ନୂଆଦିଲ୍ଲୀ: ବୈଦେଶିକ ମନ୍ତ୍ରୀ ଏସ ଜୟଶଙ୍କରଙ୍କୁ ଚିଠି ଲେଖିଛନ୍ତି ବେଲୁଚ୍ ନେତା । ଚୀନ୍ ବେଲୁଚିସ୍ତାନରେ ସାମରିକ ବାହିନୀ ମୁତୟନ କରିବାକୁ ଯାଉଥିବା ସେ ଚିଠିରେ ଦାବି କରିଛନ୍ତି ।
ଭାରତର ବୈଦେଶିକ ମନ୍ତ୍ରୀ ଏସ ଜୟଶଙ୍କରଙ୍କୁ ପାକିସ୍ତାନର ବେଲୁଚିସ୍ତାନ ନେତା ମୀର ୟାର ବାଲୁଚ୍ ଚିଠି ଲେଖିଛନ୍ତି । ଚିଠି ମାଧ୍ୟମରେ ସତର୍କ କରାଇ ଦେଇଛନ୍ତି ଆଗାମୀ କିଛି ମାସ ମଧ୍ୟରେ ଚୀନ୍ ବେଲୁଚିସ୍ତାନରେ ସାମରିକ ବାହିନୀ ମୁତୟନ କରିବାକୁ ଯାଉଛି । ନୂଆବର୍ଷରେ ମୀର ୟାର ଜୟଶଙ୍କରଙ୍କୁ ସମ୍ବୋଧିତ ଏକ ଖୋଲା ଚିଠି ସାମାଜିକ ଗଣମାଧ୍ୟମ ଏକ୍ସରେ ପୋଷ୍ଟ କରିଥିଲେ । ସେ ଚିଠିରେ କହିଛନ୍ତି ଯେ ବେଲୁଚ୍ ପ୍ରତିନିଧିମାନେ ଇସଲାମାବାଦ ଏବଂ ବେଜିଂ ମଧ୍ୟରେ ବଢ଼ୁଥିବା ରଣନୈତିକ ସହଭାଗୀତାକୁ “ବିପଜ୍ଜନକ” ବୋଲି ଦେଖନ୍ତି । ବେଲୁଚିସ୍ତାନ ପାକିସ୍ତାନର ନିୟନ୍ତ୍ରଣରେ ଦଶନ୍ଧି ଧରି ଦମନର ସମ୍ମୁଖୀନ ହୋଇଛି । ବେଲୁଚିସ୍ତାନର ଲୋକମାନେ ଦୀର୍ଘ ବର୍ଷ ଧରି ପାକିସ୍ତାନର ରାଷ୍ଟ୍ର ଦଖଲ, ରାଜ୍ୟ-ପ୍ରାୟୋଜିତ ଆତଙ୍କବାଦ ଏବଂ ଘୃଣ୍ୟ ମାନବାଧିକାର ଅତ୍ୟାଚାର ସହ୍ୟ କରିଛନ୍ତି । ଏହି ଯନ୍ତ୍ରଣାକୁ ମୂଳରୁ ଦୂର କରି ଆମ ଜାତି ପାଇଁ ସ୍ଥାୟୀ ଶାନ୍ତି ଏବଂ ସାର୍ବଭୌମତ୍ୱ ସୁନିଶ୍ଚିତ କରିବା ପାଇଁ ବର୍ତ୍ତମାନ ସମୟ ଆସିଛି ବୋଲି ସେ ଚିଠିରେ ଲେଖିଛନ୍ତି । ଚିଠିରେ ସେ ନିଜକୁ ବାଲୁଚ୍ ପ୍ରତିନିଧି ଓ ବେଲୁଚିସ୍ତାନକୁ ଗଣରାଜ୍ୟ ବୋଲି ଉଲ୍ଲେଖ କରିଛନ୍ତି ।
ଚିଠିରେ ସେ ଏହା ମଧ୍ୟ ଉଲ୍ଲେଖ କରିଛନ୍ତି ଯେ ଚୀନ୍-ପାକିସ୍ତାନ ଅର୍ଥନୈତିକ କରିଡର (CPEC)ର ଶେଷ ପର୍ଯ୍ୟାୟ ଆଡକୁ ଦ୍ରୁତ ଗତିରେ ବଢ଼ୁଛି । ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ଏକ ପ୍ରମୁଖ ବେଲ୍ଟ ଆଣ୍ଡ୍ ରୋଡ୍ ଇନିସିଏଟିଭ୍ ପ୍ରକଳ୍ପ ବେଲୁଚିସ୍ତାନ ଦେଇ ଗତି କରୁଛି । ବେଲୁଚିସ୍ତାନ ଗଣରାଜ୍ୟ ପାକିସ୍ତାନ ଏବଂ ଚୀନ୍ ମଧ୍ୟରେ ବୃଦ୍ଧି ପାଉଥିବା ରଣନୈତିକ ମେଣ୍ଟକୁ ଗଭୀର ବିପଦପୂର୍ଣ୍ଣ ବୋଲି ଦେଖେ । ସେ ଦାବି କରିଛନ୍ତି ଯେ ଯଦି ବେଲୁଚିସ୍ତାନର ପ୍ରତିରୋଧ ଏବଂ ପ୍ରତିରକ୍ଷା ବାହିନୀକୁ ସୁଦୃଢ଼ ଏବଂ ଗମ୍ଭୀରତାର ସହିତ ନିଆନଯାଏ , ତେବେ ଏହି ଅଞ୍ଚଳ ଶୀଘ୍ର ସିଧାସଳଖ ଚୀନ୍ ସାମରିକ ଉପସ୍ଥିତି ଦେଖିପାରେ । ସ୍ଥାନୀୟ ଜନସଂଖ୍ୟାର ସମ୍ମତି ବିନା ବେଲୁଚିସ୍ତାନରେ ଯେକୌଣସି ଚୀନ୍ ସୈନ୍ୟ ମୁତୟନର ବ୍ୟାପକ ଆଞ୍ଚଳିକ ପରିଣାମ ହେବ ।
ଏହା ବ୍ୟତୀତ, ଚିଠିରେ ସେ ପହଲଗାମ ଆତଙ୍କବାଦୀ ଆକ୍ରମଣର ଜବାବରେ ପାକିସ୍ତାନ ଏବଂ ପିଓକେ ଉପରେ ଅପରେସନ ସିନ୍ଦୁର ଦ୍ବାରା ଭାରତୀୟ ଆକ୍ରମଣକୁ ପ୍ରଶଂସା କରିଛନ୍ତି । ସେ କହିଛନ୍ତି, ଆମେ ପୂର୍ବ ବର୍ଷରେ ମୋଦି ସରକାରଙ୍କ ଦ୍ୱାରା ଅପରେସନ ସିନ୍ଦୂର ମାଧ୍ୟମରେ ନିଆଯାଇଥିବା ସାହସିକ ଏବଂ ଦୃଢ଼ କାର୍ଯ୍ୟାନୁଷ୍ଠାନକୁ ପ୍ରଶଂସା କରୁଛୁ । ମିର ୟାର ବାଲୋଚ୍ଙ୍କ ଦାବି ଉପରେ ଏପର୍ଯ୍ୟନ୍ତ ଭାରତ ସରକାର କିମ୍ବା ଚୀନ୍ ଏବଂ ପାକିସ୍ତାନୀ କର୍ତ୍ତୃପକ୍ଷଙ୍କ ପକ୍ଷରୁ କୌଣସି ସରକାରୀ ପ୍ରତିକ୍ରିୟା ଦିଆଯାଇ ନାହିଁ ।