ପାକିସ୍ତାନ : ବାପା ଜୀବିତ ଅଛନ୍ତି ବୋଲି ପ୍ରମାଣ ଦିଅନ୍ତୁ ପାକିସ୍ତାନ ସରକାର । ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ପୁଅ କାଶିମ ଖାନ୍ ସାମାଜିକ ଗଣମାଧ୍ୟମରେ ପୋଷ୍ଟ କରି ଏପରି ଅପିଲ କରିଛନ୍ତି । ଦୀର୍ଘ ୮୪୫ ଦିନ ହେଲା ଇମ୍ରାନ ଖାନ୍ ଜେଲରେ ବନ୍ଦୀ ଅଛନ୍ତି ।
ଗତ ୬ ସପ୍ତାହ ଧରି ତାଙ୍କୁ ପରିବାର ଲୋକଙ୍କୁ ଭେଟିବାକୁ ଦିଆଯାଉନାହିଁ । ଜେଲ କର୍ତ୍ତୃପକ୍ଷ ବାରମ୍ବାର ଇମ୍ରାନଙ୍କ ଭଉଣୀମାନଙ୍କ ଆବେଦନକୁ ପ୍ରତ୍ୟାଖ୍ୟାନ କରୁଛନ୍ତି । ଏପରିକି ଇମ୍ରାନଙ୍କ ପୁଅ ମାନଙ୍କୁ ମଧ୍ଯ ଭେଟିବାକୁ ସୁଯୋଗ ମିଳୁନାହିଁ । ଏହା କୌଣସି ସୁରକ୍ଷା ପ୍ରୋଟୋକଲର ଅନ୍ତର୍ଗତ ନୁହେଁ ବୋଲି ଇମ୍ରାନଙ୍କ ପୁଅ କାଶିମ ଦାବି କରିଛନ୍ତି । ତେଣୁ ନୈତିକ, ଆଇନଗତ ଓ ଆନ୍ତର୍ଜାତିକ ଦାୟିତ୍ୱ ନିର୍ବାହ କରି ପାକିସ୍ତାନ ସରକାର ତାଙ୍କ ବାପା ଜୀବିତ ଥିବା ପ୍ରମାଣ ଦିଅନ୍ତୁ ବୋଲି କାଶିମ କହିଛନ୍ତି ।
ଏହାସହିତ ଆନ୍ତର୍ଜାତିକ ସଂଗଠନ ଓ ମାନବାଧିକାର ସଂଗଠନ ଏବଂ ଗଣତାନ୍ତ୍ରିକ ବିଧି ବ୍ୟବସ୍ଥାରେ ବିଶ୍ୱାସ ରଖୁଥିବା ସଂଗଠନଗୁଡିକ ଇମ୍ରାନଙ୍କ ସୁରକ୍ଷା ସୁନିଶ୍ଚିତ କରିବାକୁ ପାକିସ୍ତାନ ସରକାରଙ୍କ ନିକଟରେ ଦାବି କରନ୍ତୁ ବୋଲି ଇମ୍ରାନଙ୍କ ପୁଅ ଅପିଲ କରିଛନ୍ତି ।
ନଭେମ୍ବର ୨୬, ୨୦୨୫ରୁ ସୋସିଆଲ ମିଡିଆରେ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ମୃତ୍ୟୁକୁ ନେଇ ଜୋରଦାର ଗୁଜବ ସୃଷ୍ଟି ହୋଇଥିଲା । ତେବେ ଏହି ଖବରକୁ ଗୁଜବ କରି ପାକିସ୍ତାନର ଆଦିଆଲା ଜେଲ କର୍ତ୍ତୃପକ୍ଷ ଇମ୍ରାନଙ୍କ ମୃତ୍ୟୁ ଖବର ଖଣ୍ଡନ କରିଥିଲେ । ଇମ୍ରାନ ଖାନ “ସମ୍ପୂର୍ଣ୍ଣ ସୁସ୍ଥ” ଅଛନ୍ତି ଏବଂ ତାଙ୍କୁ ଆବଶ୍ୟକୀୟ ଚିକିତ୍ସା ଯୋଗାଇ ଦିଆଯାଉଛି ବୋଲି ପ୍ରତିରକ୍ଷା ମନ୍ତ୍ରୀ ଖ୍ୱାଜା ଆସିଫ ମଧ୍ୟ ଇମ୍ରାନଙ୍କ ମୃତ୍ଯୁ ଖବରକୁ ଭିତ୍ତିହୀନ ବୋଲି କହିଥିଲେ ।