ନୂଆଦିଲ୍ଲୀ ୩୦।୮: ଚୀନ୍ ରାଜଧାନୀ ବେଜିଂ ଚଳିତ ସପ୍ତାହରେ ଦୁଇଟି ବଡ଼ ଆୟୋଜନର ସାକ୍ଷ ହେବାକୁ ଯାଉଛି। ଏଥିରେ ପ୍ରଥମିଟି ସାଂଘାଇ ସହଯୋଗ ସଙ୍ଗଠନ (ଏସସିଓ) ଶିଖର ସମ୍ମିଳନୀ ହୋଇଥିବା ବେଳେ ଅନ୍ୟଟି ୩୧ ଅଗଷ୍ଟ ଓ ୧ ସପ୍ଚେମ୍ବରରେ ତିଆନଜେନରେ ଅନୁଷ୍ଠିତ ହେବ,ଯେଉଁଥିରେ ଦ୍ୱିତୀୟ ବିଶ୍ୱଯୁଦ୍ଧ ଜାପାନ ଉପରେ ବିଜୟର ୮୦ତମ ବାର୍ଷିକ ପାଳନ କରାଯିବ। ଏହି କାର୍ଯ୍ୟକ୍ରମ ପାଇଁ ଚୀନ୍ ୨୬ରୁ ଅଧିକ ଦେଶଙ୍କ ରାଷ୍ଟ୍ରମୁଖ୍ୟ ଓ ପ୍ରଧାନମନ୍ତ୍ରୀଙ୍କୁ ଆମନ୍ତ୍ରଣ କରିଛି। ହେଲେ ଭାରତ ଦ୍ୱିତୀୟ କାର୍ଯ୍ୟକ୍ରମଟିରେ ଯୋଗ ଦେବନି।
ଦ୍ୱିତୀୟ କାର୍ଯ୍ୟକ୍ରମକୁ ଋଷିଆ ରାଷ୍ଟ୍ରପତି ଭ୍ଲାଦିମୀର ପୁଟିନଙ୍କ ସହିତ ଉତ୍ତର କୋରିଆ ନେତା କିମ୍ ଜୋଙ୍ଗ ଉନ, ବେଲାଋଷ ରାଷ୍ଟ୍ରପତି ଆଲେକଜାଣ୍ଡାର ଲୁକାସେଙ୍କୋ, ଇରାନ ରାଷ୍ଟ୍ରପତି ମସୁଦ ପେଜେସିକିୟାନ, ଇଣ୍ଡୋନେସିୟା ରାଷ୍ଟ୍ରପତି ପ୍ରବଭୋ ସୁବିୟାନ୍ତୋ, ମିଆଁମାର ସେନା ମୁଖ୍ୟ ମିନ୍ ଆଙ୍ଗ ହଲାଇଙ୍ଗ ଆଦି ୨୬ ଦେଶର ମୁଖ୍ୟଙ୍କୁ ନିମନ୍ତ୍ରଣ କରାଯାଇଛି। ପରେଡରେ ଚୀନ୍ ତାର ଉନ୍ନତ ସାମରିକ ଶକ୍ତିର ପ୍ରଦର୍ଶନ କରିବ। ୧୦୦ରୁ ଅଧିକ ଯୁଦ୍ଧବିମାନ, ମିଜାଇଲ ଓ ଟ୍ୟାଙ୍କ ଏହି ପରେଡରେ ସାମିଲ ହେବ।
ବେଜିଂ ଏହାକୁ ତାର ସହଯୋଗୀଙ୍କ ସହିତ ଏକଜୁଟତା ପ୍ରଦର୍ଶନ ବୋଲି ମନେ କରୁଛି। ଏହି କାର୍ଯ୍ୟକ୍ରମ ଏପରି ଏକ ସମୟରେ ଅନୁଷ୍ଠିତ ହେଉଛି ଯେତେବେଳେ ଋଷିଆ-ୟୁକ୍ରେନ ଯୁଦ୍ଧ ଓ ଏସିୟା-ପ୍ରଶାନ୍ତ କ୍ଷେତ୍ର ଚୀନ୍ ନୀତିକୁ ନେଇ ଅସହଜ। ଏଣୁ ଭାରତ, ତୁର୍କି ଓ ଇଜିପ୍ଟ ଭଳି ଦେଶଙ୍କ ମୁଖ୍ୟମାନେ କେବଳ ଏସସିଓ ସମ୍ମିଳନୀ ଶେଷ ପର୍ଯ୍ୟନ୍ତ ମହଜୁଦ ରହିବେ ଓ ପରେଡ ପୂର୍ବରୁ ଫେରି ଯିବେ। ତେବେ ଭାରତ ସ୍ପଷ୍ଟ ସଂକେତ ଦେଇଛି ଯେ ସେ ଚୀନ୍ର ସୈନ୍ୟ ପାରେଡର ଅଂଶ ହେବ ନାହିଁ। ପାଶ୍ଚାତ୍ୟ ଦେଶ ଓ ସେମାନଙ୍କ ସହଯୋଗୀଙ୍କ ଭଳି ଭାରତ ମଧ୍ୟ ଏପରି ପରେଡରୁ ଦୂରରେ ରହିବାକୁ ପସନ୍ଦ କରିଛି।
ଏହା ପଛରେ ବି ଏକ କାରଣ ରହିଛି। ତାହା ହେଉଛି ଭାରତ ଓ ଜାପାନ ସମ୍ପର୍କ। ଏହି ସମ୍ପର୍କ ଏବେ ଏହାର ସର୍ବୋଚ୍ଚସ୍ତରକୁ ପହଞ୍ଚି ସାରିଛି। ପ୍ରଧାନମନ୍ତ୍ରୀ ମୋଦି ନିକଟରେ ଟୋକିଓ ଗସ୍ତରେ ଯାଇଥିଲେ। ସେଠାରେ ଦୁଇ ଦେଶ ଆଗାମୀ ଦଶନ୍ଧୀ ନିମନ୍ତେ ସମାନ ଦୃଷ୍ଟିକୋଣ ଆପଣାଇଛନ୍ତି। ଏଥିରେ ଚୀନ୍ ର ବିଜୟ ଦିବସ ପରେଡ ଭାରତ-ଜାପାନ ସମ୍ପର୍କ ଉପରେ ପ୍ରତିକୂଳ ପ୍ରଭାବ ପକାଇବ। କାରଣ ଏହି ପରେଡ ଜାପାନ ଉପରେ ବିଜୟର ପ୍ରତୀକ ରୂପେ ଅନୁଷ୍ଠିତ ହେଉଛି। ଏଣୁ ଭାରତ ଜାପାନର ସମ୍ବେଦନାକୁ ସମ୍ମାନ କରି ଏହି ଆୟୋଜନରୁ ଦୂରତା ଅବଲମ୍ବନ କରିଛି।