“ଲୋକୋପକାରୀ ପ୍ରୟାସ: ସଞ୍ଜୟଙ୍କ ହାତେ ନୂଆ ରୂପ ପାଇବ ସ୍ଵର୍ଗଦ୍ଵାର”
ସୁନ୍ଦରଗଡ : ମଣିଷର ଅନ୍ତିମ ଯାତ୍ରା ଶେଷ ହୁଏ ମଶାଣିରେ। କିଏ ତାକୁ କୁହେ ମୁକ୍ତି ଧାମ ତ କିଏ କୁହେ ସ୍ଵର୍ଗଦ୍ଵାର। ସୁନ୍ଦରଗଡ ରାଣିବାଗିଚା ନିକଟରେ ସେହିଭଳି ଏକ ଜୁଇ ଜାଳିବା ସ୍ଥାନ ହେଲା ସ୍ଵର୍ଗଦ୍ଵାର। ସହରର ସମସ୍ତ ମଶାଣି ଗୁଡ଼ିକ ମଧ୍ୟରେ ଏହା ପ୍ରମୁଖ। ସହର ଉପକଣ୍ଠରେ ଅବସ୍ଥିତ ସ୍ଵର୍ଗଦ୍ଵାର ନାମରେ ନାମିତ ଏହି ମଶାଣି ପ୍ରକୃତରେ ଉପଯୋଗ ହେବା ଆରମ୍ଭ ହୋଇଥିଲା କରୋନା କାଳରୁ। ମାତ୍ର ରକ୍ଷଣାବେକ୍ଷଣ ଅଭାବରୁ ଏହା କାଳକ୍ରମେ ଜରାଜୀର୍ଣ୍ଣ ଅବସ୍ଥାକୁ ଆସିବାକୁ ଲାଗିଲା। ସେଠିକି ଶବଦାହ ପାଇଁ ଯାଉଥିବା ବ୍ୟକ୍ତିବିଶେଷଙ୍କ ମନରେ ଏହାର ଅବସ୍ଥାକୁ ଦେଖି ମନରେ ଦ୍ଵନ୍ଦ ଉପୁଜୁଥିଲେ ମଧ୍ୟ କିଛି ପଦକ୍ଷେପ ନେବା ସମ୍ଭବପର ହେଉ ନ ଥିଲା। ସ୍ଵର୍ଗଦ୍ଵାର ସହିତ ଓତଃପ୍ରୋତ ଭାବେ ଜଡ଼ିତ ଥିବା ଶ୍ମଶାନବନ୍ଧୁ ବିଭିନ୍ନ ଲୋକପ୍ରତିନିଧି ଓ ପ୍ରଶାସନିକ ଅଧିକାରୀଙ୍କୁ ଏହାର ଉନ୍ନତିକରଣ ପାଇଁ ବାରମ୍ବାର ଅନୁରୋଧ କରିଥିଲେ ମାତ୍ର କିଛି ସୁଫଳ ମିଳି ନ ଥିଲା। ଏହି ଭଳି କଥା ଅନେକ ବ୍ୟକ୍ତିବିଶେଷଙ୍କ ଠାରୁ ଶୁଣିଲା ପରେ ସ୍ୱର୍ଗଦ୍ୱାରର ସୌନ୍ଦର୍ଯିକରଣ ଓ ଉନ୍ନତିକରଣ ପାଇଁ ସ୍ଵତଃସ୍ପୃତ ଭାବେ ଆଗେଇ ଆସିଥିଲେ ମାତାରାନୀ ଟ୍ରାନ୍ସପୋର୍ଟ ମାଲିକ ସଞ୍ଜୟ ନନ୍ଦ ( ପିଲୁ )। ଆଜି ଅନେକ ସମଚିନ୍ତାଶୀଳ ଓ ସମଭାବାପନ୍ନ ବ୍ୟକ୍ତିବିଶେଷଙ୍କ ସହିତ ଶ୍ରୀ ନନ୍ଦ ସ୍ଵର୍ଗଦ୍ଵାରକୁ ଯାଇ କ୍ଷେତ୍ର ପରିଦର୍ଶନ କରିବା ସହିତ ଆବଶ୍ୟକ ଆନୁସଙ୍ଗିକ ସୁବିଧା କିପରି ଏକ ବ୍ୟବସ୍ଥିତ ଢଙ୍ଗରେ କରାଯାଇ ପାରିବ ସେ ବିଷୟରେ ଉପସ୍ଥିତ ବ୍ୟକ୍ତିଗଣଙ୍କ ସହିତ ପୁଙ୍କାନୂପୁଙ୍ଖ ଆଲୋଚନା କରିଥିଲେ। ସମସ୍ତଙ୍କ ସୁଚିନ୍ତିତ ମତାମତ ନେଇ ସ୍ଵର୍ଗଦ୍ଵାରର ଏକ ପ୍ରବେଶ ତୋରଣ ନିର୍ମାଣ ସହିତ ଏକ ଫୁଲବଗିଚା, ବସିବା ପାଇଁ କଂକ୍ରିଟ ବେଞ୍ଚ, ଚତୁଃପାର୍ଶ୍ଵରେ ଉଚ୍ଚ କ୍ଷମତା ସମ୍ପନ୍ନ ଆଲୋକ ବ୍ୟବସ୍ଥା, ଶବଦାହ ପାଇଁ କାଠ ଓ ଆବଶ୍ୟକ ସାମଗ୍ରୀ ରଖିବା ପାଇଁ ଏକ ସୁରକ୍ଷିତ ସ୍ଥାନ, ନଦୀଘାଟକୁ ଯିବା ପାଇଁ ପାହାଚର ମରାମତି ଓ ସୌନ୍ଦର୍ଯିକରଣ, ନୂତନ ଶୌଚାଳୟ ନିର୍ମାଣ, ନୂତନ ପିଣ୍ଡି ନିର୍ମାଣ ତଥା ତାର ପାର୍ଶ୍ଵବର୍ତ୍ତୀ ସ୍ଥାନର ଟାଇଲ ଓ କଡପା ପଥରରେ ପୁନଃନିର୍ମାଣ, ଦିନରାତି ଜଗୁଆଳି ବ୍ୟବସ୍ଥା, ମାଳି ବ୍ୟବସ୍ଥା, ବର୍ଜ୍ୟବସ୍ତୁର ପରିଚାଳନା ପାଇଁ ସମସ୍ତ ବ୍ୟବସ୍ଥା ତଥା ଦାହ ସଂସ୍କାର ପରେ ଶୁଦ୍ଧ ସ୍ନାନ ବ୍ୟବସ୍ଥା ସଞ୍ଜୟ ନିଜ ପରିବହନ ସଂସ୍ଥା ମାତାରାନୀ ଟ୍ରାନ୍ସପୋର୍ଟ ତରଫରୁ କରାଯିବ ବୋଲି ପ୍ରକାଶ କରିଥିଲେ। ତତ୍ ସହିତ ଆସନ୍ତା କାଲିଠାରୁ ସଫେଇ କାର୍ଯ୍ୟ ଆରମ୍ଭ କରିବା ପାଇଁ ପରାମର୍ଶ ଦେଇଥିଲେ। ଏହି ଅବସରରେ ବରିଷ୍ଠ ନାଗରିକ ଗୁଣନିଧି ମହାନ୍ତି, ବିଭୁଦେନ୍ଦ୍ର ଠାକୁର, ଲଳିତ ମୋହନ ଦାସ, ପ୍ରଫୁଲ୍ଲ ଦାଶ ତଥା ସସ୍ମିତା ସାହୁ, ଲତିକା ପଟ୍ଟନାୟକ, ସିଦ୍ଧାନ୍ତ ପଣ୍ଡା, ଦେବେନ୍ଦ୍ର ସାହୁ, ଚିଣ୍ଟୁ ରକ୍ସା, ସୁମନ୍ତ ମହାପାତ୍ର, ଅମରଜିତ୍ ସିଂ ଲାଡ଼ି, ସ୍ଵପ୍ନାଶିଷ ଦାସ, ଅଶୋକ ବରାଇ, ଭିକାରୀ ପାଢ଼ୀ, ନୀଳମାଧବ ହୋତା, ନରଦୀପ ସିଂ, ବୀରକିଶୋର ସାମଲ, ସଞ୍ଜୟ ପୋଢ଼ ଓ ବିଶ୍ଵରଞ୍ଜନ ହୋତା ପ୍ରମୁଖ ଉପସ୍ଥିତ ଥିଲେ। ଏହା ଜାଣିଲା ପରେ ସହରର ଅନେକ ସୁନାମଧନ୍ୟ ବ୍ୟକ୍ତି ସଞ୍ଜୟଙ୍କୁ ତାଙ୍କର ଏହି ମହତ୍ କାମ ପାଇଁ ସାଧୁବାଦ ଜଣାଇଛନ୍ତି। ଆଗରୁ ପାର୍ଶ୍ଵବର୍ତ୍ତୀ ଅଞ୍ଚଳ ପାଇଁ ନିଶୁଳ୍କ ଆମ୍ବୁଲାନ୍ସ, ଶବବାହକ ଗାଡ଼ି, ଶବ ସଂରକ୍ଷକ ଯନ୍ତ୍ର ଓ କାଠ ଇତ୍ୟାଦି ସୁବିଧା ପ୍ରଦାନରେ ମଧ୍ୟ ସଞ୍ଜୟ ଆଗେଇ ଆସିଥିଲେ।ପ୍ରକାଶଯୋଗ୍ୟ ଯେ ପ୍ରଚଣ୍ଡ ରୌଦ୍ରତାପରେ ସହରବାସୀଙ୍କୁ ଜଳକଷ୍ଟରୁ ନିସ୍ତାରିବା ପାଇଁ ସଞ୍ଜୟ ଇବ ନଦୀରେ ଏକ ବାଲିବନ୍ଧ ନିର୍ମାଣ କରିବାରେ ପ୍ରମୁଖ ଭୂମିକା ନେଇ ଅନେକ ପ୍ରଶଂସା ସାଉଁଟି ଥିଲେ। ସାମାଜିକ,ସାଂସ୍କୃତିକ, ଧାର୍ମିକ,କ୍ରୀଡା କ୍ଷେତ୍ରରେ ତାଙ୍କର ସହଯୋଗ ପାଇଁ ସେ ବେଶ୍ ଜଣାଶୁଣା ଥିବା ବେଳେ ଏଭଳି ଏକ ଲୋକାଭିମୁଖୀ ଓ ଅନ୍ତରକୁ ଛୁଉଁ ଥିବା ପ୍ରକଳ୍ପକୁ ସେ ହାତକୁ ନେଇ ଥିବାରୁ ବରିଷ୍ଠ ନାଗରିକ ତାଙ୍କୁ ଆଶୀର୍ବାଦ ପ୍ରଦାନ କରିଛନ୍ତି।