ଦିଲ୍ଲୀ: ଜାତିସଂଘରେ ଇସ୍ରାଏଲକୁ ନିନ୍ଦା କରିଛି ଭାରତ । କାତାର ଉପରେ ଇସ୍ରାଏଲ ଆକ୍ରମଣ କରିଥିବାରୁ ଭାରତ ଏହାକୁ ନିନ୍ଦା କରିଛି । ଭାରତ କହିଛି ଯେ କାତାର ଉପରେ ଇସ୍ରାଏଲ ଯେଉଁ ଆକ୍ରମଣ କରିଛି ଏହା ତା’ର ସାର୍ବଭୌମତ୍ବର ଉଲ୍ଲଙ୍ଘନ କରିଛି । ଜାତିସଂଘସ୍ଥିତ ଭାରତର ପ୍ରତିନିଧି ଅରିନ୍ଦମ ବାଗଚୀ କହିଛନ୍ତି ଯେ ପ୍ରତ୍ୟେକ ଦ୍ବିପାକ୍ଷିକ ମତଭେଦକୁ ଆଲୋଚନା ମାଧ୍ୟମରେ ସମାଧାନ କରିବାକୁ ଭାରତ ଗୁରୁତ୍ବ ଦିଏ । ମାତ୍ର ଇସ୍ରାଏଲ କଥାବାର୍ତ୍ତା ପରିବର୍ତ୍ତେ ସାମରିକ କାର୍ଯ୍ୟାନୁଷ୍ଠାନକୁ ଗୁରୁତ୍ବ ଦେଉଥିବାରୁ ଭାରତ ଏହାକୁ ନିନ୍ଦା କରିଛି । ଗତ ସପ୍ତାହରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କାତାର ଅମିର ଶେଖ ତମିମ୍ ବିନ୍ ହମାଦ ଅଲ୍ ଥାନିଙ୍କୁ ଫୋନ କରି ଇସ୍ରାଏଲର ଆକ୍ରମଣକୁ ନେଇ ଉଦ୍ବେଗ ପ୍ରକାଶ କରିଥିଲେ ।
ଏଥିସହ ବାଗଚି କହିଛନ୍ତି ଯେ ଭାରତ ଦୋହାରେ ହୋଇଥିବା ସମ୍ପ୍ରତିକ ଆକ୍ରମଣ ଏବଂ ଏହାର ପ୍ରଭାବ ଅଞ୍ଚଳର ସୁରକ୍ଷା ପରିସ୍ଥିତି ଉପରେ ପଡ଼ିବା ନେଇ ଗଭୀର ଚିନ୍ତିତ । ଆମେ କତାରର ସାର୍ବଭୌମତ୍ୱ ଉଲ୍ଲଂଘନକୁ ସ୍ପଷ୍ଟ ଭାବରେ ନିନ୍ଦା କରୁଛୁ । ଏପରି କାର୍ଯ୍ୟ କେବଳ ଏହି ଅଞ୍ଚଳରେ ନୁହେଁ ବରଂ ସାରା ବିଶ୍ୱରେ ଶାନ୍ତି, ସ୍ଥିରତା ଏବଂ ସୁରକ୍ଷାକୁ ବିପଦରେ ପକାଇଥାଏ । ବାଗଚି ଜାତିସଂଘ ମାନବାଧିକାର ପରିଷଦକୁ କହିଛନ୍ତି ଯେ ଭାରତ ଦୃଢ଼ ଭାବରେ ବିଶ୍ୱାସ କରେ ଯେ ଜାତିସଂଘ ଚାର୍ଟର ଏବଂ ଅନ୍ତର୍ଜାତୀୟ ଆଇନର ନୀତି ଅନୁଯାୟୀ ଆଲୋଚନା ଏବଂ କୂଟନୀତି ମାଧ୍ୟମରେ ମତଭେଦକୁ ଶାନ୍ତିପୂର୍ଣ୍ଣ ଭାବରେ ସମାଧାନ କରାଯିବା ଉଚିତ ।