କୋରାପୁଟ ଜିଲ୍ଲାର ବିଦ୍ୟୁତ ଭିତ୍ତିଭୂମିର ବିକାଶ କରୁଛି ଟିପିଏସ୍ଓଡିଏଲ୍
- ପଟାଙ୍ଗୀ ଓ ଲମତାପୁଟରେ ସବଷ୍ଟେସନର ଉନ୍ନତୀକରଣ
- କୋରାପୁଟ ସବଷ୍ଟେସନର କ୍ଷମତା ବୃଦ୍ଧି
- ନୂତନ ୩୩କେଭି ଓ ୧୧କେଭି ଲାଇନ ସଂଯୋଗ
- ଭରସାଯୋଗ୍ୟ ଓ ଗୁଣାତ୍ମକ ବିଜୁଳି ଯୋଗାଣ
- ଜନଜାତି ସମୁଦାୟ ଓ ଜିଲ୍ଲାର ଶିଳ୍ପ ଅନୁଷ୍ଠାନକୁ ଯୋଗାଉଛି ଶକ୍ତି
ବ୍ରହ୍ମପୁର : ଟିପି ସଦର୍ଣ୍ଣ ଓଡ଼ିଶା ଡିଷ୍ଟ୍ରିବ୍ୟୁସନ ଲିମିଟେଡ୍ (ଟିପିଏସ୍ଓଡିଏଲ୍) ତରଫରୁ କୋରାପୁଟ ଜିଲ୍ଲାର ବିଦ୍ୟୁତ ଭିତ୍ତିଭୂମିର ବିକାଶ ପାଇଁ ନିଆଯାଇଛି ବିଭିନ୍ନ ପଦକ୍ଷେପ। କମ୍ପାନୀ ପକ୍ଷରୁ ବିଦ୍ୟୁତ ଭିତ୍ତିଭୂମିକୁ ସୁଦୃଢ଼ କରିବା ପାଇଁ ନେଟୱର୍କ ବୃଦ୍ଧି ଓ ବିଦ୍ୟୁତ ସେବାକୁ ଆଧୁନିକୀକରଣ କରାଯାଉଛି। ଏହି ପଦକ୍ଷେପ ଯୋଗୁଁ ସମଗ୍ର ଜିଲ୍ଲାରେ ଭରସାଯୋଗ୍ୟ ଓ ଗୁଣାତ୍ମକ ବିଜୁଳି ଯୋଗାଣର ଲକ୍ଷ୍ୟକୁ ସୁନିଶ୍ଚିତ କରାଯିବା ସହିତ ଘର, ଅନୁଷ୍ଠାନ ଓ ଶିଳ୍ପକେନ୍ଦ୍ରରେ ବିଦ୍ୟୁତ ସେବାକୁ ଅଧିକ ସୁଦୃଢ଼ କରାଯାଇପାରୁଛି।
ପୂର୍ବଘାଟ ପର୍ବତମାଳାରେ ଅବସ୍ଥିତ କୋରାପୁଟ ଜିଲ୍ଲା ଏହାର ପ୍ରାକୃତିକ ସୌନ୍ଦର୍ଯ୍ୟ ପାଇଁ ବେଶ୍ ପରିଚିତ। ଉଚ୍ଚ ପର୍ବତ, ଉପତ୍ୟକା ଓ ଜିଲ୍ଲାର ସମୃଦ୍ଧ ସାଂସ୍କୃତିକ ଐତିହ୍ୟ ଏହାର ଅନ୍ୟ ଏକ ପରିଚୟ ଅଟେ। ବହୁ ଜନଜାତିଙ୍କ ବାସସ୍ଥଳୀ ଏହି ଜିଲ୍ଲା। ବିଶେଷ କରି ପରଜା, ଗଦବା, କନ୍ଧ, ବଣ୍ଡା ଏବଂ ବିଶେଷ ଭାବରେ ବିଲୁପ୍ତ ପ୍ରାୟ ଜନଜାତି ଗୋଷ୍ଠୀ (ପିଭିଟିଜି) ଏହି ଅଞ୍ଚଳରେ ବସବାସ କରିଥାଆନ୍ତି। ଯେଉଁମାନଙ୍କର ଜୀବନଶୈଳୀ ଏବଂ ପରମ୍ପରା ଓଡ଼ିଶାର ପରିଚୟର ଏକ ଅଭିନ୍ନ ଅଂଶ। ଦୃତ ସହରୀକରଣ, ସୁନାବେଡ଼ା ଆଖପାଖ ଅଞ୍ଚଳରେ ଶିଳ୍ପାଞ୍ଚଳର ବିକାଶ ଏବଂ ଗ୍ରାମାଞ୍ଚଳରେ ଦିନକୁ ଦିନ ବିଦ୍ୟୁତ ଶକ୍ତିର ଚାହିଦା ବଢ଼ିବାରେ ଲାଗିଛି। ଟିପିଏସ୍ଓଡିଏଲ୍ ତରଫରୁ ନିଆଯାଇଥିବା ଉଲ୍ଲେଖନୀୟ ପଦକ୍ଷେପ ଓ ଚାଲୁ ରହିଥିବା ପ୍ରକଳ୍ପ ଯୋଗୁଁ ଏସବୁ ଅଞ୍ଚଳରେ ବିଦ୍ୟୁତ ଆବଶ୍ୟକତାକୁ ପୂରା କରାଯାଇପାରୁଛି।
ବିଶେଷକରି, ପାୱାର ସବଷ୍ଟେସନଗୁଡ଼ିକର ଉନ୍ନତୀକରଣ କରିବା ଏବଂ ବିତରଣ ନେଟୱର୍କସବୁକୁ ଅଧିକ ସୁଦୃଢ଼ କରିବା ଦିଗରେ ଗୁରୁତ୍ୱ ଦିଆଯାଉଛି। ପଟାଙ୍ଗୀ ଏବଂ ଲମତାପୁଟରେ ଥିବା ସବଷ୍ଟେସନଗୁଡ଼ିକୁ ଅତିରିକ୍ତ କ୍ଷମତା ସହିତ ଉନ୍ନତୀକରଣ କରାଯାଇଛି। ସେହିପରି କୋରାପୁଟର ପୁରୁଣା ସବଷ୍ଟେସନର ଟ୍ରାନ୍ସଫର୍ମରର କ୍ଷମତାକୁ ୩.୧୫ଏମଭିଏରୁ ୮ଏମଭିଏକୁ ବୃଦ୍ଧି କରାଯାଇଛି। ଏହି ଉଲ୍ଲେଖନୀୟ ପଦକ୍ଷେପ ଯୋଗୁଁ ସହରାଞ୍ଚଳ ସମେତ ଶିଳ୍ପ ଅନୁଷ୍ଠାନଗୁଡ଼ିକରେ ବିଜୁଳି ଯୋଗାଣକୁ ସୁନିଶ୍ଚିତ କରାଯାଇପାରିଛି। ଜିଲ୍ଲାରେ ନୂତନ ୩୩କେଭି ଲାଇନ୍ ତାର ସଂଯୋଗ ହୋଇଛି। ଯାହା ସୁନାବେଡ଼ା ପୁଲିସ୍ ଷ୍ଟେସନ କରିଡରରୁ ବେଲାଇଗୁଡ଼ା ପର୍ଯ୍ୟନ୍ତ ଏବଂ କୁନ୍ଦ୍ରା,କୁସୁମୀ, ନୂଆଗାଁ, ପଟାଙ୍ଗୀ, କୁନ୍ଦୁଲି, ନାରାୟଣପାଟଣା ଓ ସୁନାବେଡ଼ାର ସଂଯୋଗୀକରଣକୁ ଅଧିକ ସୁଦୃଢ଼ କରୁଛି।
ନୂତନ ୧୧କେଭି ଲାଇନ ତାର ସଂଯୋଗ ଯୋଗୁଁ ଜାନିଗୁଡ଼ା, ସେମିଳିଗୁଡ଼ା, ରଣ୍ଡାପଲ୍ଲୀ ଓ ସ୍ଥାନୀୟ ଆଖପାଖ ଅଞ୍ଚଳରେ ବିଦ୍ୟୁତ ବିତରଣ ବ୍ୟବସ୍ଥାରେ ସୁଧାର ଆସି ପାରିଛି। ସେହିପରି ଆଲମଣ୍ଡା, ବନ୍ଧୁଗାଁ, କୋଟପାଡ଼, ଲମତାପୁଟ, ରାଣୀତୋଟା, ବୋରିଗୁମ୍ମା, ବର୍ଣ୍ଣିପୁଟ ଏବଂ ସୁନାବେଡା ସହରାଞ୍ଚଳରେ ଥିବା ଫିଡରଗୁଡ଼ିକର ମଧ୍ୟ ଉନ୍ନତୀକରଣ କରାଯାଇଛି। ଟିପିଏସ୍ଓଡିଏଲ୍ ତରଫରୁ ନିଆଯାଇଥିବା ଏହି ପଦକ୍ଷେପ ଯୋଗୁଁ ସ୍କୁଲ, ସ୍ୱାସ୍ଥ୍ୟକେନ୍ଦ୍ର, କ୍ଷୁଦ୍ର ଉଦ୍ୟୋଗ ଓ ହଜାର ହଜାର ଘରକୁ ଭରସାଯୋଗ୍ୟ ଓ ଗୁଣାତ୍ମକ ବିଜୁଳି ଯୋଗାଣ ସୁନିଶ୍ଚିତ ହେବା ସହିତ ଆର୍ଥିକ ସ୍ତରରେ ବିକାଶ ହୋଇଛି।
କମ୍ପାନୀ ତରଫରୁ ନିଆଯାଇଥିବା ଏହିସବୁ ପଦକ୍ଷେପ ସମ୍ପର୍କରେ ଟିପିଏସ୍ଓଡିଏଲର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ଅମିତ କୁମାର ଗର୍ଗ କହିଛନ୍ତି “କୋରାପୁଟ ସାଂସ୍କୃତିକ କ୍ଷେତ୍ରରେ ବହୁ ଉନ୍ନତ ଅଞ୍ଚଳ। ଏହା ହେଉଛି ପ୍ରାକୃତିକ ସୌନ୍ଦର୍ଯ୍ୟର ଗନ୍ତାଘର। ଏହି ଅଞ୍ଚଳରେ ଭରସାଯୋଗ୍ୟ ଓ ଗୁଣାତ୍ମକ ବିଜୁଳି ଯୋଗାଣକୁ ସୁନିଶ୍ଚିତ କରିବା ଆମ ପାଇଁ ଏକ ଗୌରବର ବିଷୟ। ବିଦ୍ୟୁତ ଭିତ୍ତିଭୂମିରେ ଉନ୍ନତୀକରଣ କେବଳ ବର୍ତ୍ତମାନ ସମୟର ଆବଶ୍ୟକତା ମଧ୍ୟରେ ସୀମିତ ନୁହେଁ ବରଂ ଜିଲ୍ଲାକୁ ଭବିଷ୍ୟତ ପାଇଁ ପ୍ରସ୍ତୁତ କରିବା ଦିଗରେ ଆମେ ପ୍ରତିବଦ୍ଧ। ଗୁଣାତ୍ମକ ବିଜୁଳି ଯୋଗାଣ ଯୋଗୁଁ ଜିଲ୍ଲାରେ ଶିକ୍ଷା, ସ୍ୱାସ୍ଥ୍ୟ, ଉଦ୍ୟୋଗ ଓ ଶିଳ୍ପ କ୍ଷେତ୍ରରେ ଥିବା ପ୍ରଚୁର ସମ୍ଭାବନା ଓ ସୁଯୋଗକୁ ଉଜ୍ଜୀବିତ କରାଯାଇପାରିବ” ।
ସମଗ୍ର ଦକ୍ଷିଣ ଓଡ଼ିଶାରେ ଟିପିଏସ୍ଓଡିଏଲ୍ ତରଫରୁ ବିଦ୍ୟୁତ ସେବାକୁ ଆହୁରି ବ୍ୟାପକ କରିବା ଦିଗରେ କୋରାପୁଟ ଜିଲ୍ଲାର କାର୍ଯ୍ୟ କମ୍ପାନୀର ପ୍ରତିବଦ୍ଧତାର ପ୍ରମାଣ ଦିଏ। ସବଷ୍ଟେସନଗୁଡ଼ିକର ଉନ୍ନତୀକରଣ, ନେଟୱର୍କ ବୃଦ୍ଧି ଓ ବିଦ୍ୟୁତ ସେବା କ୍ଷେତ୍ରରେ ଆଧୁନିକ ଅଭିନବ ପଦକ୍ଷେପମାନ ଗ୍ରହଣ କରିବା ଦ୍ୱାରା ଟିପିଏସ୍ଓଡିଏଲ୍ ସମ୍ପୃକ୍ତ ଅଞ୍ଚଳର ସ୍ଥାୟୀ ଓ ସମାବେଶୀ ବିକାଶକୁ ଗୁରୁତ୍ୱ ଦେଉଛି।
ଟିପିଏସ୍ଓଡିଏଲ୍ ତରଫରୁ ନିଆଯାଇଥିବା ଏହିସବୁ ପଦକ୍ଷେପ ତଥା ଭରସାଯୋଗ୍ୟ ଓ ଗୁଣାତ୍ମକ ବିଜୁଳି ସେବା ଯୋଗୁଁ କୋରାପୁଟ ଜିଲ୍ଲାର ପ୍ରତ୍ୟେକ ଘର ଆଲୋକିତ ହେବା ସହିତ, ଶିଳ୍ପ ଅନୁଷ୍ଠାନକୁ ଶକ୍ତି ଓ ସମୁଦାୟକୁ ସଶକ୍ତ କରିବା ଦିଗରେ ସମସ୍ତ ପ୍ରୟାସ କମ୍ପାନୀ ତରଫରୁ କରାଯାଉଛି ଯାହା ଓଡ଼ିଶାର ବିକାଶ ପଥରେ କୋରାପୁଟ ଜିଲ୍ଲାର ଭାଗିଦାରୀକୁ ପ୍ରମାଣିତ କରୁଛି।