ଲକ୍ଷ୍ନୌ: ପୁଣି ଯୌତୁକ ବର୍ବରତାରେ ବଳି ପଡିଲେ ଆଉ ଜଣେ ମହିଳା । ଉତ୍ତର ପ୍ରଦେଶର ଗ୍ରେଟର ନୋଏଡାରେ, ଯୌତୁକ ପାଇଁ ଜଣେ ମହିଳାଙ୍କୁ ତାଙ୍କ ପୁଅ ଏବଂ ଭଉଣୀଙ୍କ ସମ୍ମୁଖରେ ଜିଅନ୍ତା ପୋଡିଦେଲେ ସ୍ବାମୀ । ପୋଡ଼ିବା ପରେ, ମହିଳା ଜଣକ ଯନ୍ତ୍ରଣାରେ ଛଟପଟ ହେଉଥିଲେ। ତାଙ୍କ ଭଉଣୀଙ୍କୁ ମଧ୍ୟ ଏତେ ମାଡ଼ ମାରିଥିଲେ ଯେ ସେ ଚେତାଶୂନ୍ୟ ହୋଇଯାଇଥିଲେ। ପଡ଼ୋଶୀମାନଙ୍କ ସହାୟତାରେ, ଗୁରୁତର ଭାବରେ ପୀଡିତା ମହିଳାଙ୍କୁ ଡାକ୍ତରଖାନା ନିଆଯାଇଥିଲା, କିନ୍ତୁ ଡାକ୍ତରମାନେ ତାଙ୍କର ଚିକିତ୍ସା କରିବାକୁ ମନା କରିଦେଇଥିଲେ। ମହିଳା ଜଣକ ଦିଲ୍ଲୀ ଯିବା ବାଟରେ ମୃତ୍ୟୁବରଣ କରିଥିଲେ। ଏବେ ମହିଳାଙ୍କ କୁନି ପୁଅ, ଯୌତୁକ ଲୋଭ କିପରି ତାଙ୍କ ବାପା ଏବଂ ଜେଜେମାଙ୍କୁ ଅନ୍ଧ କରିଥିଲା, ସେନେଇ ସବୁ ବଖାଣିଛି ।
ତେବେ ମୃତ ପୀଡିତା ନିକିଙ୍କ ପୁଅ କହିଛନ୍ତି ଯେ ତାଙ୍କ ବାପା ତାଙ୍କ ମାଆଙ୍କ ଉପରେ କିଛି ତରଳ ପଦାର୍ଥ ଫିଙ୍ଗି, ତାଙ୍କୁ ଚାପୁଡା ମାରି ଲାଇଟରରେ ନିଆଁ ଲଗାଇ ଦେଇଥିଲେ। ଆଉ ଯେତେବେଳେ ସାନ ପିଲାଟିକୁ ପଚରାଯାଇଥିଲା ଯେ, କ’ଣ ତାଙ୍କ ବାପା, ତାଙ୍କ ମା’ଙ୍କୁ ହତ୍ୟା କରିଛନ୍ତି, ସେତେବେଳେ ସେ କେବଳ ମୁଣ୍ଡ ହଲାଇ ହଁ କହିଥିଲେ । ଏଥିସହିତ ଏବେ ନିକିଙ୍କ ପୋଡ଼ିବାର ଦୁଇଟି ଭିଡିଓ ଇଣ୍ଟରନେଟରେ ଘୂରି ବୁଲୁଛି। । ଯାହା ଛାତି ଥରାଉ ଦେଉଛି । ଇଣ୍ଟରନେଟରେ ଭାଇରାଲ ହେଉଥିବା ଏହି ଭିଡିଓରେ, ଜଣେ ପୁରୁଷ ଏବଂ ମହିଳା ପୀଡିତାଙ୍କୁ ଆକ୍ରମଣ କରୁଥିବା ଏବଂ ତାଙ୍କ କେଶକୁ ଧରି ଘରୁ ବାହାର କରୁଥିବାର ଦେଖିବାକୁ ମିଳୁଛି। ଅନ୍ୟ ଭିଡିଓରେ ମହିଳାଙ୍କୁ ନିଆଁ ଲଗାଇ ଦିଆଯିବା ପରେ ସିଡ଼ି ଦେଇ ତଳକୁ ଖସି ପଡ଼ୁଥିବାର ଦେଖାଯାଉଛି ।
ମିଳିଥିବା ସୂଚନା ଅନୁସାରେ, ନିକି ୨୦୧୬ ମସିହାରେ ବିପିନ ନାମ ବ୍ୟକ୍ତିଙ୍କୁ ବିବାହ କରିଥିଲେ । ସେହି ସମୟରେ, ତାଙ୍କ ବଡ଼ ଭଉଣୀ କାଞ୍ଚନ ବିପିନଙ୍କ ବଡ଼ ଭାଇଙ୍କ ସହିତ ବିବାହ କରିଥିଲେ। ବିବାହ ପରଠାରୁ ଯୌତୁକ ପାଇଁ ଉଭୟ ଭଉଣୀଙ୍କୁ ହଇରାଣ କରାଯାଉଥିଲା। ଅଗଷ୍ଟ ୨୧ ତାରିଖରେ କାଞ୍ଚନଙ୍କୁ ମଧ୍ୟ ପ୍ରବଳ ମାଡ଼ ମରାଯାଇଥିଲା। ଅଭିଯୁକ୍ତମାନେ ୩୬ ଲକ୍ଷ ଟଙ୍କା ଯୌତୁକ ଦାବି କରୁଥିଲେ। ସେମାନେ କାଞ୍ଚନଙ୍କୁ ହତ୍ୟା କରିବାକୁ ମଧ୍ୟ ଧମକ ଦେଇଥିଲେ। ଏହା ପରେ, ନିକିଙ୍କୁ ପୋଡ଼ି ଦିଆଯାଇଥିଲା। କାଞ୍ଚନ ତାଙ୍କୁ ବଞ୍ଚାଇବାକୁ ଚେଷ୍ଟା କରିଥିଲେ କିନ୍ତୁ ସେ ଅଚେତ ହେବା ପର୍ଯ୍ୟନ୍ତ ତାଙ୍କୁ ମଧ୍ୟ ମାଡ଼ ମରାଯାଇଥିଲା। ଯେତେବେଳେ କାଞ୍ଚନ ଚେତା ଫେରିଲା, ପଡ଼ୋଶୀମାନେ ନିକିଙ୍କୁ ହସ୍ପିଟାଲକୁ ନେଇଯାଇଥିଲେ ଏବଂ ପରେ ତାଙ୍କର ମୃତ୍ୟୁ ହୋଇଥିଲା।
କିନ୍ତୁ ଘଟଣା ପରେ ଅଭିଯୁକ୍ତ ବିପିନ ଏବଂ ତା ପରିବାର ନିର୍ଦ୍ଦୋଷ ବୋଲି ଅଭିନୟ କରି ଚାଲିଥିଲେ। ସୋସିଆଲ ମିଡିଆରେ ନିକିଙ୍କ ସହ ଏକ ଫଟୋ ସେୟାର କରି ସେ ଦାବି କରିଛନ୍ତି ଯେ ନିକି ଆତ୍ମହତ୍ୟା କରିଛନ୍ତି। ସେ ଲେଖିଛନ୍ତି, ତୁମେ ମୋତେ କାହିଁକି କହିଲ ନାହିଁ କ’ଣ ଘଟିଛି? ତୁମେ ମୋତେ କାହିଁକି ଛାଡି ଦେଲ? ତୁମେ ଏପରି କାହିଁକି କଲ? ଦୁନିଆ ମୋତେ ହତ୍ୟାକାରୀ କହୁଛି, ନିକି। ତୁମେ ଯିବା ପରେ ମୋ ସହିତ ବହୁତ ଭୁଲ ଘଟୁଛି । ବିପିନ ଆଉ ଏକ କାହାଣୀ ମଧ୍ୟ ପୋଷ୍ଟ କରିଛନ୍ତି ଯେଉଁଥିରେ ନିକି ଏବଂ ବିପିନ ହସୁଛନ୍ତି। ସେମାନଙ୍କ ପୁଅ ମଧ୍ୟ ସେମାନଙ୍କ ସହିତ ବସି ଖୁସି ଦେଖାଯାଉଛି। ଏହି ଭିଡିଓର କ୍ୟାପସନ ହେଉଛି, ମୁଁ ନଷ୍ଟ ହୋଇଗଲି। ମୋର କିଛି ବାକି ନାହିଁ। ହେଲେ ନୀରିହ କୁନି ପୁଅ ଆଖି ଆଗରେ ଘଟିଥିବା ଘଟଣା ଅଭିଯୁକ୍ତଙ୍କ ପୋଲ୍ ଖୋଲିଥିଲା । ପରେ ବିପିନଙ୍କ ପୁଅ ସବୁ ସତ କହିଥିଲା ।
ପୁଅ ଏବଂ ପୀଡିତାଙ୍କ ବଡ ଭଉଣୀ କାଞ୍ଚନଙ୍କ ଅଭିଯୋଗ ଆଧାରରେ, ଗ୍ରେଟର ନଏଡାର କସନା ପୋଲିସ ତାଙ୍କ ଭଉଣୀଙ୍କ ସ୍ୱାମୀ ଏବଂ ଶାଶୁଙ୍କ ବିରୁଦ୍ଧରେ ହତ୍ୟା, ଅପରାଧିକ ଷଡ଼ଯନ୍ତ୍ର ଏବଂ ସ୍ୱେଚ୍ଛାକୃତ ଭାବରେ ଆଘାତ ଦେବା ଅଭିଯୋଗରେ ଏକ ଏଫଆଇଆର ରୁଜୁ କରିଛି। ଘଟଣାର ତଦନ୍ତ ଚାଲିଛି ।