ବାଙ୍ଗରିପୋଷି: କେତେବେଳେ ଲୁଟେରାମାନେ ଘରେ ପଶି ଲୁଟ୍ କରନ୍ତି ତ କେତେବେଳେ କାହା ଦୋକାନରେ ପଶି ଲୁଟ କରନ୍ତି । ଆଉ କେତେବେଲେ ମୋବାଇଲ୍ ହ୍ୟାକ୍ କରି ଲୁଟ କରନ୍ତି ଲୁଟେରା । କିନ୍ତୁ ଏଥର ଲୁଟେରାମାନେ ଏକ ନୂଆ ତରିକା ଆପଣେଛନ୍ତି । ଉଚ୍ଚ ଶିକ୍ଷା ସାହାଯ୍ୟ ନାଁରେ ଲୁଟ କରିବା ପାଇଁ ଅଭିଭାବକଙ୍କୁ ଟାର୍ଗେଟ କଲେ ଲୁଟେରା । ଛାତ୍ରଛାତ୍ରୀଙ୍କୁ ଉଚ୍ଚଶିକ୍ଷା ପାଇଁ ସାହାଯ୍ୟ ତଥା ଗିଫ୍ଟ ମିଳିବ କହି ଅଭିଭାବକଙ୍କ ଠାରୁ ଲୁଟିନେଲେ ଲକ୍ଷ ଲକ୍ଷ ଟଙ୍କାର ସୁନା ।
ମେଧାବୀ ଛାତ୍ରଛାତ୍ରୀଙ୍କୁ ଉଚ୍ଚଶିକ୍ଷା ପାଇଁ ସାହାଯ୍ୟ ନାଁରେ ଅଭିଭାବକଙ୍କ ପାଖରୁ ଲୁଟିନେଲେ ଅଳଙ୍କାର । କିନ୍ତୁ ପରେ ଲୁଟେରାଙ୍କୁ ଧରି ପୋଲିସର ଜିମା ଦେଲେ ସ୍ଥାନୀୟ ଲୋକେ । ଘଟଣା ଘଟିଛି ମୟୂରଭଞ୍ଜ ଜିଲ୍ଲା ଝାରପୋଖରୀଆ ଅଞ୍ଚଳରେ । ଏଠାକାର ଏକ ସ୍କୁଲରେ କିଛି ଯୁବକ ପହଞ୍ଚି ଛାତ୍ରଛାତ୍ରୀଙ୍କ ଭିତରେ କିଛି ପ୍ରତିଯୋଗିତା କରିଥିଲେ । ବାହାନାରେ ସମସ୍ତ ଛାତଅ୍ରଛାତ୍ରୀଙ୍କ ପାଖରୁ ମୋବାଇଲ ନମ୍ବର ନେଇ ଯାଇଥିଲେ ଯୁବକ । ପରେ କିଛି ଅଭିଭାବକମାନଙ୍କ ପାଖକୁ ତାଙ୍କ ପିଲାମାନେ କୃତକାର୍ଯ୍ୟ ହୋଇଥିବା ନେଇ ଫୋନରେ ଯୋଗାଯୋଗ କରିଥିଲେ ଦୁର୍ବୃତ୍ତମାନେ ।
ଏଥିପାଇଁ ବାରିପଦା ସ୍ଥିତ ଏକ ଘରୋଇ ଅଫିସକୁ ଅଭିଭାବକମାନଙ୍କୁ ଡକା ଯାଇଥିଲା । ତେବେ ସେଠାରେ ପହଞ୍ଚିବା ପରେ ଅଭିଭାବକମାନଙ୍କୁ ବିଭିନ୍ନ ପଲିସି କରିବା ପାଇଁ ଏକ ପ୍ରକାର ବାଧ୍ୟ କରାଯାଇଥିଲା । ପଲିସି କରିବା ଦ୍ବାରା ସେମାନଙ୍କ ପିଲାଙ୍କୁ ହାୟର ଷ୍ଟଡି ପାଇଁ ସାର୍ଟିଫିକେଟ୍ ଓ ବିଭିନ୍ନ ଗିଫ୍ଟ ଦିଆଯିବା ନେଇ ଲୋଭନୀୟ ଅଫର ବି ଦେଇଥିଲେ ଦୁର୍ବୃତ୍ତ । ତେବେ ଅଭିଭାବକମାନେ ପଲିସି ବାବଦକୁ ଅର୍ଥ ଆଣି ନଥିବା କହିବାରୁ ସେମାନଙ୍କ ନିକଟରୁ ବିଭିନ୍ନ ଉପାୟରେ ସୁନା ଅଳଙ୍କାର ଲୁଟି ନେଇଥିଲେ । ଏପରିକି କିଛି ଅଭିଭାବକଙ୍କ ଘରକୁ ଯାଇ ମଧ୍ୟ ସୁନା ଅଳଙ୍କାର ନେଇ ଆସିଥିଲେ ଏହି ଲୁଟେରାମାନେ । ଆଉ ଏ ବାବଦରେ ଲୁଟେରାମାନେ ରସିଦ ମଧ୍ୟ ଦେଇଥିଲେ । କିନ୍ତୁ ରସିଦ ଗୁଡିକ ନକଲି ବାହାରିଥିଲା ।
ନକଲି ରସିଦରୁ ଦୁର୍ବୃତ୍ତଙ୍କ ସବୁ ଚାଲାକି ଜାଣି ପାରିଥିଲେ ଅଭିଭାବକମାନେ । ଶେଷରେ ଅଭିଭାବକମାନେ ଟଙ୍କା ଦେବାକୁ କହି ଦୁର୍ବୃତ୍ତଙ୍କୁ ଗାଁକୁ ଡାକିଥିଲେ । ଟଙ୍କା ଲୋଭରେ ୩ ଲୁଟେରା ଗାଁକୁ ଆସିବା ପରେ ସେମାନଙ୍କୁ ଧରି ପୋଲିସର ଜିମା ଦେଇଛନ୍ତି ସ୍ଥାନୀୟ ଲୋକେ । ପୋଲିସ ଏହି ଲୁଟେରାଙ୍କୁ ଅଟକ ରଖି ପଚରା ଉଚୁରା କରିବା ସହ ତଦନ୍ତ ଜାରି ରଖିଛି ।
ତେବେ ଏକ ସ୍କୁଲରେ ଦୁର୍ବୃତ୍ତ ଆସି ପିଲାଙ୍କ ଭିତରେ ପ୍ରତିଯୋଗିତା କଲେ କିପରି ? ପୁଣି ସେମାନଙ୍କ ପାଖରୁ ଫୋନ ନମ୍ବର ବି ନେଇଗଲେ କିନ୍ତୁ ସ୍କୁଲ କର୍ତ୍ତୃପକ୍ଷ କିପରି ଜାଣି ପାରିଲେନି ? ଯଦି ଜାଣିଥିଲେ ତେବେ ସେମାନଙ୍କ ସମ୍ପର୍କରେ ସ୍କୁଲ କର୍ତ୍ତୃପକ୍ଷ ଯାଞ୍ଚ କରିଥିଲେ ନା ନାହିଁ ? ଏ ନେଇ ପ୍ରଶ୍ନ ଉଠାଇଛନ୍ତି ଅଭିଭାବକ । ଅନ୍ୟପଟେ ଏ ବାବଦରେ କ୍ୟାମେରା ଆଗରେ ମୁହଁ ଖୋଲି ନାହାନ୍ତି ସ୍କୁଲ କର୍ତ୍ତୃପକ୍ଷ ।