ଉତ୍ତରପ୍ରଦେଶ : ୟୁପିର ଶ୍ରୀବାସ୍ତିରେ ଇକୋନା ଥାନା ଅଞ୍ଚଳରେ ହୃଦୟବିଦାରକ ଘଟଣା । ଗୋଟିଏ ପରିବାରର ୫ ଜଣକ ମୃତ୍ୟୁ ସମସ୍ତଙ୍କୁ ସ୍ତବ୍ଧ କରିଦେଇଛି । ଏକ ବନ୍ଦ ଘରୁ ସ୍ବାମୀ, ସ୍ତ୍ରୀଙ୍କ ସହିତ ୩ ପିଲାଙ୍କ ମୃତଦେହ ମିଳିଛି । ଘଟଣା ପରେ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଛି ।
ଖବର ମୁତାବକ, ୟୁପିର ଶ୍ରୀବାସ୍ତିରେ ଇକୋନା ଥାନା ଅଞ୍ଚଳରେ ବନକଟ ଗାଁରେ ପତିପତ୍ନୀ ଏବଂ ତାଙ୍କ ୩ ଛୁଆଙ୍କ ସନ୍ଦିଗ୍ଧ ମୃତ୍ୟୁ ହୋଇଥିଲା । ସମସ୍ତ ମୃତଦେହ ବନ୍ଦ ଘରେ ପଡିଥିଲା । ଘଟଣାର ପରିସ୍ଥିତି ଦେଖି ସନ୍ଦେହ କରାଯାଛି । ପରିଜନ ଏବଂ ଗାଁ ଲୋକ ବନ୍ଦ ଥିବା ଘରର କବାଟ ଭାଙ୍ଗିବା ପରେ ଭୟଙ୍କର ଦୃଶ୍ୟ ଦେଖିଥିଲେ । ତେବେ ମୃତକଙ୍କ ମଧ୍ୟରେ ୩୨ ବର୍ଷୀୟ ସ୍ବାମୀ, ୩୦ ବର୍ଷୀୟ ପତ୍ନୀ, ୬ ଏବଂ ୪ ବର୍ଷର ଝିଅ ଏବଂ ଦେଢବର୍ଷର ପୁଅ ରହିଥିଲା । ଘର ଭିତରୁ ବନ୍ଦ ରହିଥିଲା ।
ସୂଚନା ପାଇ ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହକୁ ବ୍ୟବଚ୍ଛେଦ ପାଇଁ ପଠାଯାଇଛି । ପୋଲିସ ଘଟଣାର ଯାଞ୍ଚ କରୁଛି । ତେବେ ମୃତ୍ୟୁର ପ୍ରକୃତ କାରଣ ଜଣାପଡିନାହିଁ ।