ଅନୁଗୁଳ: ଚୋରି କରୁଥିଲେ ସାର୍ । ମଧ୍ୟାହ୍ନ ଭୋଜନ ଚାଉଳ ଚାଲାଣ ବେଳେ ଧରା ପଡିଲେ ପ୍ରଧାନ ଶିକ୍ଷକ । କାର ସହ ମଧ୍ୟାହ୍ନ ଭୋଜନ ଚାଉଳ ପୋଲିସକୁ ହସ୍ତାନ୍ତର କରିଛନ୍ତି ଗ୍ରାମବାସୀ । ଅନୁଗୁଳ ଜିଲ୍ଲା ଆଠମଲ୍ଲିକ ବ୍ଲକ କୃତ୍ତିବାସପୁର ଉଚ୍ଚ ପ୍ରାଥମିକ ବିଦ୍ୟାଳୟରେ ଘଟିଛି ଏଭଳି ଅଭାବନୀୟ ଘଟଣା । ପ୍ରଧାନ ଶିକ୍ଷକ ଗୋପାଳ ନାୟକ ରାତିରେ ବିଦ୍ୟାଳୟରୁ ଏକ କୁଇଣ୍ଟାଲ ମଧ୍ୟାହ୍ନ ଭୋଜନ ଚାଉଳ ଚାଲାଣ କରୁଥିବା ବେଳେ ଗାଁଲୋକଙ୍କ ଦ୍ୱାରା ଧରା ପଡିଛନ୍ତି ।
ଏନେଇ ଗାଁ ଲୋକଙ୍କ ମଧ୍ୟରେ ଉତ୍ତେଜନା ଦେଖାଦେଇଥିଲା । ପୂର୍ବରୁ ମଧ୍ୟ ବିଦ୍ୟାଳୟରୁ ମଧ୍ୟାହ୍ନ ଭୋଜନ ଚାଉଳ ଚାଲାଣ ହୋଇଥିବା ଅଞ୍ଚଳବାସୀ ଜାଣିବାକୁ ପାଇଥିଲେ । ଏନେଇ ଠାକୁରଗଡ଼ ପୋଲିସକୁ ସୂଚନା ଦେଇଥିଲେ I ଖବର ପାଇ ଠାକୁରଗଡ଼ ପୋଲିସ ଘଟଣାସ୍ଥଳରେ ପହଞ୍ଚିବା ପରେ ଗାଁଲୋକ ମଧ୍ୟାହ୍ନ ଭୋଜନ ଚାଉଳ ସହ କାରକୁ ପୋଲିସକୁ ହସ୍ତାନ୍ତର କରିଥିଲେ । ପ୍ରଧାନ ଶିକ୍ଷକଙ୍କୁ ଥାନାରେ ଅଟକ ରଖି ପଚରାଉଚରା କରାଯାଉଛି ।