୦ ପ୍ରତିଶତ ଶୁଳ୍କ ଲଗାଇଥିଲେ। କିନ୍ତୁ ଏବେ ସେ ଏହାକୁ ୫୦ ପ୍ରତିଶତକୁ ବୃଦ୍ଧି କରିଛନ୍ତି। ଏହା ବ୍ରାଜିଲର ଅର୍ଥନୀତିକୁ ଖରାପ ଭାବରେ ପ୍ରଭାବିତ କରିପାରେ ବୋଲି ମଧ୍ୟ ବିଶେଷଜ୍ଞମାନେ ଅନୁମାନ କରୁଛନ୍ତି।