ଭୋପାଳ : ମଧ୍ୟପ୍ରଦେଶରେ କଫ ସିରପ୍ ମାମଲାରେ ପୋଲିସକୁ ବଡ଼ ସଫଳତା । “କୋଲଡ୍ରିଫ୍” କଫ ସିରପ୍ ମାମଲାରେ ଧରାପଡିଛି କଫ୍ ସିରପ୍ କମ୍ପାନୀ ମାଲିକ । କଫ୍ ସିରପ୍ ନିର୍ମାତା କମ୍ପାନୀ ‘ଶ୍ରୀସନ୍ ମେଡିକାଲ୍ସ’ ମାଲିକକୁ ଗିରଫ କରିଛି ପୋଲିସ । ମାଲିକ ଜି. ରଙ୍ଗନାଥନଙ୍କୁ ଚେନ୍ନାଇରୁ ଗିରଫ କଲା ପୋଲିସ । ରଙ୍ଗନାଥନଙ୍କୁ ହେପାଜତକୁ ନେଇ ପୋଲିସର ପଚରାଉଚରା କରୁଛି । କଫ୍ ସିରପ୍ ମୃତ୍ୟୁ ମାମଲାରେ ରଙ୍ଗନାଥନଙ୍କୁ ଖୋଜାଖୋଜି କରୁଥିଲା ପୋଲିସ ।
କଫ୍ ସିରପ୍ ପିଇ ମଧ୍ୟପ୍ରଦେଶରେ ୨୦ ଶିଶୁଙ୍କ ମୃତ୍ୟୁ ହୋଇଛି । ମଧ୍ୟପ୍ରଦେଶ ପୋଲିସ ଏହି ଗମ୍ଭୀର ମାମଲାକୁ ଦୃଷ୍ଟିରେ ରଖି ଶ୍ରୀସନ ଔଷଧ କମ୍ପାନୀର ପଳାତକ ମାଲିକଙ୍କ ଉପରେ ପୁରସ୍କାର ଘୋଷଣା କରିଥିଲା । ଅଭିଯୁକ୍ତଙ୍କୁ ଗିରଫ କରିବାରେ ସାହାଯ୍ୟ କରୁଥିବା ଯେକୌଣସି ବ୍ୟକ୍ତିଙ୍କୁ ୨୦,୦୦୦ ଟଙ୍କା ପୁରସ୍କାର ଘୋଷଣା କରିଥିଲା ।
କମ୍ପାନୀର ପଳାତକ ମାଲିକମାନଙ୍କୁ ଶୀଘ୍ର ଗିରଫ କରିବା ପାଇଁ ଏକ ସ୍ୱତନ୍ତ୍ର SIT ଦଳ ମଧ୍ୟ ଗଠନ କରାଯାଇଥିଲା । ଯାହାର ପରିଣାମ ସ୍ୱରୂପ ରଙ୍ଗନାଥନଙ୍କୁ ଗିରଫ କରାଯାଇଥିଲା । ମଧ୍ୟପ୍ରଦେଶ ସ୍ୱାସ୍ଥ୍ୟ ରାଷ୍ଟ୍ରମନ୍ତ୍ରୀ ନରେନ୍ଦ୍ର ଶିବାଜୀ ପଟେଲ ବୁଧବାର କହିଛନ୍ତି ଯେ, ରାଜ୍ୟରେ ୨୦ ଜଣ ଶିଶୁ ଦୂଷିତ କଫ ସିରପ ଖାଇ ମୃତ୍ୟୁବରଣ କରିଛନ୍ତି ଏବଂ ଏହି ଗୁରୁତର ଅବହେଳା ପାଇଁ ତାମିଲନାଡୁ ସରକାର ଦାୟୀ ।
ପଟେଲ କହିଛନ୍ତି, “ରାଜ୍ୟ ବାହାରକୁ ପଠାଯାଉଥିବା ଔଷଧର ପରୀକ୍ଷା କରିବା ତାମିଲନାଡୁ ସରକାରଙ୍କ ଦାୟିତ୍ୱ ଥିଲା । ମଧ୍ୟ ପ୍ରଦେଶ ସରକାର ମଧ୍ୟ ରାଜ୍ୟକୁ ଆସୁଥିବା ଔଷଧର ଅନିୟମିତ ପରୀକ୍ଷା କରନ୍ତି, କିନ୍ତୁ ଏହି ସିରପଟି ସେହି ନମୁନାରେ ଭୁଲବଶତଃ ହଜି ଯାଇଥିଲା ।”
ଏହି ବିଷାକ୍ତ କଫ ସିରପ ଖାଇବା ପରେ ୨୦ ଜଣ ଶିଶୁଙ୍କ କିଡନୀ ନଷ୍ଟ ଯୋଗୁଁ ମୃତ୍ୟୁ ହୋଇଥିଲା । ମଧ୍ୟପ୍ରଦେଶରେ ଏହି ବିଷାକ୍ତ କଫ ସିରପ ଖାଇବା ପରେ ଅନେକ ପିଲାଙ୍କ କିଡନୀ ଖରାପ ହୋଇଥିଲା । ଏପର୍ଯ୍ୟନ୍ତ ଚିକିତ୍ସା ସମୟରେ ମୋଟ ୨୦ ଜଣ ଶିଶୁଙ୍କ ମୃତ୍ୟୁ ହୋଇଛି ।