ଉମରକୋଟ ବନାଞ୍ଚଳରେ ବୃକ୍ଷରୋପଣ ଯୋଜନାରେ ଅନିୟମିତତାର ଅଭିଯୋଗ : ଖରାରେ ମରୁଛି ୧୦ ହଜାର ଚାରା, ଭିଜିଲାଞ୍ଚ ତଦନ୍ତ ଦାବି

ଉମରକୋଟ : ନବରଙ୍ଗପୁର ଜିଲ୍ଲାର ଉମରକୋଟ ବନାଞ୍ଚଳ ଅନ୍ତର୍ଗତ ନବରଙ୍ଗପୁର ବନଖଣ୍ଡର ଜାମଧରା ବିଟ, ତୋହରା ସେକ୍ସନରେ ୨୦୨୫–୨୬ ମସିହାର “ସି.ଏ–ଏ.ଆର ବୃକ୍ଷ ରୋପଣ” ଯୋଜନା ଅଧୀନରେ ପ୍ରାୟ ୧୦ ହେକ୍ଟର ଜଙ୍ଗଳ ଜମିରେ ପ୍ରାୟ ୧୦,୦୦୦ ଟି ଚାରା ରୋପଣ କରାଯାଇଥିବା କୁହାଯାଉଛି। କିନ୍ତୁ ବର୍ତ୍ତମାନ ସ୍ଥିତି ଦେଖିଲେ ଏହି ସମଗ୍ର ବୃକ୍ଷରୋପଣ କାର୍ଯ୍ୟର ସଠିକ୍ ପରିଚାଳନା ହୋଇନଥିବା ନେଇ ଗୁରୁତର ପ୍ରଶ୍ନ ଉଠୁଛି।

ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ ବୃକ୍ଷରୋପଣ ସ୍ଥଳରେ କେବଳ ଗୋଟିଏ ସାଇନ ବୋର୍ଡ ଲଗାଯାଇଛି, କିନ୍ତୁ ସେଥିରେ ପ୍ରକଳ୍ପର ମୋଟ ଖର୍ଚ୍ଚ, କାମର ବିବରଣୀ କିମ୍ବା ଦାୟିତ୍ୱ ନେଇଥିବା ଅଧିକାରୀଙ୍କ ସଠିକ୍ ସୂଚନା ଉଲ୍ଲେଖ ନଥିବା ଦେଖାଯାଇଛି। ଏହା ଫଳରେ ସରକାରୀ ଧନ ବ୍ୟୟ ସମ୍ବନ୍ଧରେ ସ୍ପଷ୍ଟତା ନଥିବା ନେଇ ଲୋକମାନଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଛି।
ବର୍ତ୍ତମାନ ଏହି ଅଞ୍ଚଳରେ ପ୍ରବଳ ଖରା ପରିସ୍ଥିତି ଚାଲିଥିବା ସତ୍ତ୍ୱେ ଚାରାଗୁଡ଼ିକ ପାଇଁ ପାଣି ବ୍ୟବସ୍ଥା, ଯଥେଷ୍ଟ ଯତ୍ନ କିମ୍ବା ରକ୍ଷାଣବେକ୍ଷଣ ହୋଇନଥିବାରୁ ଅଧିକାଂଶ ଚାରା ଶୁଖି ମରିବାକୁ ବସିଛି। ଅଭିଯୋଗ ଅନୁସାରେ ରୋପଣ ପରେ ବନ ବିଭାଗ ପକ୍ଷରୁ କୌଣସି ନିୟମିତ ତଦାରକ କରାଯାଇନାହିଁ। ଫଳସ୍ୱରୂପ ପରିବେଶ ସୁରକ୍ଷା ନାମରେ କରାଯାଇଥିବା ଏହି ବୃହତ୍ କାର୍ଯ୍ୟକ୍ରମ ବର୍ତ୍ତମାନ ଅବହେଳାର ଶିକାର ହୋଇଛି।

ସ୍ଥାନୀୟ ଗ୍ରାମବାସୀମାନେ କହୁଛନ୍ତି ଯେ ଏହି ବିଷୟରେ ବନ ବିଭାଗର ଅଧିକାରୀମାନଙ୍କୁ ଏବଂ ଡିଏଫଓ କାର୍ଯ୍ୟାଳୟ କୁ ଯୋଗାଯୋଗ କରିବା ପ୍ରୟାସ କରାଯାଇଥିଲେ ମଧ୍ୟ ସଠିକ୍ ପ୍ରତିକ୍ରିୟା ମିଳିନାହିଁ। ଏହା ସହ ଏହି ଅଞ୍ଚଳରେ ଦାୟିତ୍ୱରେ ଥିବା ଫରେଷ୍ଟର କିମ୍ବା ଅନ୍ୟ କୌଣସି ଅଧିକାରୀ ନିୟମିତ ଭାବେ ଏହି ସ୍ଥାନର ତଦାରକ କରୁନଥିବା ମଧ୍ୟ ଅଭିଯୋଗ ହେଉଛି।
ଜାମଧରା ସହିତ ଆସପାସର ଗ୍ରାମର ଲୋକମାନେ ପ୍ରଶ୍ନ କରୁଛନ୍ତି — ଯଦି ସରକାର ପରିବେଶ ଓ ଜଳବାୟୁ ପରିବର୍ତ୍ତନ ନାମରେ ଲକ୍ଷ ଲକ୍ଷ ଟଙ୍କା ବ୍ୟୟ କରୁଛନ୍ତି, ତେବେ ସେହି ଟଙ୍କାର ଠିକ୍ ବ୍ୟବହାର କେଉଁଠି? ଯଦି ଚାରା ରୋପଣ ପରେ ତାହାର ରକ୍ଷାଣବେକ୍ଷଣ ହେଉନାହିଁ, ତେବେ ଏହା କେବଳ କାଗଜପତ୍ରରେ ସୀମିତ ଥିବା ଯୋଜନା ନୁହେଁ କି?

ସାଧାରଣ ଲୋକମାନଙ୍କ ମତାନୁସାରେ ଏହି ସମଗ୍ର ବୃକ୍ଷରୋପଣ କାର୍ଯ୍ୟରେ ଅନିୟମିତତା ଘଟିଥିବା ସନ୍ଦେହ ରହିଛି। ସେହିପରି ଏହି ପ୍ରକଳ୍ପରେ କେତେ ଟଙ୍କା ବ୍ୟୟ ହୋଇଛି, କାମ କିପରି ହୋଇଛି ଓ କାହିଁକି ଚାରାଗୁଡ଼ିକ ମରିବାକୁ ବସିଛି — ତାହାର ନିଷ୍ପକ୍ଷ ତଦନ୍ତ ପାଇଁ ତୁରନ୍ତ ଭିଜିଲାଞ୍ଚ ତଦନ୍ତ କରାଯିବା ଆବଶ୍ୟକ।

ଗ୍ରାମବାସୀମାନେ ଆହୁରି କହିଛନ୍ତି, ଯଦି ପରିବେଶ ସୁରକ୍ଷା ନାମରେ ସରକାରୀ ଧନ ବ୍ୟୟ ହୋଇ ଏପରି ଅବହେଳା ହୁଏ, ତେବେ ଏହା ମାତ୍ର ସରକାରୀ ଧନର ଅପଚୟ ନୁହେଁ, ବରଂ ପରିବେଶ ସୁରକ୍ଷା ପ୍ରତି ଗୁରୁତର ଅବମାନ ମଧ୍ୟ ଅଟେ। ଏହି କାରଣରୁ ଏହି ଘଟଣାରେ ଦାୟୀ ଥିବା ଫରେଷ୍ଟର ଓ ବନ ବିଭାଗର ଦାୟିତ୍ୱପରାୟଣ ଅଧିକାରୀମାନଙ୍କ ବିରୁଦ୍ଧରେ କଡା କାର୍ଯ୍ୟାନୁଷ୍ଠାନ ନିଆଯିବାକୁ ସାଧାରଣ ଲୋକମାନେ ଦାବି କରିଛନ୍ତି।

ଯଦି ତୁରନ୍ତ ପଦକ୍ଷେପ ନ ନିଆଯାଏ, ତେବେ ଏହି ମହତ୍ତ୍ୱପୂର୍ଣ୍ଣ ବୃକ୍ଷରୋପଣ ଯୋଜନା ସମ୍ପୂର୍ଣ୍ଣ ବିଫଳ ହୋଇପଡ଼ିବ ବୋଲି ସ୍ଥାନୀୟ ଲୋକମାନେ ଚେତାବନୀ ଦେଇଛନ୍ତି।