ବ୍ରହ୍ମପୁର : ସାଂସ୍କୃତିକ ପ୍ରତିଷ୍ଠାନ “ନୂପୁର”ର ମାସିକ ନାଟ୍ୟ ଆସର ସ୍ଥାନୀୟ ଗଞ୍ଜାମ କଳା ପରିଷଦ ସ୍ଥିତ କବିସୂର୍ଯ୍ୟ ରଙ୍ଗମଞ୍ଚ ଠାରେ ଅତ୍ୟନ୍ତ ସଫଳତାର ସହ ଅନୁଷ୍ଠିତ ହୋଇଯାଇଛି। ନିଖିଳ ଓଡ଼ିଶା ବରିଷ୍ଠ କଳାକାର ମହାସଂଘ ସଭାପତି ସୀମାନ୍ତ ନଟରାଜ ଡ଼ା. ତିରୁପତି ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ସାଂସ୍କୃତିକ ସଭାରେ ବରିଷ୍ଠ ଲୋକ ନାଟକ ଗବେଷକ ଡଃ. ବାୟାମନୁ ଚର୍ଚ୍ଚି ଏବଂ ବରିଷ୍ଠ ମଞ୍ଚ ମଣିଷ ନାଟ୍ୟକାର ବିପିନ ମହାପାତ୍ର ଅତିଥି ଭାବରେ ଯୋଗଦେଇ ନୂପୁରର ମାସିକ ନାଟ୍ୟ ଆସର ଆମ ମଞ୍ଚ ଆନ୍ଦୋଳନର ଏକ ଅଭିନଵ ଓ ସାର୍ଥକ ରୂପରେଖ ରୂପେ ଅଭିହିତ କରିଥିଲେ। ଏହି ଅବସରରେ ଓଡ଼ିଶା ସଙ୍ଗୀତ ନାଟକ ଏକାଡେମୀ ଉପାୟନ ପୁରସ୍କାର ପ୍ରାପ୍ତ ନିର୍ଦ୍ଦେଶକ ମଦନ ମିଶ୍ର ଏବଂ ଦକ୍ଷିଣ ଓଡ଼ିଶା ମଞ୍ଚ କଳାକାର ସମ୍ମିଳନୀ ସମ୍ପାଦକ ନାଟ୍ୟକାର ରମେଶ ମହାରଣାଙ୍କୁ ଆନୁଷ୍ଠାନିକ ଭାବେ ସମ୍ବର୍ଦ୍ଧିତ କରାଯାଇଥିଲା। ନୂପୁର ପରିଚାଳକ ସତ୍ୟ ମହାରଣା ସ୍ୱାଗତ ଭାଷଣ ପ୍ରଦାନ କରିଥିଲେ।
କାର୍ଯ୍ୟକ୍ରମର ପ୍ରଥମ ସୋପାନରେ କଳିଙ୍ଗ ନୃତ୍ୟଧାରା, ଅର୍ଚନା ଡ୍ୟାନ୍ସ ଏକାଡେମୀ ଓ ନୂପୁର ଅନୁଷ୍ଠାନର ଛାତ୍ରୀମାନେ ଓଡିଶୀ ନୃତ୍ୟ ଏବଂ ସୁଶ୍ରୀ ପ୍ରିତୀମଞ୍ଜରୀ, ଆଦିତ୍ୟ ସାହୁ, ସୁଦୀପ ସାହୁ, ରମେଶ ସେଠୀ ପ୍ରମୁଖ ଭଜନ ପରିବେଷଣ କରିଥିଲେ। ଡଃ. ସୋନାଲି ସାବତ, ମଞ୍ଜୁ ନାୟକ, ଅର୍ଚନା ପାତ୍ର, ପ୍ରିୟାଂଶା ନାୟକ, ମାଧବ ପାତ୍ର ପ୍ରମୁଖ ଗୁରୁମାନେ ନୃତ୍ୟ-ସଙ୍ଗୀତ ପରିଚାଳନା କରିଥିଲେ।
କାର୍ଯ୍ୟକ୍ରମର ତୃତୀୟ ସୋପାନରେ ସୁରଳ ସ୍ଥିତ “ସୁହାନୀ କ୍ରିଏସନ୍” ନିବେଦିତ ତଥା ଡ଼ା. ତିରୁପତି ସାହୁ ନିର୍ଦ୍ଦେଶିତ ସାମାଜିକ ନାଟକ “ଜୀବନ ସାଥୀ” ପରିବେଷଣ କରାଯାଇଥିଲା। ଏଥିରେ ଡ଼ା. ସାହୁ, ଦେବେନ୍ଦ୍ର ନାଥ ଶର୍ମା, ସୁବାସ ଚନ୍ଦ୍ର ସାହୁ ରୋଶନ୍, ଗଙ୍ଗାଧର ପାଣିଗ୍ରାହୀ, ଚାନ୍ଦାମାମା ବେହେରା ପ୍ରମୁଖ ଅଭିନୟ ମାଧ୍ୟମରେ ଉଭୟ ପତି-ପତ୍ନୀ ଗୋଟିଏ ମୁଦ୍ରାର ଦୁଇଟି ପାର୍ଶ୍ୱ ଏବଂ ଗୋଟିକର ଅବର୍ତ୍ତମାନରେ ଅପରଟିର ଜୀବନ ଦୁର୍ବିସହ ହୋଇ ଉଠୁଥିବା କାହାଣୀକୁ ଅତି ସୁନ୍ଦର ଭାବେ ଉପସ୍ଥାପନ କରିଥିଲେ। ସ୍ୱରବିବୁଧ ରମେଶ ଚନ୍ଦ୍ର ସ୍ୱାଇଁଙ୍କ ସଙ୍ଗୀତ ମୂର୍ଚ୍ଛନାରେ ନାଟକଟି ଗତିଶୀଳ ହୋଇଥିଲା। ଯନ୍ତ୍ର ସଂଗୀତରେ ତାଙ୍କୁ ପି. ଶଙ୍କର, ରଜନୀ ବେହେରା ଏବଂ ସାଥୀ ସହଯୋଗ କରିଥିଲେ। ମଞ୍ଚ ପ୍ରସ୍ତୁତ କରିଥିଲେ ନଳିନୀକାନ୍ତ ଗୌଡ଼ ଏବଂ ସତ୍ୟ ମହାରଣା। ନାଟକ ପରିଚାଳନା କ୍ଷେତ୍ରରେ ଡ଼ା. ଏନ୍. ସୁରେଶ ଚୌଧୁରୀ, କୋରା ଗୌଡ଼, ନାଲ୍ଲା ନୀଳକଣ୍ଠ, ଦୂର୍ଗା ପ୍ରସାଦ ଆଚାର୍ଯ୍ୟ, ଦୀପକ କୁମାର ପ୍ରଧାନ, ମହେନ୍ଦ୍ର କୁମାର ସାହୁ, ବଳରାମ ମହାପାତ୍ର, ପ୍ରଦୀପ କୁମାର ସାହୁ ପ୍ରମୁଖ ସହଯୋଗ କରିଥିଲେ। ନାଟକଟି ଦର୍ଶକ ମହଲରେ ବିଶେଷ ଆଦୃତି ଲାଭ କରିଥିବା ପରିଦୃଷ୍ଟ।