କଟକ: କଟକ ବିଜୁ ଜନତା ଦଳ (ବିଜେଡି) ଭିତରେ ଫାଟ ସାମ୍ନାକୁ ଆସିଛି। ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ ଦଳର କାର୍ଯ୍ୟକ୍ରମରୁ ଦୂରେଇ ରହିଛନ୍ତି। ଏହି କାର୍ଯ୍ୟକ୍ରମ ସାଧାରଣତଃ ତାଙ୍କ ନେତୃତ୍ୱରେ ହୋଇଥାଏ।
ଶୁକ୍ରବାର ବକ୍ସିବଜାର ଛକରେ ଆୟୋଜିତ ପ୍ରଫେଟ ମହମ୍ମଦଙ୍କ ଜୟନ୍ତୀ କାର୍ଯ୍ୟକ୍ରମରେ ନୂଆ ଜିଲ୍ଲା ସଭାପତି ପ୍ରଫୁଲ୍ଲ ସିଂହ ଓ କଟକ ମେୟର ସୁଭାଷ ସିଂହଙ୍କ ନେତୃତ୍ୱରେ ଅନୁଷ୍ଠିତ ହୋଇଛି। ଏହି ଘଟଣା ଦଳ ଭିତରେ ଗୋଷ୍ଠୀ ବିବାଦ ଓ ନୂଆ ଶକ୍ତି କେନ୍ଦ୍ରର ଉତ୍ଥାନକୁ ସୂଚାଇଛି।
କାର୍ଯ୍ୟକ୍ରମରେ ପ୍ରଫୁଲ୍ଲ ସିଂହ, ସୁଭାଷ ସିଂହ ଓ ଅନ୍ୟ ଜିଲ୍ଲାସ୍ତରୀୟ ବିଜେଡି ନେତା ଉପସ୍ଥିତ ଥିଲେ। କିନ୍ତୁ ବରିଷ୍ଠ ନେତା ଦେବାଶିଷ ସାମନ୍ତରାୟ ଓ ତାଙ୍କ ସମର୍ଥକମାନେ ଅନୁପସ୍ଥିତ ଥିଲେ। ପୂର୍ବ ବର୍ଷଗୁଡ଼ିକରେ ଏହି କାର୍ଯ୍ୟକ୍ରମରେ ସାମନ୍ତରାୟ ନେତୃତ୍ୱ ନେଇଥିଲେ। ତାଙ୍କର ଅନୁପସ୍ଥିତି ଦଳ ଭିତରେ ଥିବା କନ୍ଦଳକୁ ଆହୁରି ଜୋରଦାର କରିଛି।
ମଞ୍ଚରେ ପ୍ରଫୁଲ୍ଲ ସିଂହ ଓ ସୁଭାଷ ସିଂହଙ୍କ ସମର୍ଥକମାନଙ୍କ ଉପସ୍ଥିତି କଟକ ବିଜେଡିରେ ନୂଆ ଶକ୍ତି କେନ୍ଦ୍ରର ସୃଷ୍ଟିକୁ ସୂଚାଇଛି। ସୁଭାଷ ସିଂହଙ୍କୁ ସାମନ୍ତରାୟଙ୍କ ଅନୁପସ୍ଥିତି ବିଷୟରେ ପଚାରିବାରୁ ସେ କହିଛନ୍ତି, “ତାଙ୍କୁ ନିମନ୍ତ୍ରଣ କରାଯାଇଥିଲା। କିନ୍ତୁ ଶିକ୍ଷକ ଦିବସ କାର୍ଯ୍ୟକ୍ରମ ପାଇଁ ସେ ଅନ୍ୟତ୍ର ବ୍ୟସ୍ତ ଥିଲେ।” ଦେବାଶିଷ ସାମନ୍ତରାୟଙ୍କ ମତାମତ ନେବାକୁ ଚେଷ୍ଟା କରାଯାଇଥିଲେ ମଧ୍ୟ ସେ ଯୋଗାଯୋଗ ପାଇଁ ଉପଲବ୍ଧ ହୋଇନଥିଲେ।
ସୁଭାଷ ସିଂହ କହିଛନ୍ତି, “ସାମନ୍ତରାୟ ଅନ୍ୟତ୍ର ବ୍ୟସ୍ତ ଅଛନ୍ତି। କଟକ ସହର ସହ ଜଡ଼ିତ ସମସ୍ତଙ୍କୁ ନିମନ୍ତ୍ରଣ କରାଯାଇଥିଲା। ବିଜେଡିର ସମସ୍ତ କର୍ପୋରେଟର ଓ ୱାର୍ଡ ସଭାପତି ଉପସ୍ଥିତ ଅଛନ୍ତି। ପଚାଶ ବର୍ଷରୁ ଅଧିକ ସମୟ ଧରି କାମ କରିଥିବା ବରିଷ୍ଠ ନେତାମାନେ ମଧ୍ୟ ଏଠାରେ ଅଛନ୍ତି।”
ସାଧାରଣ ନିର୍ବାଚନରେ ପରାଜୟ ବରଣ କରିବା ପରେ ବିଜେଡିର ଆଭ୍ୟନ୍ତରୀଣ ଶକ୍ତିରେ ପରିବର୍ତ୍ତନ ଓ ନେତୃତ୍ୱ ପ୍ରତି ଆନୁଗତ୍ୟର ପରୀକ୍ଷା ଚାଲିଥିବା କୁହାଯାଉଛି। ଆଉ ଏହାରି ଭିତରେ ଅନେକ ଦଳୀୟ ନେତା ନେତୃତ୍ୱକୁ ସମାଲୋଚନା କରିବା ପରେ କୋଣଠେସା ହୋଇଥିବା ଦେଖିବାକୁ ମିଳିଛି।